Kapingamarangi - Matthew - 20

20:1  “Teenua King o God di Langi e-hai gadoo be taane hai-hadagee ne-hana haga-luada-loo belee halahala ana daangada e-ngalua i dana hadagee-waini.

20:2  Mee ga-hagababa ang-gi digaula bolo ia gaa-hui-laa ginaadou gi-di hui donu ngalua, silber e-dahi i-di laangi e-dahi, mee ga-hagau digaula e-ngalua i-lodo dana hadagee-waini.

20:3  Di laa e-hiwa, gei mee gaa-hana labelaa gi-di gowaa huihui-mee, ga-gidee nia daangada nadau moomee ai.

20:4  Mee ga-helekai gi digaula, ‘Goodou hula labelaa ngalua i-lodo dagu hadagee-waini. Au gaa-hui-laa goodou gi-di hui dela e-donu.’

20:5  Digaula gaa-hula, gei mee gaa-hana labelaa di laa e-madangaholu maa-lua mo-di laa e-dolu, gaa-hai go dana hai lahua nogo hai luada.

20:6  Di laa e-lima, gei mee gaa-hana labelaa gi-di gowaa huihui-mee, ga-gidee-ia labelaa digau i-golo nadau moomee ai. Mee ga-heeu gi digaula, ‘Goodou e-nohonoho beleiaha di madagoaa waalooloo di-mee ne-hai ai?’

20:7  Digaula ga-helekai gi mee boloo, ‘Idimaa tangada e-haga-ngalua gimaadou ai.’ Gei mee ga-helekai gi digaula boloo, ‘Goodou hula labelaa ngalua i-lodo dagu hadagee-waini.’

20:8  “Ga-hiahi-ia di-mee, tangada dana hadagee ga-gahi-mai tagi o-di moomee gi-gahigahia-mai digau ngalua, huia digaula, daamada gi digau ala ne-ngalua muliagi ga-hagalawa gi digau ala ne-ngalua matagidagi.

20:9  Digau ala ne-daamada ne-ngalua di laa e-lima guu-hui, tangada e-dahi e-hui gi-di bahihadu-silber e-dahi.

20:10  Digau ala ne-daamada ne-ngalua mai luada le e-hagamaanadu bolo ginaadou gaa-hui damana i digau ala ne-ngalua muliagi, gei deeai, tangada e-dahi e-hui gi-di bahihadu-silber e-dahi.

20:11  Digaula ne-kumi nadau bahihadu, ga-helekai-tamu i tangada dana hadagee,

20:12  boloo, ‘Digau aanei ne-ngalua-hua i-di aawaa hua e-dahi, gei gimaadou gu-duadua i-di laangi dogomaalia i-di laa, gei goe ne-hui gimaadou be-di mee e-dahi.’

20:13  Tangada dana hadagee ga-helekai gi tangada e-dahi i digaula boloo, ‘Dogu ihoo hagaaloho-nei, au digi halahalau-ina goe. Gidaua guu-donu ngaadahi bolo ma di bahihadu-silber hua e-dahi i-di laangi e-dahi.

20:14  Kae-ina doo hui, hana gi doo hale. Deenei dogu hiihai belee hui digau ala ne-gahi-mai muliagi, gadoo be doo hui dela ne-gowadu gi-di-goe.

20:15  Au hagalee donu i dagu haga-hai-hegau agu bahihadu donu aanei gi dogu hiihai? Be goe e-dubua gi dogu dumaalia ne-hai?’ ”

20:16  Gei Jesus ga-helekai, “Digau ala muliagi, gaa-hula laa-mua, gei digau mugi-mua, gaa-hula laa-muli.”

20:17  Di madagoaa Jesus ne-hana gi Jerusalem, ge-Ia ga-haga-dagabuli-mai ana dama-agoago dilongoholu maa-lua gi-mada-ginaadou,

20:18  ga-helekai gi digaula, “Goodou hagalongo, gidaadou gaa-hula gi Jerusalem gi-di gowaa dela e-wanga-ai Tama-Tangada, gaa-lahi gi-baahi digau dagi hai-mee-dabu mono gau haga-donudonu haganoho, ga-hagi-aga, ga-daaligi gii-made.

