Kapingamarangi - Leviticus - 13

13:1  Dimaadua gaa-wanga gi Moses mo Aaron nia haganoho aanei:

13:2  Maa tangada i goodou gaa-hai dono magibala i dono gili, be-di magibuu, be-di gowaa e-angammee dela e-mee di-gila-aga di magi genegene, gei mee e-hai gi-lahi gi tangada hai-mee-dabu di madawaawa Aaron.

13:3  Tangada hai-mee-dabu ga-hagadina di magi dela i-di gili o-maa. Nia ngaahulu ala i-di gowaa dela iei di magi le e-kene gei di gowaa dela iei di magi le e-pogo, deenei le e-modongoohia bolo di magi genegene, gei tangada hai-mee-dabu gaa-hai bolo tangada deelaa le e-milimilia.

13:4  Maa di magi le e-kene ge hagalee pogo gi-lodo ge nia ngaahulu la-hagalee kene, gei tangada hai-mee-dabu gaa-dugu-gee tangada deelaa gi-daha mo nia daangada i-nia laangi e-hidu.

13:5  I-di hidu laangi, gei tangada hai-mee-dabu ga-hagadina labelaa tangada deelaa, gei mee ga-modongoohia bolo ma e-hai-hua be di-maa digi damana gi-daha, gei mee gaa-dugu labelaa tangada deelaa gi-daha mo nia daangada i-nia laangi labelaa e-hidu.

13:6  Tangada hai-mee-dabu ga-hagadina labelaa a-mee i-di hidu laangi. Maa di magi la-gu-dulii-mai gu-hagalee damana-mai, gei tangada hai-mee-dabu gaa-hai bolo mee gu-madammaa ang-gi di hai-daumaha, maa di magibala hua. Tangada deelaa gi-tuugia ono goloo gii-mmaa gei mee gu-madammaa ang-gi di hai-daumaha.

13:7  Gei di magi la-ga-damana-mai i-muli tangada hai-mee-dabu ma-ga-hagadina a-mee gaa-hai bolo ma gu-humalia-hua, gei tangada deelaa e-hai gii-hana labelaa gi tangada hai-mee-dabu.

13:8  Tangada hai-mee-dabu ga-hagadina labelaa tangada deelaa, gei di magi la-gu-damana-mai, gei mee gaa-hai bolo mee gu-milimilia, idimaa ma di magi genegene.

13:9  Maa tangada i goodou gaa-hai dono magi i dono gili, mee e-laha-mai gi tangada hai-mee-dabu,

13:10  e-hagadina a-mee. Di magi le e-kene gu-haga-kene nia ngaahulu ala i-di gowaa dela iei di magi, be e-honu uugau,

13:11  deenei la di magi genegene dela gu-duainau. Tangada hai-mee-dabu gaa-hai bolo tangada deelaa e-milimilia. Ma deai dono hadinga e-dugu a-mee gi-daha mo nia daangada ai, idimaa, nia daangada la-gu-gidee-hua bolo mee e-milimilia.

13:12  Di magi genegene ma-gaa-gahu a-mee hagatau daamada i-di libogo gaa-tugi i-nia babaawae,

13:13  tangada hai-mee-dabu ga-hagadina a-mee labelaa. Mee ga-gidee bolo di magi la-gu-buni-hua i-di gili o-maa, gei mee gaa-hai bolo mee gu-madammaa-hua ang-gi di hai-daumaha. Dono gili hagatau la-guu-kene, gei mee gu-madammaa-hua ang-gi di hai-daumaha.

13:14  Gei di madagoaa-hua di magibala ga-gila-aga labelaa i dono gili, gei mee gu-milimilia.

13:15  Tangada hai-mee-dabu ga-hagadina a-mee labelaa, gei mee ga-gidee di magibala, gei mee gaa-hai bolo tangada deelaa le e-milimilia.

13:16  Di magibala la-guu-hili guu-kene labelaa, gei mee gaa-hana labelaa gi tangada hai-mee-dabu.

13:17  Tangada hai-mee-dabu ga-hagadina a-mee labelaa. Di magi la-guu-kene, gei mee gu-madammaa ang-gi di hai-daumaha, gei tangada hai-mee-dabu gaa-hai bolo mee gu-madammaa.

13:18  Maa tangada i goodou gaa-hai dono magibuu gaa-hili,

13:19  nomuli ga-baehabaeha-aga labelaa nia mee kene be nia mee mmee i-di gowaa dela nogo iei di magibuu, gei tangada deelaa e-hai gii-hana gi tangada hai-mee-dabu.

