SP - Leviticus - 20

20:1  וידבר יהוה אל משה לאמר

20:2  ואל בני ישראל תדבר איש איש מבית ישראל ומן הגר הגר בישראל אשר יתן מזרעו למלך מות יומת עם הארץ ירגמהו באבן

20:3  ואני אתן את פני באיש ההוא והכרתי אתו מקרב עמו כי מזרעו נתן למלך למען טמא את מקדשי וחלל את שם קדשי

20:4  ואם העלם יעלמו עם הארץ את עיניהם מן האיש ההוא בתתו מזרעו למלך לבלתי המית אתו

20:5  ושמתי אני את פני באיש ההוא ובמשפחתו והכרתי אתו ואת כל הזנים אחריו לזנות אחרי המלך מקרב עמם

20:6  והנפש אשר תפנה אל האבות ואל הידענים לזנות אחריהם ונתתי את פני בנפש ההיא והכרתי אתה מקרב עמה

20:7  . והייתם קדשים כי אני יהוה אלהיכם

20:8  ושמרתם את כל חקתי ועשיתם אתם אני יהוה מקדשכם

20:9  כי איש איש אשר יקלל את אביו ואת אמו מות יומת אביו ואמו קלל דמו בו

20:10  ואיש אשר ינאף את אשת איש אשר ינאף את אשת רעהו מות יומת הנאף והנאפת

20:11  ואיש אשר ישכב את אשת אביו ערות אביו גלה מות יומתו שניהם דמיהם בם

20:12  ואיש אשר ישכב את כלתו מות יומתו שניהם תבל עשו דמיהם בם

20:13  ואיש אשר ישכב את זכר משכבי אשה תועבה עשו מות יומתו שניהם דמיהם בם

20:14  ואיש אשר יקח את אשה ואת אמה זמה היא באש ישרפו אתו ואתהן ולא תהיה זמה בתוככם

20:15  ואיש אשר יתן שכבתו בבהמה מות יומת ואת הבהמה תהרגו

20:16  ואשה אשר תקרב אל כל בהמה לרבעה אתה והרגת את האשה ואת הבהמה מות יומתו דמיהם בם

20:17  ואיש אשר יקח את אחתו בת אביו או בת אמו וראה את ערותה והיא תראה את ערותו חסד הוא ונכרתו לעיני בני עמם ערות אחתו גלה עונו ישא

20:18  ואיש אשר ישכב את אשה דוה וגלה את ערותה את מקור הערוה והיא גלתה את מקור דמיה ונכרתו שניהם מקרב עמם

20:19  ערות אחות אביך ואחות אמך לא תגלה כי את שאר הערוה עונם ישאו

20:20  ואיש אשר ישכב את דדתו את ערות דדו גלה חטאם ישאו עררים יומתו

20:21  ואיש אשר יקח את אשת אחיו נדה היא ערות אחיו גלה עררים יהיו

20:22  ושמרתם את כל חקתי ואת כל משפטי ועשיתם אתם ולא תקיא הארץ אתכם אשר אני מביא אתכם שמה לשבת בה

20:23  ולא תלכו בחקות הגוים אשר אני משלח מפניכם כי את כל אלה עשו ואקץ בם

20:24  ואמר לכם אתם תירשו את אדמתם ואני אתננה לכם לרשת אתה ארץ זבת חלב ודבש אני יהוה אלהיכם אשר הבדלתי אתכם מן העמים

20:25  והבדלתם בין הבהמה הטהרה לטמאה ובין העוף הטמא לטהור ולא תשקצו את נפשתיכם בבהמה ובעוף ובכל אשר תרמש האדמה אשר הבדלתי לכם לטמאה

20:26  והייתם לי קדשים כי . אני יהוה ואבדיל אתכם מן העמים להיות לי

20:27  ואיש או אשה אשר יהיה בהם אוב או ידעני מות יומתו באבנים תרגמום . דמיהם בם