Kapingamarangi - II Chronicles - 20

20:1  Di madagoaa mai gi-nomuli, nia buini dauwa Moab mo Ammon ngaadahi mo nau buini dauwa Meunite ala ne-buni-anga gi ginaadou, ga-heebagi gi Judah.

20:2  Hunu gau kae hegau ga-lloomoi ga-hagailoo gi King Jehoshaphat: “Di buini dauwa damana mai Edom gu-hanimoi i-di baahi i-golo di Tai Mmade belee heebagi-adu. Digaula guu-lawa di-kumi Hazazon Tamar.” (Deenei tuai ingoo labelaa ni Engedi.)

20:3  Jehoshaphat gu-madagu ga-dalodalo gi Dimaadua i-di hagamaamaa. Nomuli gei mee gaa-hai dana hagailoo bolo nia daangada huogodoo gi-hagaonge i tenua hagatau.

20:4  Nia daangada o-nia waahale huogodoo o Judah gaa-hula hagalellele gi Jerusalem e-halahala di hagamaamaa mai baahi Dimaadua.

20:5  Digaula mo nia daangada o Jerusalem ga-dagabuli gi-lodo di gowaa daahaa hoou o-di Hale Daumaha. King Jehoshaphat ga-hanaga gaa-duu i-mua digaula,

20:6  ga-dalodalo gi-nua, “Meenei Dimaadua, di God o madau maadua mmaadua, Goe e-noho i-di langi i-nua, gei e-dagi nia henua huogodoo o henuailala. Kooe dela e-kaedahi e-mahi, deai dahi dangada e-mee di-hai-baahi adu gi-di-Goe ai.

20:7  Kooe hua go di-madau God. Di madagoaa o au daangada Israel ne-ulu gi-lodo tenua deenei, Goe ne-hagabagi gi-daha nia daangada nogo noho i-ginei, gaa-wanga tenua la gi-di hagadili o Abraham, go do ehoo hagatenetene, gi-hai-mee ginai gaa-hana hua beelaa.

20:8  Digaula guu-noho i-ginei, guu-hau di Hale Daumaha e-hagalaamua do ingoo, i-di iloo

20:9  bolo ma-ga-iai di haingadaa gaa-tale gi digaula ga-hagaduadua digaula mai tauwa, tau magi, be tau hiigai, gei digaula e-mee di-lloomoi gaa-tuu i-mua di Hale Daumaha deenei, i-di gowaa e-daumaha-ai digaula adu gi-di Goe. Digaula gaa-mee di-dangidangi-adu gi-di-Goe i nadau haingadaa, gei Goe ga-longono gaa-daa digaula gi-daha mo di haingadaa.

20:10  “Dolomeenei, nia daangada o Ammon, Moab, mo Edom gu-heebagi mai gi gimaadou. Di madagoaa madau maadua mmaadua ne-lloomoi gi-daha mo Egypt, Goe digi dumaalia gi digaula gi-ulu gi-lodo nia henua aalaa, gei madau maadua mmaadua guu-hula gu-haganiganiga nia maa, gei digi oho-ina nia maa.

20:11  Deenei di-nadau hai e-hui-mai gi gimaadou: digaula gu-lloomoi belee hagabagi gimaadou gi-daha mo tenua dela guu-lawa dau gaamai gi gimaadou.

20:12  Kooe go di-madau God! Hagaduadua-ina digaula, idimaa gimaadou gu-deloaa di hai-baahi ang-gi di buini dauwa damanaiee dela e-heebagi-mai gi gimaadou. Gimaadou e-de-iloo ma ni-aha ala belee hai go gimaadou, gei gimaadou e-halahala-adu Goe e-dangi-adu i-di hagamaamaa.”

20:13  Nia daane huogodoo Judah, madalia nadau lodo mo nia dama, nogo tuu i-golo i-di Hale Daumaha.

20:14  Di Hagataalunga o Dimaadua guu-doo-iha gi-hongo dahi dangada Levi dela i-lodo digau dogologo, dono ingoo go Jahaziel, tama-daane ni Zechariah; mee tangada e-dau gi-di madahaanau o Asaph, di hagadili o Mattaniah, Jeiel, mo Benaiah.

20:15  Jahaziel ga-helekai, “Meenei di King, mo goodou huogodoo nia daangada o Judah mo Jerusalem. Dimaadua e-helekai bolo goodou gi-hudee lliga godou lodo be e-mmaadagu di-heebagi gi-di buini dauwa damana deenei. Tauwa le e-huwahuwa-ai a God, hagalee go goodou.

20:16  Daiaa, heebagi gi digaula. Digaula ga-loo-aga gi-di gowaa di Ala Nnoonua o Ziz. Goodou ga-heetugi gi digaula i-di hugu gi-muli o-di gowaa baba dela e-hana gi tenua gi-lodo di anga-henua hoohoo-adu gi Jeruel.

20:17  Hagalee go goodou e-heebagi i tauwa deenei. Hagatogomaalia-ina-hua godou lohongo gaa-tali; goodou ga-gidee Dimaadua e-gowadu gi goodou di aali. Goodou nia daangada o Judah mo Jerusalem, goodou hudee manawa paagege be mmaadagu. Hula heebagi, Dimaadua ga-madalia-laa goodou!”

