Kapingamarangi - Matthew - 27

27:1  Luada-loo, nia dagi hai-mee-dabu huogodoo mo nia dagi mmaadua ne-haga-noho di-nadau hai belee daaligi a Jesus gii-made.

27:2  Digaula ga-lawalawa a-Mee, gaa-lahi e-gabunga go Pilate, di gobinaa o Rome.

27:3  Di madagoaa Judas dela ne-wanga a Jesus, ne-iloo-ia bolo Jesus gu-hagi-aga, gu-daaligi gii-made, gei mee gu-manawa-gee, guu-huli ono lodo i dana mee dela ne-hai, gaa-kae gi-muli nia bahihadu-silber e-motolu gi-nia dagi hai-mee-dabu mo nia dagi mmaadua,

27:4  ga-helekai, “Au gu-hai-hala i dagu wanga tangada ono hala ai e-daaligi gii-made!” Gei digaula ga-helekai, “E-de-hei-e-gimaadou! Ma di hala ni-oou!”

27:5  Judas gaa-kili nia bahihadu gi-lala i-lodo di Hale Daumaha, gaa-hana ga-daudau eia.

27:6  Nia dagi hai-mee-dabu ga-dahi-aga nia bahihadu, ga-helekai, “Nia bahihadu aanei la-guu-lawa di hui nia dodo o tangada. E-hagalee donu di wanga labelaa gi-lodo di gowaa benebene mee o-di Hale Daumaha.”

27:7  Nomuli, gei digaula gaa-hai di-nadau haganoho gi-nia bahihadu aalaa, gaa-hai bolo e-haga-hai-hegau e-hui di gowaa dela e-haga-ingoo boloo, “Di Gowaa Tangada Hai-pileed”, e-hai di waa-daalunga digau tuadimee.

27:8  Deenei di hai di gowaa deelaa e-haga-ingoo boloo, “Di Gowaa Dodo”, gaa-dae-mai-loo gi dangi-nei.

27:9  Malaa, nia helekai a soukohp Jeremiah guu-kila, ala ne-helekai: “Digaula ne-kae nia bahihadu-silber e-motolu dela di hulu digau Israel ne-donu ginai bolo e-hui a-Mee,

27:10  gei digaula gaa-hui “Di Gowaa Tangada Hai-pileed”, gadoo be nia helekai a God mai gi-di-au.”

27:11  Jesus e-duu i-mua di gobinaa o Rome dela e-hai ana heeu gi Mee, “Ma Koe go di king o Jew?” Jesus ga-helekai, “Kooe dela e-helekai.”

27:12  Gei Mee digi helekai i-nia hagahuaidu ala mai baahi nia dagi hai-mee-dabu mo nia dagi mmaadua.

27:13  Nomuli, gei Pilate ga-helekai, “Digaula e-helehelekai hagahuaidu Goe i-nia mee huaidu e-logo. Goe e-de-longono?”

27:14  Jesus digi helekai gi-di heeu a-maa, gei di gobinaa la-gu-goboina huoloo.

27:15  Nia madagoaa huogodoo ma-gaa-hai Tagamiami Pasoobaa, di gobinaa o Rome e-nnoo-mau e-hagamehede dahi dangada galabudi dela e-donu ginai digau dogologo.

27:16  Di madagoaa deelaa, tangada dono ingoo go Jesus Barabbas, koia e-iloo-ai nia daangada, i-lodo di hale-galabudi.

27:17  Pilate ga-heeu gi digau dogologo ala ne-dagabuli-mai boloo, “Koai i meemaa e-hiihai ginai goodou bolo au gi-hagamehede-ina adu gi goodou: Jesus Barabbas be go Jesus dela e-haga-ingoo bolo Mesaia?”

27:18  Mee e-iloo bolo digau o Jew ne-laha-mai a Jesus i-di nadau hagadugina-e-ginaadou a-Mee.

27:19  Di madagoaa Pilate nogo noho i-hongo dono lohongo hai-gabunga, di lodo o-maa ne-dau dana haga-iloo, “Hudee hai dau mee gi taane ono hala ai, idimaa, au gu-duadua huoloo i-dagu midi i-Mee anaboo.”

27:20  Nia dagi hai-mee-dabu mo nia dagi mmaadua gu-hagamahi ang-gi nia daangada dogologo bolo digaula gi-helekai gi Pilate gi-hagamehede-ina a Barabbas, gei gi-daaligidia Jesus gii-made.

27:21  Pilate ga-heeu gi digau dogologo aalaa, “Koai i meemaa e-hiihai ginai goodou bolo au gi-hagamehede-ina adu gi goodou?” Gei digaula ga-helekai, “Go Barabbas!”

