Kapingamarangi - Romans - 7

7:1  Ogu duaahina-nei, goodou gu-iloo agu mee ala ga-helekai-ai, idimaa, goodou gu-iloo di hai o-nia haganoho. Nnaganoho le e-dagi-hua nia daangada i-di madagoaa dela e-mouli-ai digaula.

7:2  Deenei dono ala: Di ahina hai-lodo e-noho i-lala taganoho hagamau gi dono lodo i-di waalooloo o dono lodo e-mouli-ai. Maa dono lodo gaa-made, gei mee gu-mehede gi-daha mo taganoho hagamau deelaa.

7:3  Malaa, mee gaa-lodo gi tuai daane, gei di lodo o-maa le e-mouli hua igolo, gei mee e-haga-ingoo bolo di ahina mouli hai be-di manu. Maa di lodo o-maa la-guu-made, gei mee gu-mehede, hagalee haga-ingoo bolo di ahina mouli be-di manu maa mee ga-hai-lodo gi tuai daane labelaa.

7:4  Ogu duaahina-nei, deelaa di hai i godou baahi: I-di hai o Nnaganoho Moses, goodou guu-mmade labelaa, idimaa, goodou gu-hagadaubuni ang-gi tuaidina o Christ. Gei dolomeenei, goodou guu-hai nia dama ni Mee dela ne-haga-mouli-aga i-di made, dela e-hai gidaadou gii-hai nnegau a God.

7:5  Tadau madagoaa nogo mouli i tadau manawa, gei nia hiihai huaidu ala nogo hagangalungalua go nnaganoho i-lodo tadau huaidina, la ne-hai gidaadou gii-hai nnegau o-di made.

7:6  Gei dolomeenei, gidaadou gu-maahede gi-daha mo nnaganoho, idimaa, gidaadou guu-mmade gi nnaganoho dela nogo daahi gidaadou be digau galabudi, gei gidaadou gu-hagalee hai-hegau gi nnaganoho namua ala ne-hihi, gei gu-hai-hegau-hua gi-di ala hoou o-di Hagataalunga-Dabu.

7:7  Gidaadou ga-helekai bolo-aha, ma go nnaganoho ala e-huaidu? Deeai! Nnaganoho ala ne-hai au gi-iloo di hai o-di huaidu. Maa taganoho digi helekai boloo, “Hudee hagagailaa,” gei au e-de-iloo di hagagailaa.

7:8  Malaa, di huaidu dela ne-hagangalua-aga nia hagadilinga maanadu dumaanga i ogu lodo mai i taganoho. Gei di-maa bolo nnaganoho ai, di huaidu la dono hadinga ai.

7:9  Au nogo mouli gi-di mouli i-daha mo nnaganoho. Di madagoaa taganoho ne-gila-aga, gei di huaidu gu-gila-aga labelaa,

7:10  gei au guu-hai tangada e-made. Malaa, taganoho dela belee hai au gi-mouli, la-ne-hai au gii-made.

7:11  Di huaidu ne-gidee dono madagoaa humalia mai i taganoho, gu-halahalau au, gu-daaligi au gii-made.

7:12  Malaa, nnaganoho le e-dabu, nia helekai o nnaganoho le e-dabu, e-donu ge e-humalia.

7:13  E-hai behee? Di mee deenei le e-haga-modongoohia bolo di mee humalia la-guu-hai au gii-made? Deeai! Di huaidu dela ne-hidi-ai di-maa. Di huaidu ne-hai au gii-hai tangada e-made, i dana haga-hai-hegau di mee humalia bolo gi-modongoohia-aga di huaidu. Idimaa, nia helekai o nnaganoho gu-haga-modongoohia bolo di huaidu la-di huaidu damanaiee.

7:14  Gidaadou gu-iloo bolo nnaganoho la mai baahi o God, gei au tangada dangada, guu-hui be-di hege ang-gi di huaidu.

7:15  Au e-de-iloo agu mee ala e-hai, idimaa, au hagalee hai nia mee ala e-hiihai ginai au, gei au e-hai-hua go nia mee ala e-de-hiihai ginai au.

7:16  Idimaa au e-hai di mee dela e-de-hiihai ginai au, le e-haga-modongoohia bolo au e-donu-hua bolo nnaganoho le e-donu.

7:17  Hagalee ko-au deenei dela e-hai di-maa, go di huaidu dela i ogu lodo.

7:18  Au e-iloo bolo di haihai humalia la-hagalee i lodo dogu huaidina dangada. Idimaa, dogu hiihai e-hai di mee humalia la i ogu lodo, gei di-maa e-deemee di hai ko-au.

7:19  Au hagalee hai di mee humalia belee hai, gei au e-hai di mee huaidu, go di mee dela e-de-hiihai ginai au le e-hai koau.

7:20  Maa au gaa-hai di mee dela e-de-hiihai ginai au belee hai, malaa, hagalee ko-au dela ne-hai di-maa, di huaidu dela i ogu lodo ne-hai di-maa.

7:21  Malaa, au gu-gidee bolo taga-noho deenei le e-ngalua: Dogu madagoaa dela e-hiihai belee hai di humalia, gei di-maa go di huaidu hua dela ne-hilihili-aga ko-au.

7:22  Ogu lodo e-tenetene gi nnaganoho a God,

7:23  gei-au gu-gidee tuai haganoho dela e-ngalua i-lodo dogu huaidina, go taganoho dela e-hai-baahi gi taganoho dela e-donu ginai agu hagamamaanadu, gei au gu-galabudi go taganoho o-di huaidu dela e-ngalua i dogu huaidina.

7:24  Au tangada hua e-lodo huaidu! Ma koai dela ga-haga-dagaloaha au gi-daha mo tuaidina deenei, dela e-dagi au gi-lodo di made?

7:25  Di-mee-bolo mee ang-gi God dela e-haga-gila-aga di mee deenei, mai baahi tadau Dagi go Jesus Christ! Malaa deenei dagu hai: Au e-hai-hegau gi nnaganoho God i-lodo agu hagamamaanadu, gei dogu huaidina-dangada e-hai-hegau gi taganoho o-di huaidu.