TpiKJPB - Numbers - 8

8:1  ¶ Na BIKPELA i tokim Moses, i spik,

8:2  Toktok long Eron, na tokim em, Taim yu laitim ol lam, dispela sevenpela lam bai givim lait i pas klostu long stik kandel.

8:3  Na Eron i mekim olsem. Em i laitim ol lam bilong en i pas klostu long stik kandel, olsem BIKPELA i tok strong long Moses.

8:4  Na dispela wok bilong stik kandel em i bilong gol ol i paitim, i go long pos bilong en, i go long ol plaua bilong en, em i wok ol i paitim. Bilong bihainim dispela piksa BIKPELA bin soim Moses, olsem tasol em i wokim stik kandel.

8:5  ¶ Na BIKPELA i tokim Moses, i spik,

8:6  Kisim ol lain Livai long namel long ol pikinini bilong Isrel, na klinim ol.

8:7  Na olsem bai yu mekim long ol, bilong klinim ol. Tromoi isi isi wara bilong klinim tru antap long ol, na larim ol i sevim olgeta bodi bilong ol, na larim ol wasim ol klos bilong ol, na olsem tasol mekim ol yet i klin.

8:8  Nau larim ol i kisim wanpela yangpela bulmakau man wantaim ofa bilong kaikai bilong en, yes, naispela plaua i abusim wantaim wel, na narapela yangpela bulmakau man bai yu kisim bilong wanpela ofa bilong sin.

8:9  Na yu bai bringim ol lain Livai long ai bilong haus sel holi bilong bung bilong ol manmeri. Na yu bai bungim olgeta bung bilong ol pikinini bilong Isrel wantaim.

8:10  Na yu bai bringim ol lain Livai long ai bilong BIKPELA. Na ol pikinini bilong Isrel bai putim ol han bilong ol antap long ol lain Livai.

8:11  Na Eron bai ofaim ol lain Livai long ai bilong BIKPELA bilong wanpela ofa bilong ol pikinini bilong Isrel, inap long ol i ken mekim wok bilong wok wokboi bilong BIKPELA.

8:12  Na ol lain Livai bai slipim ol han bilong ol antap long ol het bilong ol bulmakau man. Na yu bai ofaim wanpela bilong wanpela ofa bilong sin, na arapela bilong wanpela ofa i kuk olgeta, i go long BIKPELA, long wokim wanpela karamapim long mekim i kamap wanbel bilong ol lain Livai.

8:13  Na yu bai putim ol lain Livai long ai bilong Eron, na long ai bilong ol pikinini man bilong em, na ofaim ol bilong wanpela ofa i go long BIKPELA.

8:14  Olsem tasol bai yu brukim ol lain Livai long namel long ol pikinini bilong Isrel. Na ol lain Livai bai bilong Mi.

8:15  Na bihain long dispela bai ol lain Livai i go insait long mekim wok wokboi bilong haus sel holi bilong bung bilong ol manmeri. Na yu bai klinim ol, na ofaim ol bilong wanpela ofa.

8:16  Long wanem, yupela i givim ol i go long Mi olgeta long namel long ol pikinini bilong Isrel. Long kisim ples bilong ol kain lain i opim bel bilong olgeta wan wan mama, yes, long kisim ples bilong ol namba wan pikinini bilong ol pikinini bilong Isrel, Mi bin kisim ol i go long Mi.

8:17  Long wanem, olgeta namba wan pikinini bilong ol pikinini bilong Isrel em i bilong Mi, man na animal wantaim. Long dispela de Mi paitim olgeta wan wan namba wan pikinini long hap bilong Isip, Mi mekim ol holi long Mi Yet.

8:18  Na Mi bin kisim ol lain Livai bilong senisim olgeta namba wan pikinini bilong ol pikinini Isrel.

8:19  Na Mi bin givim ol lain Livai olsem wanpela presen long Eron na long ol pikinini man bilong em long namel long ol pikinini bilong Isrel, long wokim wok wokboi bilong ol pikinini bilong Israel insait long haus sel holi bilong bung bilong ol manmeri, na long wokim wanpela karamapim long mekim i kamap wanbel bilong ol pikinini bilong Isrel, inap long bai i no gat sik nogut namel long ol pikinini bilong Isrel, taim ol pikinini bilong Isrel i kam klostu long rum holi.

8:20  Na Moses, na Eron, na olgeta bung bilong ol manmeri bilong ol pikinini bilong Isrel, i mekim long ol lain Livai bilong bihainim olgeta samting BIKPELA i tok strong long Moses long sait bilong ol lain Livai. Olsem tasol ol pikinini bilong Isrel i mekim long ol.

8:21  Na ol i klinim ol lain Livai, na ol i wasim ol klos bilong ol. Na Eron i ofaim ol olsem wanpela ofa long ai bilong BIKPELA. Na Eron i wokim wanpela karamapim long mekim i kamap wanbel bilong ol long klinim ol.

8:22  Na bihain long dispela ol lain Livai i go insait long wokim wok wokboi bilong ol insait long haus sel holi bilong bung bilong ol manmeri long ai bilong Eron, na long ai bilong ol pikinini man bilong em. Olsem BIKPELA bin tok strong long Moses long sait bilong ol lain Livai, olsem tasol ol i mekim long ol.

8:23  Na BIKPELA i tokim Moses, i spik,

8:24  Dispela em i dispela samting i bilong ol lain Livai. I stat long 25 krismas na i go antap ol bai go insait long wet long wok wokboi bilong haus sel holi bilong bung bilong ol manmeri.

8:25  Na i stat long 50 krismas ol bai lusim wok bilong wet long wok wokboi bilong en, na ol bai i no inap wokim wok wokboi moa.

8:26  Tasol ol bai wokim wok wantaim ol brata bilong ol insait long haus sel holi bilong bung bilong ol manmeri, long holimpas wok, na ol bai i no inap wokim wok wokboi. Olsem tasol bai yu mekim long ol lain Livai long sait bilong wok bilong ol.