Kapingamarangi - II Chronicles - 13

13:1  I-di madangaholu maa-walu ngadau Jeroboam nogo king i Israel, Abijah guu-hai di king o Judah,

13:2  gaa-king nia ngadau e-dolu i Jerusalem. Dono dinana go Micaiah, tama-ahina ni Uriel, mai di waahale o Gibeah. Tauwa gu-daamada i-mehanga Abijah mo Jeroboam.

13:3  Abijah gu-haga-dagabuli ana gau dauwa e-haa-lau mana-(400,000) gei Jeroboam gu-hai-baahi gi mee ana gau dauwa e-walu-lau mana-(800,000).

13:4  Nia buini dauwa e-lua aanei gu-heetugi i-lodo tenua gonduu o Ephraim. Di King Abijah guu-hana gi tomo di Gonduu Zemaraim, gaa-wolo gi Jeroboam mo digau Israel, “Hagalongo-mai gi-di-au!

13:5  E-hai behee? Goodou e-de-iloo bolo Dimaadua, di God o Israel, guu-hai dana hagababa e-deemee di-mooho ang-gi David, dela ne-wanga gi mee mo dono hagadili gi-muli di mogobuna king e-dagi digau Israel gaa-hana hua beelaa?

13:6  Jeroboam tama a Nebat gu-hai-baahi gi Solomon, dela go dono king.

13:7  Nomuli gei mee ga-hagadagabuli-mai gi-di gowaa e-dahi dana hagabuulinga balu dangada, ga-haga-maaloo nadau hiihai i-di gili o Rehoboam, tama-daane Solomon, dela e-damagiigi balua gei e-dee-dohu di hai-baahi gi-nia maanadu digaula

13:8  Dolomeenei gei goodou gu-hagatogomaalia belee heebagi gi-di mogobuna aamua dela ne-wanga go Dimaadua gi-nia hagadili o David. Goodou di-godou hagabuulinga gau dauwa e-dogologowaahee, gei goodou e-hai-mee gi-nia ada kau-daane goolo ala ne-hai go Jeroboam belee hai nia god ni goodou.

13:9  Goodou gu-hagabagi gi-daha digau hai-mee-dabu a Dimaadua, ala go nia hagadili o Aaron, gei goodou gu-hagabagi digau Levi. I nadau lohongo, goodou guu-bida dongo godou gau hai-mee-dabu gadoo be di hai o nnenua llauehe ala i-golo. Di-ingoo-hua tangada dela ma-ga-gaamai dana kau-daane be nia siibi e-hidu e-mee-hua di hagadabu e-mogobuna di hai tangada hai-mee-dabu o-nia god ala e-hagaingoo go goodou bolo godou god.

13:10  “Malaa gimaadou e-daumaha hua igolo gi Dimaadua di-madau God, gei digi diagia a-Mee. Digau hai-mee-dabu mai di hagadili Aaron e-hai nadau duhongo hegau, gei digau Levi e-hagamaamaa digaula.

13:11  Nia luada mono hiahi huogodoo, digaula e-hai nadau tigidaumaha gi Mee gi-nia ‘incense’ mo nia manu tigidaumaha dudu hagadogomaalia. Digaula e-tigidaumaha nia palaawaa i-hongo teebele gu-hagadabu gu-madammaa, gei nia hiahi huogodoo digaula e-hagamaahina nia malama i-hongo nia lohongo dugu malama goolo. Gimaadou e-hai nia mee a Dimaadua ala bolo gi-heia, gei goodou gu-diiagi a-Mee.

13:12  Go Mee go God, di-madau dagi, gei ana gau hai-mee-dabu la-gu i-kinei mo nadau labaa gu-togomaalia e-iliili nia maa e-gahigahi gimaadou e-dauwa adu gi goodou. Nia daangada Israel, goodou hudee heebagi gi Dimaadua di God o godou maadua mmaadua! Goodou e-deemee-loo di-maaloo!”

13:13  I-di madagoaa hua deelaa, Jeroboam gu-hagau hunu gau dauwa hagammuni e-heebagi duuli di buini dauwa Judah mai i-tua, gei digau dauwa ala i-golo le e-dauwa mai i-mua.

13:14  Digau dauwa Judah gaa-mmada gi-daha ga-gidee bolo ginaadou la-gu-duuli gi-lodo, ga-dangidangi gi Dimaadua i-di hagamaamaa, gei digau hai-mee-dabu ga-ili nadau labaa.

13:15  Digau dauwa Judah e-dagi go Abijah, gaa-wwolo gi-nua ga-heebagi. God gu-hagamagedaa Jeroboam mo di buini dauwa Israel.

13:16  Digau dauwa Israel guu-llele gi-daha mo digau dauwa Judah, gei God guu-hai digau Judah gi-maaloo i digau Israel.

13:17  Abijah mo dana buini dauwa gu-heebagi gu-hagamagedaa digau Israel. Lima-lau mana-(500,000) digau dauwa kaedahi muginua gu-daaligi guu-mmade.

13:18  Nia daangada o Judah gu-maaloo i digau Israel, idimaa digaula nogo hagadagadagagee gi Dimaadua, di God o nadau maadua mmaadua.

13:19  Abijah gu-waluwalu di buini dauwa Jeroboam guu-kumi guu-noho i-lodo nia waahale a-maa aanei: Bethel, Jeshanah, Ephron mo nia waahale lligi ala e-hoohoo gi-nia waahale aanei.

13:20  Jeroboam digi kae labelaa ono mogobuna i-di madagoaa Abijah nogo king. Hagaodi gi-muli, Dimaadua ga-daaligi a-mee, gei mee guu-made.

13:21  Malaa, Abijah gu-maaloo-aga. Mee guu-hai ono lodo e-madangaholu maa-haa, ana dama-daane mada-lua maa-lua mo nia dama-ahina dilongoholu maa-ono.

13:22  Di baahi di kai o-di mouli o Abijah dela i-golo, mo nia mee a-maa ne-helekai-ai, mo nia mee ala ne-hai go mee la-guu-hihi i-lodo Di Kai a Soukohp Iddo.