Kapingamarangi - Matthew - 5

5:1  Jesus gaa-mmada gi tagabuulinga dangada deelaa, ge-Ia gaa-hana gi tomo di gonduu, gaa-noho gi-lala, ana dama-agoago ga-lloomoi gi-baahi o Mee,

5:2  gei Mee ga-daamada ga-agoago gi digaula:

5:3  “E-maluagina go digau ala bolo nadau hagataalunga le e-dee-dohu, idimaa digaula e-hai-henua gi Teenua King o God di Langi.

5:4  “E-maluagina go digau ala e-tangitangi lodo-huaidu, idimaa, God ga-haga-manawa lamalia-laa ginaadou.

5:5  “E-maluagina go digau ala e-manawa-hila-gi-lala, idimaa, ginaadou ga-hai-mee gi henuailala.

5:6  “E-maluagina go digau ala e-hagamahi huoloo e-haga-gila-aga di manawa o God, idimaa, God gaa-hai-laa ginaadou gii-dohu.

5:7  “E-maluagina go digau ala e-dumaalia ang-gi digau ala i-golo, idimaa, ginaadou gaa-kae tumaalia mai baahi o God.

5:8  “E-maluagina go digau ala e-madammaa nadau lodo, idimaa, ginaadou ga-gidee a God.

5:9  “E-maluagina go digau ala e-hagahumalia mehanga daangada, idimaa, God gaa-hai digaula nia dama donu ni-aana!

5:10  “E-maluagina go digau ala e-hagaduadua i-di nadau haga-gila-aga di manawa o God, idimaa, digaula e-hai-henua gi Teenua King o God di Langi.

5:11  “E-maluagina go goodou, maa nia daangada ga-helekai huaidu i goodou, ga-hagaduadua ge hagahuaidu goodou i-nia hagadilinga dilikai huaidu huogodoo, idimaa goodou nia daangada ni-aagu.

5:12  Goodou gi-manawa lamalia-hua mo-di tenetene, idimaa, di-godou hui i-di langi le e-damanaiee. Dela gadoo di-nadau hai dela nogo hagahuaidu nia soukohp ala i godou mua.

5:13  “Goodou go nia toolo o henuailala. Malaa, nia toolo ga-ono mmala ai, dehee di hai e-hai nia maa gii-mmala labelaa? Nia maa gu-balumee-hua, e-mee-hua di-kili gi-daha, ga-dagadagahi go nia daangada.

5:14  “Goodou go di haga-maalama o henuailala hagatau. Di waahale dela i-hongo di gonduu, e-deemee di-ngala.

5:15  Ma tangada e-dudu dana malama gaa-dugu gi-lala di boolo ai. Mee e-dugu di-maa gi-hongo dono lohongo-donu, e-inaina nia daangada huogodoo ala i-lodo di hale.

5:16  E-hai gadoo be goodou: godou maalama la-heia gi-maahina i-mua nia daangada gi-gidee-ginaadou godou hangahaihai humalia, gei digaula ga-hagaamu di-godou Damana dela i-di langi.

5:17  “Goodou hudee hai bolo Au ne-hanimoi belee daa gi-daha Nnaganoho Moses mo nia Agoago o-nia Soukohp. Au hagalee ne-hanimoi belee daa gi-daha nia maa, Au ne-hanimoi belee haga-kila-aga nia maa gii-dohu.

5:18  Au e-hagi-adu gi goodou di tonu bolo di madagoaa di langi mo henuailala e-noho-hua i-golo, deai di mee dulii-loo i-di gili nia haganoho aalaa e-hagalee ai, gaa-dae-loo gi-di haga-lawa o-nia mee huogodoo.

5:19  Tangada dela hagalee daudali taganoho e-dahi, ma e-aha maa taganoho koia e-dulii-loo i-lodo nia haganoho, ga-aago gi-nia daangada bolo gi-hudee daudalia, deelaa tangada e-koia i-mugi-lala-loo i Teenua King o God di Langi. Gei tangada dela ma-ga-daudali nnaganoho ge aago gi nia daangada bolo gi-heia beelaa, le e-hai tangada aamua i Teenua King o God di Langi.

5:20  Au e-hagi-adu gi goodou bolo goodou e-mee-hua di-ulu i Teenua King o God di Langi maa godou mouli hai-donu ga-llauehe laa-hongo di mouli o-nia Pharisee mo digau haga-donudonu haganoho.

5:21  “Goodou gu-longono di agoago dela guu-hai gi digau namua boloo: ‘Hudee daaligidia tangada gii-made. Tangada dela ma-ga-daaligi dana dangada gii-made, le e-lahi gi-di gowaa hai-gabunga.’

5:22  “Gei-Au e-hagi-adu gi goodou bolo tangada dela ma-ga-hagawelewele gi dono duaahina, le e-lahi gi-di gowaa hai-gabunga. Gei tangada dela ma-ga-helekai gi dono duaahina boloo: ‘Di balu-dangada!’ le e-lahi gi-di gowaa hai-gabunga-aamua. Gei tangada dela ma-ga-helekai gi tei ono duaahina, boloo, ‘Dadaulia!’ le e-kae dono hagaduadua i-lodo di ahi i-di gowaa hagaduadua.

5:23  Deenei-laa, do madagoaa ma-ga-tigidaumaha ang-gi God i-hongo di gowaa hai-tigidaumaha, gei goe ga-langahia bolo do duaahina i-golo e-huaidu-adu gi-di-goe,

5:24  dugua dau tigidaumaha i-mua di gowaa hai-tigidaumaha, hana hagahumalia-ina gulu mehanga i-mua, gaa-lawa, ga-hanimoi-laa, gaa-hai dau tigidaumaha ang-gi God.

