Kekchi - Obadiah - 1

1:1  Aˈan aˈin li quicˈutbesi̱c chiru laj Abdías saˈ li visión xban li Dios chirixeb laj Edom: Xkabi resil li quixye li Ka̱cuaˈ. Jun li takl co̱ saˈ eb li jalan tenamit chixyebal reheb: —Cauresihomak e̱rib ut yo̱keb chi pletic riqˈuineb laj Edom.

1:2  Li Ka̱cuaˈ Dios quixye reheb laj Edom li ralal xcˈajol laj Esaú: —La̱in tincuisi le̱ cuanquil chiruheb li jalan tenamit. Ut tzˈekta̱nanbilakex chic xbaneb.

1:3  Xebalakˈi e̱rib e̱junes xban le̱ kˈetkˈetil. Xeyi̱b le̱ naˈaj toj saˈ xbe̱n li tzu̱l saˈ xya̱nkeb li ni̱nki pec ut nequeye saˈ e̱chˈo̱l, ¿Ani ta biˈ ta̱ru̱k ta̱taˈok ke arin? Arin ma̱ ani ta̱numta̱k saˈ kabe̱n, chanquex.

1:4  Usta nequeyi̱b le̱ naˈaj toj takecˈ joˈ nak naxyi̱b xsoc li cˈuch, abanan toj aran texintau chak. Ut usta te̱yi̱b le̱ naˈaj toj saˈ xya̱nkeb li chahim, abanan toj aran texincubsi chak, chan li Ka̱cuaˈ.

1:5  Li Ka̱cuaˈ quixye: —Us raj chokˈ e̱re nak aj e̱lkˈ ta teˈcha̱lk chiru kˈojyi̱n chi elkˈa̱c e̱riqˈuin. Teˈxcˈam raj caˈaj cuiˈ li joˈ qˈuial teˈraj. Ut cui teˈxsicˈ li ru li uvas, ¿ma incˈaˈ ta biˈ teˈxcanab raj caˈchˈinak chic e̱re? Abanan, eb li xicˈ nequeˈiloc e̱re, teˈcha̱lk ut teˈxsach e̱ru chi junaj cua.

1:6  Chixjunil ta̱makˈekˈ che̱ru la̱ex li ralal xcˈajol laj Esaú. Usta mukmu̱k raj e̱ban li kˈaxal lokˈ che̱ru, abanan teˈxsicˈ toj retal teˈxcˈam che̱ru chixjunil.

1:7  Eb li xni̱nkal ru tenamit li queˈtenkˈan e̱re junxil, xicˈ chic texril ut aˈaneb ajcuiˈ teˈisi̱nk e̱re saˈ le̱ tenamit. Le̱ rami̱g li nequeˈcuaˈac e̱riqˈuin, xicˈ chic texril. Cˈojcˈo raj e̱chˈo̱l riqˈuineb, abanan aˈaneb ajcuiˈ teˈqˈuehok li raˈal re nak texchapekˈ chi incˈaˈ te̱qˈue retal.

1:8  Li Ka̱cuaˈ quixye: —Nak tebinqˈue chixtojbal rix lix ma̱queb laj Edom, tinsach ruheb li cuanqueb xnaˈleb saˈ xya̱nkeb aˈan. La̱in tinsach ruheb laj qˈuehol naˈleb li cuanqueb saˈ li tzu̱l saˈ lix naˈajeb li ralal xcˈajol laj Esaú.

1:9  Sicsotkeb xbaneb xxiu li cauheb rib chi pletic saˈ li tenamit Temán. Ut telajeˈsachekˈ ruheb chixjunileb li cuanqueb saˈ li tzu̱l saˈ lix naˈajeb li ralal xcˈajol laj Esaú.

1:10  La̱ex aj Edom, ralal xcˈajolex laj Esaú, ta̱cˈutekˈ e̱xuta̱n ut texsachekˈ chi junaj cua xban li ma̱usilal li queba̱nu reheb li ralal xcˈajol laj Jacob, li ri̱tzˈin le̱ xeˈto̱nil yucuaˈ.

1:11  Li queˈchal saˈ jalan tenamit, li xicˈ nequeˈiloc reheb, queˈxtˈan li oqueba̱l re li tenamit Jerusalén ut queˈnumta saˈ xbe̱neb. La̱ex cuanquex aran ut ma̱cˈaˈ queba̱nu re xtenkˈanquileb laj Judá. Chanchan ajcuiˈ la̱ex jun saˈ xya̱nkeb li xicˈ nequeˈiloc reheb xban nak incˈaˈ quetenkˈaheb nak queˈmakˈeˈ chiruheb li cˈaˈru cuan reheb.

