TpiKJPB - Numbers - 27

27:1  ¶ Nau ol pikinini meri bilong Selofehat, pikinini man bilong Hefer, pikinini man bilong Gileat, pikinini man bilong Makir, pikinini man bilong Manasa, bilong ol famili bilong Manasa, pikinini man bilong Josep, i kam. Na ol dispela em ol nem bilong ol pikinini meri bilong em, Mala, Noa, na Hokla, na Milka, na Tirsa.

27:2  Na ol i sanap long ai bilong Moses, na long ai bilong pris Eleasar, na long ai bilong ol hetman na olgeta bung bilong ol manmeri, klostu long dua bilong haus sel holi bilong bung bilong ol manmeri, i spik,

27:3  Papa bilong mipela i dai pinis long ples i no gat man, na em i no stap insait long lain bilong ol husat i bungim ol yet wantaim i birua long BIKPELA insait long lain bilong Kora. Tasol em i dai pinis long sin bilong em yet, na em i no gat ol pikinini man.

27:4  Bilong wanem nem bilong papa bilong mipela i mas go pinis long namel bilong famili bilong em, bikos em i no gat wanpela pikinini man? Olsem na givim long mipela wanpela holimpas namel long ol brata bilong papa bilong mipela.

27:5  Na Moses i bringim wari bilong ol long ai bilong BIKPELA.

27:6  Na BIKPELA i tokim Moses, i spik,

27:7  Toktok bilong ol pikinini meri bilong Selofehat i stretpela. Tru tumas, yu bai givim ol wanpela holimpas bilong wanpela samting papa i givim pikinini namel long ol brata bilong papa bilong ol. Na yu bai mekim samting papa i givim pikinini bilong papa bilong ol i go long ol.

27:8  Na yu bai toktok long ol pikinini bilong Isrel, i spik, Sapos wanpela man i dai, na i no gat pikinini man, orait yupela bai mekim samting papa i givim pikinini bilong em i go long pikinini meri bilong em.

27:9  Na sapos em i no gat pikinini meri, orait yupela bai givim samting papa i givim pikinini bilong em i go long ol brata bilong em.

27:10  Na sapos em i no gat ol brata, orait yupela bai givim samting papa i givim pikinini bilong em i go long ol brata bilong papa bilong em.

27:11  Na sapos papa bilong em i no gat ol brata, orait yupela bai givim samting papa i givim pikinini bilong em i go long kandre bilong em husat i klostu stret long em bilong famili bilong em, na em bai holimpas dispela. Na em bai stap bilong ol pikinini bilong Isrel wanpela lo ol i raitim bilong kot, olsem BIKPELA i tok strong long Moses.

27:12  ¶ Na BIKPELA i tokim Moses, Kisim yu yet i go antap long dispela maunten Abarim, na lukim dispela hap Mi bin givim long ol pikinini bilong Isrel.

27:13  Na taim yu bin lukim dispela, yu tu bai Mi bungim i go long ol lain bilong yu, olsem Mi bungim Eron, brata bilong yu.

27:14  Long wanem, yutupela i bikhet i birua long tok strong bilong Mi long ples i no gat man Sin, long strongpela pait bilong bung bilong ol manmeri, long mekim Mi kamap holi long dispela wara long ai bilong ol ai bilong ol. Dispela em i wara bilong Meriba, long Kedes, long ples i no gat man bilong Sin.

27:15  ¶ Na Moses i tokim BIKPELA, i spik,

27:16  Larim BIKPELA, God bilong ol spirit bilong olgeta bodi, putim wanpela man long bosim bung bilong ol manmeri,

27:17  Husat i ken go ausait paslain long ol, na husat i ken kam insait paslain long ol, na husat i ken stiaim ol ausait, na husat i ken bringim ol insait, inap long bung bilong ol manmeri bilong BIKPELA i no ken stap olsem ol sipsip husat i no gat wasman bilong sipsip.

27:18  Na BIKPELA i tokim Moses, Yu kisim Josua, pikinini man bilong Nun, wanpela man insait long husat dispela spirit i stap, na slipim han bilong yu antap long em.

27:19  Na putim em long ai bilong pris Eleasar, na long ai bilong olgeta bung bilong ol manmeri. Na givim em wanpela wok long ai bilong ol.

27:20  Na yu bai putim sampela ona bilong yu antap long em, inap long olgeta bung bilong ol manmeri bilong ol pikinini bilong Isrel i ken bihainim tok.

27:21  Na em bai sanap long ai bilong pris Eleasar, husat bai askim tok helpim bilong helpim em i bihainim kot bilong Yurim long ai bilong BIKPELA. Long tok bilong em ol bai go ausait, na long tok bilong em ol bai kam insait, em, na olgeta pikinini bilong Isrel wantaim em wantaim, yes, olgeta bung bilong ol manmeri.

27:22  Na Moses i mekim olsem BIKPELA i tok strong long em. Na em i kisim Joshua, na putim em long ai bilong pris Eleasar, na long ai bilong olgeta bung bilong ol manmeri.

27:23  Na em i slipim tupela han bilong em antap long em, na givim em wanpela wok, olsem BIKPELA i tok strong long han bilong Moses.