20:19  Digaula gaa-wanga a-Mee gi digau tuadimee, e-hai ginai nadau tene gi-haga-mamaawa-ina, gi-daudau-ina gi-di loobuu, gei i-muli nia laangi e-dolu, gei Mee ga-hagamouli-aga!”

20:20  Di lodo Zebedee ne-hanimoi gi Jesus mo ana dama-daane dogolua, ga-dogoduli gi-mua o Jesus, gaa-dangi gi Mee.

20:21  Jesus ga-heeu, “Ma di-aha dela e-hiihai ginai goe?” Di ahina deelaa ga-helekai, “Meenei, heia dau hagababa mai gi-di-au, bolo Goe ga-haga-noho agu dama-daane dogolua aanei, e-dahi i do baahi gau-donu, gei e-dahi i do baahi gau-ihala i do madagoaa ma-gaa-king-iei Goe.”

20:22  Jesus ga-helekai gi-nia dama-daane aalaa, “Goolua e-de-iloo di-gulu mee dela e-tangi-ai. Goolua e-mee di-inu di ibu o di hagaduadua dela ga-inu-iei-Au?” Meemaa ga-helekai, “Gimaua e-mee.”

20:23  Jesus ga-helekai labelaa gi meemaa, “E-donu bolo goolua e-mee di-inu dagu ibu, gei au ogu donu ai e-hilihili be koai e-noho i dogu baahi gau-donu, be i dogu baahi gau-ihala, idimaa, go digau hua ala gu-hagatogomaalia go Tamana e-hai-mee gi-nia lohongo aalaa.”

20:24  Nia dama-agoago dilongoholu ne-longono-ginaadou, gu-hagawelewele huoloo gi tagahaanau deenei.

20:25  Jesus ga-gahi-mai digaula huogodoo gi-di gowaa e-dahi, ga-helekai gi digaula, “Goodou e-iloo bolo nia dagi o digau tuadimee e-mogobuna di-benebene digau o nadau henua, gei digau aamua e-dagi nia daangada.

20:26  Gei e-hagalee hai beenei i godou mehanga. Maa iai tangada i goodou bolo ia gi-aamua, geia gii-hai tangada hai-hegau ni goodou.

20:27  Maa iai tangada i goodou e-hiihai e-hai di tagi aamua, geia gii-hai di hege.

20:28  E-hai gadoo be Tama-Tangada dela ne-hanimoi, hagalee bolo nia daangada gi-hege-anga gi-de-Ia, gei e-hege gi-nia daangada, ge e-wanga dono mouli belee haga-dagaloaha digau dogologo.”

20:29  Di madagoaa Jesus mo ana dama-agoago ne-hagatanga i Jericho, digau dogologowaahee gu-daudali digaula.

20:30  Nia daane deegida dogolua e-noho i taalinga di ala, ga-longono bolo Jesus e-hanadu-laalaa, meemaa ga-daamada ga-wwolowwolo, “Meenei, Tama a David! Aloho-mai gi gimaua!”

20:31  Digau dogologo aalaa gaa-wwou gi meemaa gi-hudee hagalongoaa. Gei meemaa koia ne-wwolowwolo gi-nonua, “Meenei, Tama a David! Aloho-mai gi gimaua!”

20:32  Jesus gaa-duu, ga-gahigahi meemaa ga-heeu, “Ma di-aha dela e-hiihai ginai goolua bolo Au gi-heia-adu?”

20:33  Meemaa ga-helekai, “Meenei, gimaua e-hiihai bolo mau golomada gi-gidee labelaa!”

20:34  Jesus gu-aloho i meemaa, gaa-bili gi nau golomada, gei di madagoaa hua deelaa, ginaua gu-gidee, ga-daudali a Jesus.