5:25  Maa tangada bolo ia e-kae goe gi-di gowaa hai-gabunga, hagahumalia-ina gulu mehanga i-mua gi-dee lahi goe go mee gi-di gabunga, gei tangada hai-gabunga gaa-wanga goe gi-nia tinggee, ga-galabudi.

5:26  Au e-hagi-adu di tonu, goe ga-galabudi gaa-dae-loo gi doo hui oo hala huogodoo ala gu-haga-anga-adu gi-di-goe.

5:27  “Goodou gu-longono di agoago dela e-hai boloo: ‘Hudee mouli i-di mouli hai be-di manu.’

5:28  “Gei-Au e-hagi-adu gi goodou, tangada ma-gaa-mmada gi-di ahina ga-maanadu huaidu i-ono lodo, geia gu-ihala i-di mouli hai be-di manu i-lodo dono manawa.

5:29  Maa do golomada gau-donu e-hai goe gii-hala, gaabee gi-daha. Ma e-koia e-humalia i do huaidina dogomaalia dela gaa-hudu gi-lodo di ahi.

5:30  Maa doo lima gau-donu e-hai goe gii-hala, duudia gi-daha. Ma e-koia e-humalia i do huaidina dogomaalia dela gaa-hudu gi-lodo di ahi.

5:31  “Goodou gu-longono di agoago boloo: ‘Taane ma-gaa-hudu gi-daha dono lodo, geia e-hai gii-wanga gi dono lodo di beebaa hagadootonu o-di haga-maewae.’

5:32  “Gei Au e-hagi-adu gi goodou, tangada ma-gaa-hudu gi-daha dono lodo i nnadinga i-daha mo-di mouli hai be-di manu o dono lodo, gei taane deelaa la-gu-ihala guu-hai di ahina deelaa gii-hai di hala o-di hai be-di manu maa di ahina deelaa la-guu-hai labelaa dono lodo. Gei taane ma-gaa-hai dono lodo gi-di ahina dela ne-hudu gi-daha, mee guu-hai labelaa di hala o-di hai be-di manu.

5:33  “Goodou gu-longono labelaa bolo ma-guu-lawa di helekai gi digau namua loo boloo: ‘Hudee ohaa dau hagababa ang-gi God, gi-hagagila-aga-ina au mee ala ne-hagamodu ang-gi Dimaadua bolo e-hai kooe.’

5:34  “Gei Au e-hagi-adu gi goodou dolomeenei bolo hudee hai loo hagamodu. Goodou hudee hai hagamodu gi-di langi, idimaa, di langi la-di lohongo-king ni God.

5:35  Hudee hai hagamodu gi henuailala, idimaa, ma-di gowaa e-hagamolooloo-ai ono babaawae. Hudee hai hagamodu gi Jerusalem, idimaa, ma di waahale damana ni-di King Aamua.

5:36  Hudee hai hagamodu gi godou libogo, idimaa, goodou e-deemee di-hai di ngaahulu e-dahi i godou libogo gii-kene be gi-luuli.

5:37  Goodou gi-helekai-hua boloo: ‘Uaa’ be ‘Deeai’, idimaa, nia mee ala i-tua nia mee aanei, la-ne-lloomoi i-baahi tangada huaidu.

5:38  “Goodou gu-longono di agoago boloo: ‘Di golomada le e-hui gi-di golomada, gei di niha le e-hui gi-di niha.’

5:39  “Gei Au e-hagi-adu gi goodou bolo hudee hai-hui gi tangada dela ma-gaa-hai dana huaidu adu gi goodou. Maa tangada gaa-paa do gauwae gau-donu, gei goe huluhia di baahi dela i-golo gi mee.

5:40  Maa tangada gaa-lahi goe gi-di gowaa hai-gabunga belee daa doo gahu uluulu, gei goe wanga-ina labelaa gi mee doo gahu mahaa.

5:41  Maa tangada gaa-hono goe gi-kae-ina dana budehede-goloo i-di maele e-dahi, gei goe hana i-muli o mee i-nia maele e-lua.

5:42  Maa tangada ga-dangi-adu gi-di-goe i dahi mee, gei goe wanga-ina. Gei maa tangada ga-madau dana mee bolo ga-gowadu-laa nomuli, gei goe gi-dumaalia gi mee.

5:43  “Goodou gu-longono di agoago boloo: ‘Goe gi-aloho i tangada dela i do baahi, gei gi-hagadugina i do hagadaumee.’

5:44  “Gei-Au e-hagi-adu gi goodou bolo gi-aaloho i godou hagadaumee, gei gi-dalodalo i digau ala e-hagahuaidu goodou,

5:45  gii-hai goodou nia dama ni Tamana dela i-di langi, dela e-haga-hobo dana laa gi-hongo digau huaidu mo digau humalia, gei e-haga-doo dana uwa gi-hongo digau ala e-hai nia mee humalia mo digau ala e-hai nia mee huaidu.

5:46  Maa goodou e-aaloho-hua i digau ala e-aaloho i goodou, malaa, God e-hagahumalia goodou behee? Digau hagabudu dagitedi le e-hai labelaa beenei!

5:47  Maa goodou ga-manawa humalia-hua gi godou duaahina, di hai-geegee behee ang-gi digau ala i-golo, digau tuadimee le e-hai labelaa beenei!

5:48  Malaa, godou mouli la-heia gii-dohu dogomaalia, gii-hai be di-godou Damana di langi dela e-dohu i-nia mee huogodoo.