Kapingamarangi - Matthew - 2

2:1  Jesus ne-haanau i-lodo di waahale Bethlehem i Judea, i-lodo di madagoaa di King Herod. Hunu daane halahala hagailongo-mee gi-nia heduu, ne-llooia i-bahi-i-dua, gaa-dau i Jerusalem,

2:2  ga-heheeu, “Dehee di Tama dela ne-haanau belee hai di king digau o Jew? Gimaadou gu-gidee di heduu o-Maa dela ne-gila-aga i-bahi-i-dua, gimaadou ga-lloo-ia belee daumaha gi Mee.”

2:3  Di madagoaa King Herod ne-longono di mee deenei, geia mo digau Jerusalem huogodoo gu-lodo huaidu huoloo.

2:4  Mee ga-gahi-mai nia dagi hai-mee-dabu mono gau haga-donudonu haganoho huogodoo, ga-heeu gi digaula, “Di Mesaia la-bolo e-haanau i-hee?”

2:5  Digaula ga-helekai, “I-lodo di waahale Bethlehem i Judea, be nnelekai ala guu-lawa di hihi mai baahi soukohp:

2:6  ‘Bethlehem, goe dela i-lodo Judea. Hudee hai bolo goe e-koia e-dulii i-nia waahale aamua i Judea, idimaa, Tagi dela e-dagi agu daangada Israel, le e-gila-aga i do baahi.’ ”

2:7  Herod ga-haga-dagabuli-mai hagammuni digau ala ne-lloo-ia i-bahi-i-dua, ga-heeu gi digaula di madagoaa ne-gila-aga di heduu deelaa,

2:8  ga-hagau digaula gi Bethlehem, ga-helekai, “Goodou hula halahala-ina hagahumalia di Tama dulii deelaa. Goodou gu-gidee, haga-iloo-ina-mai, au e-hanadu labelaa e-daumaha gi Mee.”

2:9  Muli-hua di-nadau hagalongo gi nnelekai aanei, digaula gaa-hula, gaa-mmada gi-di heduu la-hua dela ne-mmada ginai ginaadou i bahi-i-dua, e-hana i nadau mua e-dagi ginaadou, gaa-hana-loo, ga-haga-huudonu-ia gi-hongo di gowaa dela e-noho-ai Tama-dulii deelaa.

2:10  Digaula gu-tenetene huoloo i-di-nadau gidee labelaa di heduu deelaa.

2:11  Digaula ga-ulu-adu gi-lodo di hale, ga-gidee Tama-dulii mo dono dinana go Mary, gei digaula ga-dogoduli ga-daumaha ang-gi Mee, ga-dahi-aga nadau goloo hagalabagau aanei: nia goolo, nia ‘frankincense’ mono ‘myrrh’, ga-dugu-adu gi-Mee.

2:12  God gu-helekai gi digaula i-lodo di moe, bolo gi-hudee hula labelaa gi Herod, gei digaula gaa-hula i tuai ala gi nadau henua.

2:13  I-muli digaula ne-hula, tangada di-langi o Dimaadua ga-haga-gida gi Joseph i-lodo di midi, ga-helekai, “Herod e-halahala di Tama deenaa belee daaligi gii-made. Nnoinua, lahia di Tama deenaa mo dono dinana, hula hagammuni gi Egypt, noho i-golo gaa-dae-loo gi-di madagoaa au ga-helekai bolo gi-hagatanga.”

2:14  Joseph ga-du-gi-nua, ga-hagatanga i-di boo hua deelaa, gaa-lahi Tama deelaa mo dono dinana, gaa-hula gi Egypt,

2:15  gaa-noho i-golo, gaa-dae-loo gi-di made o Herod. Di mee deenei ne-hai bolo gi-kila-ai nia helekai a Dimaadua mai i-baahi soukohp, “Au ne-gahi dagu Dama-daane gi-daha mo Egypt.”

2:16  Herod gu-modongoohia bolo digaula gu-halahalau eia, gu-hagawelewele huoloo, ga-helekai bolo nia dama-daane huogodoo ala i-lodo Bethlehem mo i-lodo nia guongo ala i-nodaha la-gi-daaligidia gii-mmade, nia dama-daane huogodoo ala gu-dagi-lua nadau ngadau gaa-huli gi-lala. Mee ne-hai di-mee deenei idimaa mee gu-iloo mai baahi digau hagailongo-mee gi-nia heduu, di madagoaa ne-gila-ai di heduu deelaa.

2:17  Di mee deenei ne-hai guu-gila be-di haga-modongoohia soukohp Jeremiah, dela ne-hihi boloo:

2:18  “Dahi lee e-hanimoi i Ramah, di lee dangidangihia. Rachel e-dangidangi i ana dama, gu-deemee di manawa lamalia, i digaula guu-odi di-mmade.”

2:19  Muli di made o Herod, tangada di-langi o Dimaadua ga-hagagida gi Joseph i-lodo di moe,

2:20  ga-helekai gi mee, “Nnoinua, lahia di Tama mo dono dinana, hula gi Israel, idimaa, digau ala ne-belee daaligi di Tama deenaa, la-guu-mmade.”

2:21  Joseph ga-du-gi-nua, gaa-lahi Tama deelaa mo tinana o-maa, gaa-hula gi-muli gi Israel.

2:22  Gei Joseph ga-longono bolo Archelaus guu-hai di king o Judea i-muli dono damana go Herod, geia guu-lliga huoloo di-hana gi-golo. Dimaadua ga-haga-modongoohia gi mee i-lodo di moe, gei mee gaa-hana gi Galilee,

2:23  gaa-noho i-lodo tama-waahale go Nazareth. Malaa, nia helekai soukohp la-guu-kila boloo, “Mee e-haga-ingoo bolo tangada o Nazareth.”