27:22  Pilate ga-heeu gi digaula, “Malaa dehee dagu hai gaa-hai gi Jesus dela e-haga-ingoo bolo Mesaia?” Digau huogodoo ga-helekai maaloo, “Daudaulia a-mee gi-nua!”

27:23  Pilate ga-heeu labelaa, “Ma di hala behee dela ne-hai go Mee?” Gei digaula ga-daamada ga-wwolowwolo-loo gi-nua-loo, “Daudaulia a-Mee!”

27:24  Di madagoaa Pilate ne-gidee bolo ia gu-deemee di-dugu digaula, digaula e-mee-hua di-hai-baahi, gei mee ga-gaamai ana wai gaa-tono ono lima i-mua digau dogologo aalaa ga-helekai boloo, “Au hagalee dau gi-di made o taane deenei. Di mee deenei ni goodou ne-hai.”

27:25  Digau huogodoo aalaa guu-wwolo boloo, “Nia dodo o taane deenaa la-gi-duguina-mai gi gimaadou mo madau dama!”

27:26  Malaa, Pilate gu-hagamehede a Barabbas gi digaula, nomuli digaula gaa-lahi Jesus, ga-haga-mamaawa, ga-daudau a-Mee.

27:27  Digau dauwa a Pilate ne-lahi Jesus gi-lodo di hale di gobinaa, gei digau-dauwa huogodoo ga-haganiga a-Mee.

27:28  Digaula ga-hahaahi nia gahu o-Maa, ga-haga-ulu a-Mee gi-di gahu mmee-uli.

27:29  Nomuli gaa-hai di nadau hau manga laagau-duduia, gaa-wanga gi-hongo di libogo o-Maa, gaa-wanga labelaa di-nadau laagau gi-di lima gau-donu o-Maa ga-helekai bolo nia goloo o-di king. Nomuli, gei digaula ga-dogoduli gi-mua o Mee, ga-haganneennee a-Mee, “Di king o digau o Jew gi-mouli waalooloo!”

27:30  Digaula ga-buibui nadau haawale gi Mee, gaa-daa di laagau ga-haga-mamaawa di libogo o-Maa.

27:31  I-muli-hua di-nadau haganneennee a-Mee, digaula ga-daa gi-daha di gahu mmee-uli, ga-haga-ulu a-Mee gi ono gahu donu. Gei digaula gaa-lahi a-Mee gi-malaelae belee daudau.

27:32  Digaula ga-ulu gi-daha mo-di waahale, ga-heetugi gi taane mai Cyrene dono ingoo go Simon. Digau dauwa gaa-hono a-mee gi-aamo-ina di loobuu a Jesus.

27:33  Digaula gaa-dau i-di gowaa dela e-haga-ingoo bolo Golgotha dono hadinga boloo, “Di Gowaa Hangaibu-Libogo.”

27:34  Di madagoaa deelaa, digaula gaa-wanga gi Jesus nadau waini gu-unugi gi-nia mee-mmala. I-muli dana momi nia maa, gei Mee gu-de-hiihai di-inu.

27:35  Digaula ga-daudau a-Mee, nomuli ga-hudihudi nadau ‘dice’, e-duwwe nia gahu o-Maa i ginaadou.

27:36  Nomuli, digaula gaa-noho i-golo e-hagaloohi Jesus.

27:37  I-hongo di libogo o-Maa, nia helekai hagahuaidu a-Mee, e-hihi boloo, “Deenei go Jesus, di king digau o Jew.”

27:38  Digaula ne-daudau labelaa nia daangada dogolua gaiaa dalia Jesus, e-dahi i-di baahi gau-donu, ge dahi i-di baahi gau-ihala.

27:39  Nia daangada ma-ga-lloomoi laa-laa, e-lialiagi nadau libogo mo-di haganneennee a Jesus,

27:40  “Ma Goe bolo e-oho di Hale Daumaha, ga-haga-duu-aga labelaa i-muli nia laangi e-dolu, daawa-ina-laa goe gi-daha mo-di loobuu maa goe di Tama ni God! Doo-iha gi-daha mo-di loobuu!”

27:41  Go di hai la-hua, nia dagi hai-mee-dabu, mono gau haga-donudonu haganoho, mo nia dagi mmaadua, ga-gadagada haganneennee a-Mee ga-helekai,

27:42  “Mee ne-haga-dagaloaha-hua nia daangada, gei Mee e-deemee di-haga-dagaloaha e-Ia! Hagalee go Mee go di king o Israel? Maa nei bolo Mee ne-gaga-ia gi-daha mo-di loobuu dolomeenei, gei gidaadou ga-hagadonu-laa a-Mee!

27:43  Mee e-hagadonu a God, nogo helekai bolo Ia di Tama ni God. Malaa, dugu ang-gi God e-daa a-Mee gi-daha mo-di loobuu dolomeenei!”

