Kapingamarangi - II Chronicles - 21

21:1  Jehoshaphat ne-made gaa-danu i-lodo di waa-daalunga o-nia king i-lodo di Waahale David, gei tama-daane a-maa go Jehoram gaa-pono di lohongo o-maa gaa-king.

21:2  Jehoram tama-daane o King Jehoshaphat o Judah ono duaahina-daane dogo-ono: Azariah, Jehiel, Zechariah, Azariahu, Michael mo Shephatiah.

21:3  Tamana digaula guu-wanga ana goolo mono silber e-logowaahee gi digaula, mo nia goloo dahidamee ala i-golo, gu-haganoho digaula dagidahi, tangada e-dahi e-dagi dana waahale e-dahi i-nia waahale o Judah ala gu-abaaba. Malaa, idimaa Jehoram dela e-madua i digaula, Jehoshaphat guu-dugu a-mee e-kae dono lohongo king.

21:4  Di madagoaa Jehoram ne-maaloo di-dagi dono henua, gei mee gu-daaligi gii-mmade ono duaahina-daane huogodoo mo hunu gau aamua Israel labelaa.

21:5  Jehoram ne-hai di king gei mee gu-motolu maa-lua ono ngadau. Mee nogo dagi i Jerusalem i-nia ngadau e-walu.

21:6  Mee gu-daudali nia hangaahai huaidu o King Ahab mo nia king o Israel ala i-golo, idimaa mee ne-hai-lodo gi tama-ahina e-dahi a Ahab. Mee gu-ihala gu-hai-baahi ang-gi Dimaadua,

21:7  gei Dimaadua la-hagalee e-hiihai e-oho gi-daha di hagadili o David, idimaa Mee guu-hai dana hagababa damana gi David bolo dono hagadili gaa-dagi-hua beelaa gi-muli.

21:8  Di madagoaa Jehoram nogo king, Edom gu-hai-baahi gi Judah guu-hai tenua damana e-duu modogoia.

21:9  Jehoram mo ana daangada aamua guu-hula mo nadau waga-dauwa hongo-henua gu-heebagi gi Edom. Di buini dauwa Edom gu-duuli-mai digaula gi-lodo. I-di boo, digaula guu-mee di-lleleia gi-daha hagammuni.

21:10  Edom guu-duu modogoia i-daha mo Judah mai di madagoaa deelaa gaa-hula gi-muli. I-di madagoaa hua deelaa, di waahale Libnah gu-hinihini labelaa, idimaa Jehoram gu-diiagi Dimaadua, di God o ono maadua mmaadua.

21:11  Mee hogi dela gu-hagaduu nia gowaa daumaha ang-gi nia balu god i-lodo nnenua nnoonua o Judah, guu-dagi nia daangada o Judah mo Jerusalem gii-hai nadau ihala gi Dimaadua.

21:12  Soukohp Elijah ga-hagau dana lede gi Jehoram, e-hai boloo: “Dimaadua, di God o do damana madua David gu-hagahuaidu goe idimaa goe digi daudali nnangaahai o do damana King Jehoshaphat, be do damana madua King Asa.

21:13  Malaa dau mee ne-hai, goe ne-daudali nia hangaahai o-nia king o Israel guu-dagi nia daangada o Judah mo Jerusalem gi-lodo tee-modudahi nadau lodo gi God, gadoo be Ahab mo ono gau gi-muli ala ne-dagi nia daangada Israel gi-lodo tee-modudahi nadau lodo. Goe hogi dela gu-daaligi o duaahina-daane ala nia daane e-mada-humalia i-di goe.

21:14  Idimaa go o hangaahai, Dimaadua ga-hagaduadua gii-kono au daangada, au dama-lligi mo au ahina hai-lodo, gaa-oho gi-daha au goloo huogodoo.

21:15  Goe do huaidina ga-duadua i-di magi mmae gono, do dinae e-damana-aga i-nia laangi huogodoo.”

21:16  Hunu daangada o Philistia mo Arabia e-noho hoohoo gi-di gowaa dela nogo noho-ai hunu gau o Ethiopia i taalinga di tai. Dimaadua guu-hai digaula gi-dauwa e-hai-baahi gi Jehoram.

21:17  Digaula gu-heebagi gi Judah, guu-kae nia goloo ala i-lodo di hale king, gei guu-lahi galabudi nia lodo o-di king huogodoo mo ana dama-daane, ga-hagadubu Ahaziah, dana dama-daane kaedahi dulii, digi lahia go digaula.

21:18  I-muli nia mee huogodoo, Dimaadua guu-hai a-mee gii-magi mmae dono dinae.

21:19  Hoohoo nia ngadau e-lua, di magi o-maa la-gu-damana-mai gaa-dae-loo gi-di hagamuliagina di king, guu-made i-di hagaduadua mmae gono huoloo. Nia daangada a-maa digi dudu di-nadau ahi hangihangi be-di nadau hai e-hai gi-nia king i-mua o-mee.

21:20  Jehoram ne-hai di king i dono motolu maa-lua ono ngadau gei ne-dagi i Jerusalem nia ngadau e-walu. Tangada ne-manawa-gee ai i-di madagoaa ne-made-iei mee. Digaula gaa-danu a-mee i-lodo di Waahale o David, malaa hagalee i-lodo di waa-daalunga o-nia king.