Geez - Numbers - 19

19:1  ወነበቦሙ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤

19:2  ዝንቱ ፡ ትእዛዙ ፡ ለ(ኵሉ ፡) ሕግ ፡ ዘአዘዘ ፡ እግዚአብሔር ፡ ወይቤ ፡ ንግሮሙ ፡ ለደቂቀ ፡ እስራኤል ፡ ወበሎሙ ፡ ያ[ም] ጽኡ ፡ ለከ ፡ አሐተ ፡ እጐልተ ፡ ቀያሐ ፡ ንጽሕተ ፡ እንተ ፡ አልባቲ ፡ ላዕሌሃ ፡ ነውረ ፡ ወእንተ ፡ ኢተወድየ ፡ ላዕሌሃ ፡ አርዑት ።

19:3  ወትሁቦ ፡ ለእልዓዛር ፡ ካህን ፡ ወይወስድዋ ፡ አፍአ ፡ እምትዕይንት ፡ ውስተ ፡ መካን ፡ ንጹሕ ፡ ወይጠብሕዋ ፡ በቅድሜሁ ።

19:4  ወይነሥእ ፡ እልዓዛር ፡ እምውስተ ፡ ደማ ፡ ወይነዝኅ ፡ ቅድመ ፡ ገጻ ፡ ለደብተራ ፡ መርጡል ፡ እምነ ፡ ደማ ፡ ስብዕ ።

19:5  ወያውዕይዋ ፡ በቅድሜሁ ፡ ወማእሳኒ ፡ ወሥጋሃኒ ፡ ወደማሂ ፡ ምስለ ፡ ካዕሴሃ ፡ ወያውዕይዎ ።

19:6  ወይነሥእ ፡ ካህን ፡ ዕፀ ፡ አርዘ ፡ ወቈጽለ ፡ ህሦጱ ፡ ወለየ ፡ ወይወድይዎ ፡ ውስተ ፡ ማእከለ ፡ እሳታ ፡ ለይእቲ ፡ እጐልት ።

19:7  ወየኀፅብ ፡ አልባሲሁ ፡ ካህን ፡ ወይትኀፀብ ፡ ሥጋሁ ፡ በማይ ፡ ወእምድኅረ ፡ ዝንቱ ፡ ይበውእ ፡ ውስተ ፡ ትዕይንት ፡ ወርኩስ ፡ ውእቱ ፡ ካህን ፡ እስከ ፡ ሰርክ ።

19:8  ወዘአውዐያሂ ፡ የኀፅብ ፡ አልባሲሁ ፡ ወይትኀፀብ ፡ ሥጋሁ ፡ ወርኩስ ፡ ውእቱ ፡ እስከ ፡ ሰርክ ።

19:9  ወያስተጋብኦ ፡ ብእሲ ፡ ንጹሕ ፡ ለሐመዳ ፡ ወይክዕዎ ፡ አፍአ ፡ እምትዕይንት ፡ ውስተ ፡ መካን ፡ ንጹሕ ፡ ወይከውን ፡ ለተዐቅቦ ፡ ለትዕይንቶሙ ፡ ለደቂቀ ፡ እስራኤል ፡ ለማየ ፡ መንዝኅ ፡ የዐቅብዎ ፡ እስመ ፡ ቦቱ ፡ ያነጽሑ ።

19:10  ወዝክቱ ፡ ዘያስተጋብእ ፡ ሐመዳ ፡ ለይእቲ ፡ እጐልት ፡ የኀፅብ ፡ አልባሲሁ ፡ ወርኩስ ፡ ውእቱ ፡ እስከ ፡ ሰርክ ፡ ወይኩኖሙ ፡ ለደቂቀ ፡ እስራኤል ፡ ወለግዩራን ፡ ለእለ ፡ ሀለው ፡ ውስቴትክሙ ፡ ማእከሌክሙ ፡ ሕግ ፡ ዘለዓለም ።

19:11  ወዘገሰሰ ፡ በድነ ፡ ዘኵሉ ፡ ነፍሰ ፡ ሰብእ ፡ ርኩስ ፡ ውእቱ ፡ ሰቡዐ ፡ ዕለተ ።

19:12  ወከመዝ ፡ ያነጽሕ ፡ ርእሶ ፡ በሣልስት ፡ ዕለት ፡ ወበሳብዕት ፡ ዕለት ፡ ወይከውን ፡ ንጹሐ ፡ ወለእመሰ ፡ ኢያንጽሐ ፡ ርእሶ ፡ በሣልስትኒ ፡ ዕለት ፡ ወበሳብዕትኒ ፡ ዕለት ፡ ኢ[ይነጽሕ] ።