27:44  Gei nia daangada huaidu ala ne-daudau dalia a-Mee, gu-helekai labelaa hagahuaidu i Mee.

27:45  Oodee, gei tenua hagatau la-gu-bouli, gaa-dae-loo gi-di laa e-dolu.

27:46  Ne-hoohoo gi-di laa e-dolu, gei Jesus gaa-dangi gi-nua, “Eli, Eli, Lema Sabaktani?” dono hadinga boloo, “Dogu God, dogu God, Goe e-diiagi Au eiaha?”

27:47  Hunu daangada nogo tuu i-golo ne-longono-ginaadou a-Mee, ga-helekai, “Mee e-gahigahi a Elijah!”

27:48  Tangada e-dahi i digaula gaa-lele hagalimalima, ga-dahi-aga dana liimi, ga-hagatiu gi-lodo nia waini hui-ngoohia, ga-daalo gi-di mada di laagau, ga-dahi-aga gi Mee gi-inumia.

27:49  Hunu gau ga-helekai, “Nnoo malaa, gii-mmada gidaadou be Elijah e-hanimoi e-hagamaamaa a-Mee!”

27:50  Jesus gaa-dangi labelaa gi-nua ga-hagaodi ono madangi.

27:51  Di gahu dela e-duuli i-lodo di Hale Daumaha gu-mahaa-lua, daamada eia i-nua, ga-tugi i-lala. Tenua gu-ngalungalua, nia hadu gu-mahaahaa,

27:52  nia daalunga gu-maahuge, gei nia daangada dogologo a God ala ne-mmade la-gu-mmouli-aga.

27:53  Digaula gu-diiagi nadau daalunga, gei i-muli-hua di mouli-aga Jesus, digaula guu-hula gi-lodo di Waahale-Hagamadagu go Jerusalem, gei digau dogologo guu-mmada gi digaula.

27:54  Di madagoaa di tagi-dauwa mono gau-dauwa ala nogo hagaloohi a Jesus, gaa-mmada gi tenua gu-ngalungalua mono mee huogodoo ala ne-hai, digaula gu-uli nadau gai huoloo, ga-helekai, “Ma e-donu-hua bolo Mee go Tama a God.”

27:55  Nia ahina dogologo nogo daudali Jesus mai i Galilee, nogo hagamaamaa a-Mee, digaula nogo mmada mai hagamogowaa.

27:56  Mary mai Magdala mo Mary tinana James mo Joseph mo tinana o-nia dama-daane a Zebedee nogo noho i-baahi nia ahina aalaa.

27:57  Hiahi-ia di mee, gei taane maluagina mai Arimathea gaa-dau i-golo, dono ingoo go Joseph. Mee nogo madalia nia dama-agoago a Jesus.

27:58  Mee gaa-hana gi Pilate ga-madau gi mee tuaidina o Jesus. Pilate ga-haga-iloo bolo tuaidina la-gii-wanga-ina gi Joseph.

27:59  Joseph gaa-kae tuaidina o-maa, gaa-didi gi-di gahu-lenge hoou,

27:60  gaa-dugu gi-lodo dana daalunga dogo hai-hua gi-lodo di hadugalaa hamaaloo. Gei mee ga-haga-daga-mai dana hadu damana e-pono di ngudu taalunga, gaa-hana.

27:61  Mary mai Magdala mo Mary dela i-golo, nogo noho i-golo, e-huli-adu gi taalunga.

27:62  Dono daiaa go di Laangi-Sabad, gei nia dagi hai-mee-dabu mono Pharisee ga-dagabuli gi-baahi o Pilate,

27:63  ga-helekai, “Meenei, gimaadou gu-langahia telekai taane kai-tilikai ne-hai i dono madagoaa nogo mouli-ai, boloo, ‘I-muli nia laangi e-dolu, gei Au ga-mouli-aga.’

27:64  Heia au helekai gi-hagaloohia taalunga, gaa-dae-loo gi-nia laangi e-dolu, gi-deemee di-lloomoi nia dama-agoago a-Maa, e-gaiaa tuaidina o-Maa, ga-helekai gi-nia daangada bolo Mee gu-mouli-aga i-di made. Di kai-tilikai muliagi deenei la-koia e-huaidu i-di kai-tilikai matagidagi.”

27:65  Pilate ga-helekai gi digaula boloo, “Lahia digau-dauwa aanaa, hagaloohia. Hula loohia taalunga i godou mee ala e-mee.”

27:66  Malaa, digaula gaa-hula, ga-haga-noho gii-mau di hadu, gaa-dugu di-nadau maaga gi-di hadu deelaa, gaa-dugu digau-dauwa e-hagaloohi.