Azeri - I Samuel - 1

1:1  اِفرايئمئن داغليق بؤلگه‌سئنده يِرلَشَن رامه‌ته‌يئم‌صوفئم شهرئنده اِلقانا آدلي بئر آدام ياشاييردي؛ او صوف اوغلو توخو اوغلو اِلئهو اوغلو يِروخام اوغلو بئر اِفرايئملي ائدي.

1:2  اِلقانانين خَنّا و پِنئنّا آديندا ائکي آروادي وار ائدي. پِنئنّانين اوشاقلاري وار ائدي، آمّا خَنّانين اؤولادي يوخ ائدي.

1:3  اِلقانا هر ائل اؤز شهرئندن شئلوها گِدَردي کی، قوشونلار ربّئنه پرستئش ادئب قوربان کَسسئن. عِلي‌نئن خوفني و پئنخاس آدلي ائکي اوغلو اورادا ربّئن کاهئنلري ائدئلر.

1:4  اِلقانا قوربان کسئلن گون آروادي پِنئنّايا، و اونون اوغوللار و قيزلارينين هاميسينا پاي ورَردي.

1:5  لاکئن خَنّايا ائکي قات پاي ورَردي، چونکي اونو سِوئردي، آمّا رب اونون بطنئني باغلاميشدي.

1:6  گونوسو پِنئنّا همئشه خَنّايا ساتاشيردي کي، اونو ائنجئتسئن. چونکي خَنّانين بطني رب طرفئندن باغلانميشدي.

1:7  بو، ائللر بله داوام ادئردي. خَنّا هر دفه ربّئن اِوئنه گِدنده، گونوسو اونا سؤز آتاردي؛ خَنّا دا آغلاييب يمک يِمَزدي.

1:8  بئر گون اَري اِلقانا اوندان سوروشدو: "خَنّا، نئيه آغلاييرسان؟ نئيه يمک يمئرسن؟ آخي اوره‌يئن نئيه قوصّه‌لي‌دئر؟ مگر من سنه اون اوغولدان دا آرتيق ديئلم؟"

1:9  اونلار شئلودا يِيئب-ائچَندن سونرا خَنّا آياغا قالخدي. کاهئن عِلي ربّئن معبدئنئن قاپي آستاناسينين يانينداکي کورسوده اوتورموشدو.

1:10  خَنّا اورَک يانيغي ائله ربّه دوعا ادئب آجي-آجي آغلادي.

1:11  ربّه نذر ادئب ددي: "ای قوشونلارين ربّي، اگر اؤز کنئزئنئن ذلئل‌لئيئني گؤره‌سن، منی يادا ساليب، ياددان چيخارتماياسان، منه بئر اوغول وره‌سن، من ده اونون بوتون حيات گونلرئني سنه وقف ادئب، قويمارام کي، اونون باشينا اولگوج دَيسئن."

1:12  خَنّا ربّئن حوضوروندا دوعاسينا داوام ورَرکَن، عِلي اونون آغزينا باخيردي.

1:13  خَنّا قلبئنده يالوارديغي اوچون فقط دوداقلاري تَرپه‌نئردي، سَسي اشئدئلمئردي. اونا گؤره ده، عِلي اله گومان اتدي کي، او، کفلئدئر.

1:14  عِلي اونا ددي: "نه واختا قدر کفلئلئک اده‌جکسن؟ بسدئر، آت بو شرابي."

1:15  لاکئن خَنّا جاوابيندا ددي: "خير، آغام، من نه شراب ائچمئشم، نه ده کفلَندئرئجي آيري بئر ائچکي. روحونو قَم باسميش بئر آروادام کي، اوره‌يئمي آنجاق ربّئن حوضوروندا بوشالديرام.

1:16  کنئزئني ياراماز آرواد سانما. بو يالواريشيم، ائندئيه‌جک چکدئيئم بؤيوک اورَک يوکو و اذئيّته گؤره‌دئر."

1:17  عِلي جاواب ورئب ددي: "سالامات گت، قوي ائسرايئلئن تاريسي سني مورادينا چاتديرسين!"

1:18  خَنّا ددي: "قوي کنئزئن سنئن گؤزونده لوطف تاپسين." بلجه آرواد يولو ائله گتدي و يمک يدي. آرتيق سئماسي قَملي ديئلدي.

1:19  او گونون صاباحي اونلار سحر تزدن قالخيب ربّئن حوضوروندا پرستئش اتدئلر و گئنه راماداکي اِولرئنه قاييتديلار. اِلقانا آروادي خَنّا ائله ياخينليق اتدي و رب خَنّاني يادا سالدي.

1:20  واخت کچدي، خَنّا بويلو اولوب بئر اوغول دوغدو. "اونو ربدن آرزو اتدئم" ديئب آديني سمويئل قويدو.

1:21  سونرا اِلقانا بوتون اِو اهلي ائله شئلويا گتدي کي، ربّه ائلّئک قوربانيني و نذرئني يرئنه يتئرسئن.

1:22  آمّا خَنّا گتمه‌دي، اَرئنه ددي: "کؤرپه‌ني سوددن کَسندن سونرا گتئره‌رم کي، ربّئن خئدمتئنه گئرسئن و عؤمرو بويو اورادا قالسين."

1:23  اَري اِلقانا اونا ددي: "گؤزونده نه خوشدور، اله ده ات، اونو سوددن آييرانا قدر اِوده قال؛ قوي رب اؤز سؤزونو تصدئق اتسئن." بلجه آرواد اِوده قاليب اوغلونو سوددن آييرانا قدر اَمئزدئردي.

1:24  اوشاغي سوددن آييراندان سونرا خَنّا اونو اوچ ياشيندا بئر گاميش، بئر اِفا اون و بئر تولوق شرابلا بئرلئکده ربّئن شئلوداکي اِوئنه آپاردي، گرچي اوشاق حله بالاجا ائدي.

1:25  گاميشي کَسندن سونرا اوشاغي عِلي‌نئن يانينا گتئردئلر.

1:26  خَنّا ددي: "ای آغام، سنئن جانين حاقّي، ای آغام، من هَمن او آروادام کي، بورادا، سنئن يانيندا دوروب ربّه يالوارديم.

1:27  يالواريشيم بو اوشاق اوچون ائدي و رب موراديمي يرئنه يتئردي.

1:28  من اونو ربّه وقف اتمئشم؛ عؤمرو بويو ربّه وقف اولونوب." اوشاق اورادا ربّه پرستئش اتدي.