19:13  ኵሉ ፡ ዘገሰሰ ፡ በድነ ፡ ዘኵሉ ፡ ነፍሰ ፡ እጓለ ፡ እመ ፡ ሕያው ፡ ዘሞተ ፡ ወኢያንጽሐ ፡ ርእሶ ፡ አርኰሰ ፡ ደብተራሁ ፡ ለእግዚአብሔር ፡ ለትትቀጥቀጥ ፡ ይእቲ ፡ ነፍስ ፡ እምነ ፡ እስራኤል ፡ እስመ ፡ ኢያንዝኀ ፡ ላዕሌሁ ፡ ማየ ፡ መንዝኅ ፡ ርኩስ ፡ ውእቱ ፡ ወዓዲሁ ፡ ር[ኵሱ] ፡ ሀለወ ፡ ላዕሌሁ ።

19:14  ወከመዝ ፡ ሕጉ ፡ ለሰብእ ፡ ለእመቦ ፡ ዘሞተ ፡ በውስተ ፡ ቤት ፡ ኵሉ ፡ ዘቦአ ፡ ውስተ ፡ ውእቱ ፡ ቤት ፡ ወኵሉ ፡ ዘሀለወ ፡ ውስተ ፡ ቤት ፡ ርኩስ ፡ ውእቱ ፡ ሰቡዐ ፡ መዋዕለ ።

19:15  ወኵሉ ፡ ንዋይ ፡ ክሡት ፡ ወዘኢኮነ ፡ እሱረ ፡ ማእሰር ፡ ላዕሌሁ ፡ ርኩስ ፡ ውእቱ ።

19:16  ወኵሉ ፡ ዘገሰሰ ፡ በውስተ ፡ ምድር ፡ እመኒ ፡ ቅቱለ ፡ ወእመኒ ፡ በድን ፡ አው ፡ ዐጽመ ፡ ሰብእ ፡ አው ፡ መቃብር ፡ ርኩስ ፡ ውእቱ ፡ ሰቡዐ ፡ መዋዕለ ።

19:17  ወያመጽኡ ፡ ሎቱ ፡ ለዝክቱ ፡ ርኩስ ፡ እምውስተ ፡ ሐመዳ ፡ ለእንታክቲ ፡ እንተ ፡ አውዐዩ ፡ ለአንጽሖ ፡ ወይሰውጡ ፡ ውስቴቱ ፡ ማየ ፡ ጥዑም ፡ በውስተ ፡ ግምዔ ።

19:18  ወያመጽኡ ፡ ቈጽለ ፡ ህሶጱ ፡ ወይጠምዖ ፡ ብእሲ ፡ ንጹሕ ፡ ውስተ ፡ ውእቱ ፡ ማይ ፡ ወይነዝኅ ፡ ላዕለ ፡ ውእቱ ፡ ቤት ፡ [ወ] ላዕለ ፡ ንዋዩ ፡ ወላዕለ ፡ ኵሉ ፡ ነፍስ ፡ ዘሀለወ ፡ ህየ ፡ ወዲበ ፡ ዘገሰሰ ፡ ዐጽመ ፡ ሰብእ ፡ ወእመኒ ፡ ቅቱለ ፡ ወእመኒ ፡ በድን ፡ ወእመኒ ፡ መቃብር ።

19:19  ወይነዝኆ ፡ ዘንጹሕ ፡ ለርኩስ ፡ በሣልስት ፡ ዕለት ፡ ወበሳብዕት ፡ ዕለት ፡ ወይነጽሕ ፡ በሳብዕት ፡ ዕለት ፡ ወየኀፅብ ፡ አልባሲሁ ፡ ወይትኅፀብ ፡ ሥጋሁ ፡ በማይ ፡ ወርኩስ ፡ ውእቱ ፡ እስከ ፡ ሰርክ ።

19:20  ወብእሲ ፡ ዘረኵሰ ፡ ወኢያንጽሐ ፡ ርእሶ ፡ ለትሠሮ ፡ ይእቲ ፡ ነፍስ ፡ እምነ ፡ ማእከለ ፡ ትዕይንት ፡ እስመ ፡ አርኰሰት ፡ ቅድሳቲሁ ፡ ለእግዚአብሔር ፡ እስመ ፡ ማየ ፡ መንዝኅ ፡ ኢተነዝኀ ፡ ላዕሌሁ ፡ ርኩስ ፡ ውእቱ ።

19:21  ወይኩንክሙ ፡ ሕግ ፡ ዘለዓለም ፤ ወዘይነዝኅ ፡ ማየ ፡ መንዝኅ ፡ የኀፅብ ፡ አልባሲሁ ፡ ወዘገሰሶ ፡ ለ[ማየ ፡] መንዝኅ ፡ ርኩስ ፡ ውእቱ ፡ እስከ ፡ ሰርክ ።

19:22  ወኵሉ ፡ ዘገሰሶ ፡ ለርኩስ ፡ ይረኵስ ፡ ወነፍስ ፡ እንተ ፡ ገሰሰቶ ፡ ርኵስት ፡ ይእቲ ፡ እስከ ፡ ሰርክ ።