13:20  Tangada hai-mee-dabu ga-hagadina a-mee, gei di gowaa deelaa le e-pogo i-nia gowaa ala i-golo, gei nia ngaahulu ala i-di gowaa le e-kene, gei mee gaa-hai bolo tangada deelaa e-milimilia. Ma di magi genegene dela ne-daamada i-di magibuu.

13:21  Gei tangada hai-mee-dabu ga-hagadina di-maa, ga-gidee bolo nia ngaahulu ala i-di gowaa la-hagalee kene, gei di gowaa deelaa la-hagalee pogo i-nia gowaa ala i-golo, gei di gowaa deelaa le e-gono maalama, gei tangada hai-mee-dabu gaa-dugu a-mee i-daha mo nia daangada i-nia laangi e-hidu.

13:22  Di magi le e-tomo gi-daha, gei tangada hai-mee-dabu gaa-hai bolo mee e-milimilia, ma di magi genegene.

13:23  Di magi le e-hai-hua be di-maa hagalee tomo gi-daha, gei di-maa di lohongo hua ni-di magibuu, gei tangada hai-mee-dabu gaa-hai bolo mee e-madammaa-hua ang-gi di hai-daumaha.

13:24  Maa tangada i goodou guu-wele, gei nia goneiga ala i-di gili la-guu-kene be angammee,

13:25  tangada hai-mee-dabu le e-hai gi-hagadina tangada deelaa. Nia ngaahulu ala i-di gowaa la-guu-kene, gei di gowaa la-guu-pogo i-nia gowaa ala i-golo, malaa, di magi genegene ne-daamada-aga i-di gowaa dela ne-wele, gei tangada hai-mee-dabu gaa-hai bolo mee e-milimilia.

13:26  Gei nia ngaahulu la-hagalee kene gei di gowaa la-hagalee pogo i-nia gowaa ala i no-daha, gei di gowaa le e-gono kene, gei tangada hai-mee-dabu gaa-dugu a-mee i-daha mo nia daangada i-nia laangi e-hidu.

13:27  I-di hidu laangi, tangada hai-mee-dabu ga-hagadina a-mee labelaa. Gei di magi la-gu-damana-mai, malaa, ma di magi genegene deelaa. Tangada hai-mee-dabu gaa-hai bolo mee la-gu-milimilia.

13:28  Gei di magi le e-hai-hua be di-maa digi damana gi-daha ge e-gono kene, malaa, ma hagalee di magi genegene. Tangada hai-mee-dabu gaa-hai bolo mee e-madammaa ang-gi di hai-daumaha, idimaa, ma di lohongo hua ni-di gowaa dela ne-wele.

13:29  Maa di magi gaa-tomo i-di libogo be-di mudamuda o taane be-di ahina,

13:30  tangada hai-mee-dabu le e-hai gi-hagadina di magi deelaa. Mee ga-gidee bolo di gowaa le e-pogo i-nia gowaa ala i-golo, gei nia ngaahulu ala i-di gowaa le e-loubuge ge lligi, malaa ma di magi genegene, gei mee gaa-hai bolo tangada e-milimilia.

13:31  Gei mee ga-hagadina tangada deelaa, ga-gidee bolo di magi la-hagalee pogo gi-lodo i-nia gowaa ala i-golo, gei nia ngaahulu ala i-di gowaa la-hagalee luuli, gei tangada hai-mee-dabu gaa-dugu a-mee i-daha mo nia daangada i-nia laangi e-hidu.

13:32  I-di hidu laangi gei mee ga-hagadina tangada deelaa labelaa. Maa digi damana gi-daha gei nia ngaahulu ala i-di gowaa la-hagalee loubuge gei di gowaa la hagalee pogo gi-lodo i-nia gowaa ala i-golo,

13:33  gei tangada deelaa gi-dahia dono libogo ge hagalee go nia ngaahulu ala i-di gili di magi deelaa. Tangada hai-mee-dabu gaa-dugu labelaa a-mee i-daha mo nia daangada i-nia laangi labelaa e-hidu.

13:34  I-di hidu laangi tangada hai-mee-dabu ga-hagadina labelaa di magi deelaa, gei di magibala la-hagalee damana gi-daha ge hagalee pogo gi-lodo, gei mee gaa-hai bolo mee e-madammaa ang-gi di hai-daumaha. Gei mee gaa-tugi ono goloo, gu-madammaa.

13:35  Gei di magibala ma-ga-damana-mai i-muli di hagamodongoohia-aga bolo mee gu-madammaa,

13:36  tangada hai-mee-dabu ga-hagadina a-mee labelaa. Di magibala la-gu-damana-mai, gei di-maa dono hadinga ai bolo e-hagadina be nia ngaahulu ala i-di gili di magibala la-gu-loubuge, idimaa gu-modongoohia bolo tangada deelaa le e-milimilia.

