SP - Leviticus - 6

6:1  וידבר יהוה אל משה לאמר

6:2  צוה את אהרן ואת בניו לאמר זאת תורת העלה היא העלה על המוקדה על המזבח כל הלילה עד הבקר ואש המזבח תוקד בו

6:3  ולבש הכהן מדי בד ומכנסי בד ילבש על בשרו והרים את הדשן אשר תאכל האש את העלה על המזבח ושמו אצל המזבח

6:4  ופשט את בגדיו ולבש בגדים אחרים והוציא את הדשן אל מחוץ למחנה אל מקום טהור

6:5  והאש על המזבח תוקד בו לא תכבה ובער עליה הכהן עצים בבקר בבקר וערך עליה העלה והקטיר עליה חלבי שלמים

6:6  אש תמיד תוקד על המזבח לא תכבה

6:7  וזאת תורת המנחה הקריבו אתה בני אהרן לפני יהוה אל פני המזבח

6:8  והרים ממנה בקמצו מסלת המנחה ומשמנה ואת כל הלבונה אשר על המנחה והקטיר המזבחה אשה ריח ניחח אזכרתה ליהוה

6:9  והנותרת ממנה יאכל אהרן ובניו מצות תאכל במקום קדוש בחצר אהל מועד יאכלוה

6:10  לא תאפה חמץ חלקם נתתי אתה מאשי יהוה קדש קדשים היא כחטאת וכאשם

6:11  כל זכר בבני אהרן יאכלנה חק עולם לדרתיכם מאשי יהוה כל אשר יגע בהם יקדש

6:12  וידבר יהוה אל משה לאמר

6:13  זה קרבן אהרן ובניו אשר יקריבו ליהוה ביום המשח אתו עשירת האיפה סלת למנחה תמיד מחציתה בבקר ומחציתה בין הערבים

6:14  על המחבת בשמן תעשה מרבכת תביאנה תופני מנחת פתים תקריב ריח ניחח ליהוה

6:15  הכהן המשיח תחתיו מבניו יעשה אתה חק עולם ליהוה כליל תקטיר

6:16  וכל מנחת כהן כליל תהיה לא תאכל

6:17  וידבר יהוה אל משה לאמר

6:18  דבר אל אהרן ואל בניו לאמר זאת תורת החטאת במקום אשר תשחט העלה תשחט החטאת לפני יהוה קדש קדשים היא

6:19  הכהן המחטא אתה יאכלנה במקום קדוש תאכל בחצר אהל מועד

6:20  כל אשר יגע בבשרה יקדש ואשר יזה מדמה על הבגד אשר יזה עליו יכבס במקום קדוש

6:21  וכלי חרש אשר תבשל בו ישבר ואם בכלי נחשת בשלה ומרק ושטף במים

6:22  כל זכר בכהנים יאכל אתה קדש קדשים היא

6:23  וכל חטאת אשר יבוא מדמה אל אהל מועד לכפר בקדש לא תאכל באש תשרף