1:12  Incˈaˈ raj xsahoˈ e̱chˈo̱l saˈ li cutan nak li ralal xcˈajol li ri̱tzˈin le̱ xeˈto̱nil yucuaˈ yo̱queb chixcˈulbal li raylal. Incˈaˈ raj xsahoˈ saˈ e̱chˈo̱l chirilbaleb laj Judá nak queˈrahobtesi̱c. Ut incˈaˈ raj xehobeb nak xeˈnumta li xicˈ nequeˈiloc reheb saˈ xbe̱neb.

1:13  Incˈaˈ raj xex-oc Jerusalén saˈ xtenamiteb li cualal incˈajol saˈ eb li cutan nak yo̱queb chixcˈulbal li raylal. Incˈaˈ raj xsahoˈ saˈ e̱chˈo̱l nak queˈsacheˈ. Ut incˈaˈ raj xerelkˈa li cˈaˈruheb re nak xeˈxcˈul li raylal.

1:14  Incˈaˈ raj xexakab e̱rib saˈ xala be chixrambaleb li yo̱queb chi e̱lelic. Ut incˈaˈ raj xecamsiheb. Incˈaˈ raj xechapeb li queˈcana ut incˈaˈ raj xekˈaxtesiheb cuiˈchic saˈ rukˈeb li xicˈ nequeˈiloc reheb saˈ li cutan nak yo̱queb chixcˈulbal li raylal.

1:15  Joˈ xeba̱nu reheb laj Judá, joˈcan ajcuiˈ te̱cˈul la̱ex. La̱ex te̱cˈul le̱ kˈajca̱munquil. Cuulac re xkˈehil nak la̱in li Ka̱cuaˈ tinrakok a̱tin saˈ xbe̱neb chixjunileb li jalanil tenamit. Ut tinrakok ajcuiˈ a̱tin saˈ e̱be̱n la̱ex.

1:16  Joˈ nak xerecˈa xcˈahil li rahobtesi̱c la̱ex saˈ lin tzu̱l Sión, joˈcan ajcuiˈ nak teˈrecˈa xcˈahil li rahobtesi̱c chixjunileb li tenamit toj retal teˈosokˈ.

1:17  Abanan eb li cuanqueb saˈ li tzu̱l Sión teˈcolekˈ. Ut teˈsantobresi̱k. Ut eb li ralal xcˈajol laj Jacob teˈre̱chani cuiˈchic lix naˈajeb.

1:18  Eb li ralal xcˈajol laj Jacob chanchanakeb li xam. Eb li ralal xcˈajol laj José chanchanakeb li rakˈ xam. Ut eb li ralal xcˈajol laj Esaú chanchan nak nacˈat li qˈuim nak teˈosokˈ. Teˈsachekˈ ruheb chi junaj cua li ralal xcˈajol laj Esaú. Ma̱ jun saˈ xya̱nkeb teˈcolekˈ. La̱in li Ka̱cuaˈ xinyehoc re aˈin.

1:19  Eb laj Israel li cuanqueb aran Neguev, aˈaneb li teˈe̱chani̱nk re li tzu̱l saˈ lix naˈajeb laj Esaú. Ut eb laj Israel li cuanqueb saˈ li ru takˈa Sefela, aˈaneb li teˈe̱chani̱nk re lix chˈochˈeb laj filisteo. Ut aˈaneb ajcuiˈ li teˈe̱chani̱nk re lix chˈochˈeb laj Efraín ut lix chˈochˈeb laj Samaria. Ut eb li ralal xcˈajol laj Benjamín, aˈaneb li teˈe̱chani̱nk re li naˈajej Galaad.

1:20  Eb laj Israel li queˈchapeˈ ut queˈcˈameˈ chi najt, aˈaneb li teˈe̱chani̱nk re lix chˈochˈeb laj cananeo. Ta̱cuulak toj saˈ li tenamit Sarepta. Ut eb laj Jerusalén li queˈchapeˈ, li cuanqueb aran Sefarad, aˈaneb li teˈe̱chani̱nk reheb li tenamit li cuanqueb Neguev.

1:21  Ut eb laj Israel li queˈnumta saˈ xbe̱neb laj Edom teˈxic saˈ li tzu̱l Sión chi takla̱nc saˈ xbe̱neb li cuanqueb saˈ xya̱nkeb li tzu̱l saˈ lix chˈochˈ laj Esaú. Ut li Ka̱cuaˈ, aˈan ta̱cua̱nk xcuanquil saˈ xbe̱neb.