Kapingamarangi - II Chronicles - 27

27:1  Jotham ne-madalua maa-lima ono ngadau, gei mee gaa-hai di king, gaa-dagi i Jerusalem i-nia ngadau e-madangaholu maa-ono. Tinana o-maa go Jerushah, tama-ahina a Zadok.

27:2  Mee guu-hai nia mee ala e-hiihai ginai Dimaadua gadoo be di hai o dono damana; malaa, mee digi hai dono hala be dono damana dela ne-dudu ana ‘incense’ i-lodo di Hale Daumaha. Malaa, nia daangada gu-haihai-hua nadau ihala gi-muli.

27:3  Ma go Jotham dela ne-hau di Bontai Baahi Ngeia o-di Hale Daumaha, gei gu-ngalua damana gi-di abaaba o-di waahale Jerusalem i-di gowaa dela e-hagaingoo bolo Ophel.

27:4  I-lodo nia gonduu o Judah mee guu-hau ana waahale, i-lodo geinga mee guu-hau ana bae dauwa mo nia angulaa hagaloohi.

27:5  Mee gu-heebagi gi-di king o Ammon mo di buini dauwa a-maa, gei gu-hagamagedaa digaula. Mee guu-hono digau Ammon gi-huia gi mee nia dahi-aga aanei i-nia ngadau huogodoo i-lodo nia ngadau e-dolu: Nia dane silber e-haa, nia ulu-mee palaawaa e-madalima mana-(50,000) mono ulu-mee ‘barley’ e-madalima mana-(50,000).

27:6  Jotham guu-tomo maaloo dangihi, idimaa mee gu-daudali manawa-dahi Dimaadua go dono God.

27:7  Nia mee i-golo ala ne-hai go mee i dono madagoaa nogo king, ana dauwa, mo ana haganoho, la-guu-hihi huogodoo gi-lodo Di Kai o-nia King o Israel mo Judah.

27:8  Jotham ne-madalua maa-lima ono ngadau gei mee gaa-hai di king, guu-dagi i Jerusalem i-nia ngadau e-madangaholu maa-ono.

27:9  Mee ne-made gaa-danu i-lodo di Waahale o David, gei tama-daane a-maa go Ahaz gaa-pono di lohongo o-maa gaa-king.