13:37  Gei tangada hai-mee-dabu la-ga-hagamaanadu bolo di magibala la-hagalee damana-mai, gei nia ngaahulu ala i-di gili di magibala, le e-luuli ge e-tomo-hua, di magibala la-guu-hili, gei tangada hai-mee-dabu gaa-hai bolo tangada deelaa le e-madammaa hua.

13:38  Maa tangada i goodou, taane be-di ahina, ga-iai nia mee genegene i dono gili,

13:39  tangada hai-mee-dabu le e-hai gi-hagadina tangada deelaa. Maa e-kene gono dogolia, gei di-maa di lohongo mee hua ne-mohole i-di gili, mee e-madammaa-hua.

13:40  Maa taane gaa-wweu ono ngaahulu gi-daudau gi-tua be gi-mua dono libogo, di mee deenei la-hagalee haga-milimilia taane deelaa.

13:41  Maa taane gaa-wweu ono ngaahulu gi-daudau gi-tua be gi-mua dono libogo, di mee deenei la-hagalee haga-milimilia taane deelaa.

13:42  Gei di-maa di magibala kene-gono angammee ga-tomo-aga i-di gowaa magila deelaa, gei di-maa di magi genegene.

13:43  Tangada hai-mee-dabu ga-hagadina a-mee, gei di-maa di magibala kene gono angammee,

13:44  gei mee gaa-hai bolo taane deelaa le e-milimilia, idimaa di magi genegene dela i dono libogo.

13:45  Maa tangada gaa-hai dono magi genegene, gei mee gi-ulu i-nia gahu mahaahaa, dono libogo hudee dala-ina, gahu-ina ono golomada, ga-wolowolo boloo, “Hagalee madammaa, hagalee madammaa!”

13:46  Mee e-milimilia i-di waalooloo o dono hai dono magi, gei mee gii-noho i-daha mo-di waahale, i-daha mo nia daangada ala i-golo.

13:47  Di madagoaa di bodoina ma-ga i-di gili nia gahu ala ne-hai gi-nia ngaahulu siibi, be nia gahu ‘linen’,

13:48  be i-hongo di bida gahu ‘linen’ be di bida gahu ne-hai gi-nia ngaahulu siibi, be i-hongo di mee dela ne-hai gi-nia gili kau,

13:49  ge di-maa e-gono halatee be angammee, gei di magi deenei le e-damana gi-daha, malaa, di magi bodoina deenei e-hai gi-hagi-anga gi tangada hai-mee-dabu.

13:50  Tangada hai-mee-dabu ga-hagadina di mee deelaa, gaa-dugu-gee gi-daha i-nia laangi e-hidu.

13:51  I-di hidu laangi, gei mee ga-hagadina di-maa labelaa, gei di magi deelaa le e-damana-mai, gei di mee deelaa la-gu-milimilia.

13:52  Tangada hai-mee-dabu gaa-dudu di mee deelaa, idimaa, di magi deenei la-ga-damana-mai le e-hai gii-dudu gi-daha.

13:53  Gei mee ma-ga-hagadina di-maa, ga-modongoohia bolo di magi deenei la-hagalee damana gi-daha i-di gili di mee deenei,

13:54  gei mee gaa-hai bolo di mee deenei la-gi-gaugau-ina gaa-dugu-gee i-daha i-nia laangi labelaa e-hidu.

13:55  Mee ga-hagadina labelaa di-maa, gei di-maa digi hai dono huai gono, gei di-maa e-noho-hua be di-maa, digi damana gi-daha, gei di mee deelaa le e-milimilia hua igolo, tangada dana mee deelaa la-gi-duungia di-maa gi-daha, ma e-aha maa di magi la i-lodo be i-di gili i-daha.

13:56  Gei di madagoaa tangada hai-mee-dabu ma-ga-hagadina labelaa di-maa, gei di magi la-gu-dulii-mai, gei mee ga-haahi di-maa gi-daha i-di gili di gahu be i-di gili di gili kau.

13:57  Gei di magi deelaa la-gaa-tomo-aga labelaa, ga-damana gi-daha, gei tangada dana mee deelaa la-gi-duungia di-maa gi-daha.

13:58  Gei mee ma-ga-gaugau di mee deelaa, gei nia magi la-ga-hagalee, gei mee gi-gaugau-ina di-maa labelaa, gei di-maa ga-madammaa ang-gi di hai-daumaha.

13:59  Aanei nnaganoho ang-gi di magi dela i-di gili nia gahu, nia gahu gili siibi be nia gahu ‘linen’, be go nia gahu ala i-golo mo nia mee ala ne-hai gi-nia gili kau. Nia haganoho aanei le-e-haga-modongoohia be nia maa le e-madammaa be e-milimilia.