LinVB - Obadiah - 1

1:1  Limoni lya Abdia litali Edom. Nayoki nsango euti epai ya Yawe, atindi ntoma o bikolo bisusu, abelela : « Toteleme ! Tokende kobundisa ekolo ena ! » Mokonzi Yawe akaneli Edom :

1:2  Nakokomisa yo moke o kati ya bikolo, bakomonela yo mpe bakokinola yo mpenza !

1:3  Lofundo la yo lobungisi yo motema, yo moto ofandi o mibenga o ntei ya mabanga mpe o ngomba, omilobeli o motema ’te : « Nani akoki kokweisa ngai ? »

1:4  Kasi Yawe alobi na yo : « Ata opimbwi likolo mpenza lokola engondo, ata okei kotia zumbu lya yo o kati ya minzoto, nakobwaka yo o nse ! »

1:5  Soko bayibi banene to bake bayei koyibela yo na butu, bakobotolo yo biloko te biye bikoki na bango ? Soko babuki mbuma ya vino bayei kokotela yo, bakotikela yo mwa mbuma ya vino te ? Tala boniboni basiliseli yo biloko !

1:6  Tala boniboni babotoli Ezau biloko na nkita eye abombaki !

1:7  Babengani yo kin’o ndelo ya mokili mwa yo, bato banso bandimaki yo, bakosi yo ! Baye bayokanaki na yo, basuli yo ! Baye bazalaki kolia mampa ma yo, batieli yo mitambo, balobi : « Tala, mayele masileli ye. »

1:8  Yawe alobi : Ya solo, mokolo mona nakolongola bato ba bwanya o Edom, nakosilisa mayele manso o ngo­mba ya Ezau !

1:9  E Teman, bilombe ba yo bakolembe na bitumba, bongo o ngomba ya Ezau moto moko akobika te.

1:10  Zambi obomi mpe obundisi ba­ndeko ba yo, ba-Yakob, okotonda na nsoni mpe okolimwa seko !

1:11  Mokolo otelemeki mpembeni, ntango bauta bayaki kosilisa nkita ya ye inso, mokolo basenzi bayingelaki o Yeruzalem mpe bakabolaki biloko na bobeti zeke, osalaki lokola moko wa bango !

1:12  Osepela te na bomoni ndenge mpasi ekweli ndeko wa yo ! Oyoka esengo te mpo ya bana ba Yuda bazali na mpasi, ntango makambo manso mabebeli bango ! Oloba maloba ma lofundo te mokolo bakomi na mpasi enene !

1:13  Oyingela o engumba ya bato ba ngai te, mokolo mpasi ekweli bango ! Osepela mpasi ya bango soki te, mokolo mpasi ekweli bango. Omeka kokamata nkita ya bango te, mokolo mpasi ekweli bango !

1:14  Okende koteleme te o bisika nzela ikutani, mpo oboma baye bakimi ! Baye batikali, okaba bango te mokolo balingi komibikisa !

1:15  Mokolo mwa Yawe mobelemi, mokolo mpasi ekokwela bikolo binso ! Bakosala yo se lokola yo osalaki baninga : mabe masalaki yo makokwela yo.

1:16  Lokola bino bomeleki nkeni ya nkanda ya ngai o ngomba esantu, bato ba bikolo bisusu mpe bakomele, kopema te ; bakomele, bakotonda mpe bakolangwa, bakozala lokola bato babotamaki te !

1:17  Kasi o ngomba Sion ndambo ya bato bakobika, Sion ekozala lisusu esika ya bosantu. Bato ba Yakob bakozwa lisusu biloko biye babotoloki bango liboso !

1:18  Libota lya Yakob likozala lokola móto, libota lya Yozefu lokola mololi, libota lya Ezau lokola matiti makatani. Móto Yakob na Yozefu bakopelisa mokosilisa libota lya Ezau, moto moko te akobika. Yawe alobi bongo !

1:19  Bakokamata mokili mwa Negeb na ngomba ya Ezau, bisobe penepene na mbu, mokili mwa ba-Filisti ; bakokamata mokili mwa Efraim mpe mwa Samaria ; bato ba Benyamin bakokamata mo­kili mwa Galaad.

1:20  Basoda ba Israel baye bakendeki o boombo bakobengana ba-Kanana kin’o Sarepta. Bato ba Yeruzalem baye bakangemaki baombo o Sefarad bakokamata bingumba bya Negeb.

1:21  Baye balongi etumba bakobuta ngo­mba Sion mpo ya kosambisa bato ba ngo­mba Ezau. Yawe akozala Mokonzi !