20:18  King Jehoshaphat gaa-bala gi-lala-loo, ono golomada guu-tale gi-di gelegele, gei nia daangada huogodoo gaa-pala dalia a-mee mo-di daumaha gi Dimaadua.

20:19  Digau Levi ala e-dau gi-nia madahaanau o Kohath mo Korah gaa-tuu gi-nua gaa-wwolo gi-nua ga-hagaamu Dimaadua, di God o Israel.

20:20  Hagaluada-loo dono daiaa, nia daangada gaa-hula gi-lodo di anga-henua e-hoohoo gi Tekoa. Di madagoaa digaula e-hagatanga, Jehoshaphat gaa-hai dana agoago ang-gi digaula: “Nia daangada o Judah mo Jerusalem! Hagadagadagagee gi Dimaadua di-godou God, gei goodou gaa-tuu mau-dangihi. Hagadonu-ina nnelekai soukohp ala e-hagi-adu gi goodou, gei goodou gaa-kila.”

20:21  I-muli dana helehelekai gi ana daangada, di king gaa-hai hunu gau hua daahili gi ulu-ina nadau gahu-lloo ala nogo ulu-ai i-nia laangi llauehe, ge gii-hula i-mua di buini dauwa, mo-di dadaahili: “Hagaamu-ina Dimaadua! Dono aloho e-hana hua beelaa!”

20:22  Di madagoaa digaula ne-daamada ne-daahili, Dimaadua gu-haga-hinihini nia buini dauwa ala belee heebagi ang-gi ginaadou.

20:23  Digau Ammon mo digau Moab gu-heebagi gi-di buini dauwa o Edom, gu-hagammaa gi-daha digaula, ga-nomuli digaula gaa-bida dauwa maaloo ang-gi ginaadou modo-ginaadou.

20:24  Di madagoaa di buini dauwa Judah ne-dau i-di angulaa dela i-lodo di anggowaa, gaa-mmada gi nadau hagadaumee, ga-gidee boloo digaula huogodoo le e-mmoemmoe i-hongo di gelegele, guu-mmade. Deai dahi dangada ne-lele gi-daha ai.

20:25  Jehoshaphat mo ana buini dauwa ga-lloo-adu belee kae nia goloo digaula, digaula gu-gidee nia goloo logowaahee: nia kau, goloo-dauwa, nia gahu, mo nia dahida goloo ala i-golo. Digaula gu-hagabudu nadau goloo i tauwa i-nia laangi e-dolu, gei nia goloo le e-logowaahee balua e-deemee di-nadau kae nia maa huogodoo.

20:26  I-di haa laangi, digaula ga-dagabuli i-di gowaa mehanga gonduu o Beracah ga-hagaamu Dimaadua i ana mee huogodoo ala ne-hai. Deelaa tadinga ne-hagaingoo di gowaa baba deelaa boloo Beracah.

20:27  Jehoshaphat gaa-dagi ana buini dauwa gi-muli gi Jerusalem i-di aali, idimaa Dimaadua gu-hagamagedaa nadau hagadaumee.

20:28  Di madagoaa digaula ne-dau i-di waahale, digaula ga-taele gi-di Hale Daumaha mo-di dadaahili nadau ‘harp’ mo-di iliili nadau labaa.

20:29  Nia henua llauehe huogodoo ala ne-longono di mee a Dimaadua ne-hai dela ne-hagamagedaa nia hagadaumee Israel, la-gu-mmaadagu,

20:30  deelaa-laa Jehoshaphat gaa-dagi tenua i-lodo di aumaalia, gei God gu-duuli a-mee i-nia baahi huogodoo.

20:31  Jehoshaphat ne-daamada ne-hai di king o Judah i dono madua ono ngadau e-motolu maa-lima gaa-dagi i Jerusalem nia ngadau e-madalua maa-lima. Tinana o-maa go Azubah, tama-ahina a Shilhi.

20:32  Gadoo be dono damana go Asa nogo i ono mua, mee guu-hai nia mee ala e-donu i-mua Dimaadua.

20:33  Gei nia gowaa daumaha gi-nia balu god la-digi ohaa-ina gi-daha. Nia daangada digi huli nadau manawa hagatau gi-di hai daumaha gi-di God o nadau maadua mmaadua.

20:34  Nia mee huogodoo ala i-golo ala ne-hai go Jehoshaphat mai i taamada dono madagoaa dagi gaa-tugi gi-di hagaodi, la-guu-hihi gi-lodo Di Kai o Jehu Tama a Hanani dela di baahi di beebaa Di Kai o-nia King o Israel.

20:35  Dahi madagoaa King Jehoshaphat o Judah gu-buni-anga gi King Ahaziah o Israel, di king dela guu-hai ana huaidu e-logo.

20:36  Meemaa guu-hau nau wagabaalii heehee moana i-di gowaa wagabaalii o Ezion=Geber,

20:37  Gei Eliezer tama-daane a Dodavahu, mai di waahale o Mareshah, ga-hagailoo gi Jehoshaphat, “Idimaa goe dela guu-buni gi Ahaziah, Dimaadua gaa-oho gi-daha dau mee dela ne-hau.” Gei nia wagabaalii gu-mooho gei digi hula gi-di moana.