Azeri - Deuteronomy - 10

10:1  او واخت رب منه ددي: «اَوّلکي کئمي اؤزون اوچون ائکي داش لؤوحه يون و يانيما داغا چيخ. آغاجدان بئر سانديق دا اؤزون اوچون دوزلت.

10:2  قيرديغين اوّلکي لؤوحه‌لرده يازيلان سؤزلري تزه لؤوحه‌لرئن اوستونه يازاجاغام. اونلاري سانديغا قوي.»

10:3  اَقاقئيا آغاجيندان بئر سانديق دوزه‌لدئب، اوّلکي کئمي ائکي داش لؤوحه‌ني يوندوم. سونرا بو ائکي داش لؤوحه‌ني الئمه گؤتوروب داغا چيخديم.

10:4  رب، ييغين اولان گون، داغدا آلووون ائچئندن سئزه دانيشديغي اون فرماني بو لؤوحه‌لرئن اوستونه گئنه ده اوّلکي کئمي يازدي و منه وردی.

10:5  من دؤنوب داغدان اِندئم و ربّئن منه امر اتدئيي کئمي بو لؤوحه‌لري دوزلتدئيئم سانديغا قويدوم کي، حله ده اوراداديرلار.

10:6  ائسرايئل اؤولادلاري بِعِروت‌بِنِه‌يَعه‌قاندان موسِرا‌يا کؤچدولر. هارون اورادا اؤلوب دَفن اولوندو. اونون يرئنه اوغلو اِلعازار کاهئن اولدو.

10:7  اورادان گودگودايا و گودگودادان دا آخار سولار دئياري اولان يوطباتايا کؤچدولر.

10:8  او زامان رب لاوي قبئله‌سئني آييردي کي، ربّئن عهد سانديغيني داشيسينلار، ربّه خئدمت ادئب اونون آدي ائله برکت وره‌رک حوضوروندا دايانسينلار. اونلار بو گونه‌جک همن ائشي گؤرورلر.

10:9  بونا گؤره ده لاوئلی‌لره قارداشلاري ائله بئرلئکده پاي و تورپاق مئراثي دوشمه‌دي. رب اونلارين مئراثي ائدي، نجه کي، تارينيز رب اونلارا دمئشدي.

10:10  اوّلکي کئمي گئنه ده قيرخ گون-قيرخ گجه داغدا قالديم. رب بو دفه ده منی اشئتدي و اونا گؤره ائستمه‌دي کی، سئزي قيرسين.

10:11  سونرا رب منه ددي: «قالخ، کؤچَن خالقين قاباغيندا گت کي، آتالارينا ورمه‌سئني آند ائچدئيئم تورپاغا گئرئب اورايا مالئک اولسونلار.»

10:12  ائندي، ای ائسرايئل، تارين رب سندن نه ائسته‌يئر؟ مگر بونو ائسته‌مئر کي، تارين ربدن قورخاسان، اونون بوتون يوللاريني توتاسان، اونو سِوه‌سن، و تارين ربّه بوتون اوره‌يئنله و بوتون جانينلا خئدمت اده‌سن،

10:13  و بو گون سنئن خيئرئنه دِدئيئم ربّئن امرلرئني و قايدالاريني ساخلاياسان.

10:14  باخ، گؤيلر، گؤيلرئن لاپ اوجالاري بِله، ير اوزو و ير اوستونده اولان هر شي تارين ربّئندئر.

10:15  لاکئن رب آتالارينيزا شفقتلي اولدو. اونلاري سِوئب سونراکي نسئل اولان سئزي، بوگونکي کئمي، بوتون خالقلار آراسيندان سچدي.

10:16  بونا گؤره ده اورَکلرئنئزي ختنه ادئن و بئر داها دئکباش اولمايين.

10:17  چونکي تارينيز رب آللاهلارين تاريسي، حؤکمدارلارين حؤکمراني‌دير. او طرفدارليق اتمه‌يَن، روشوت آلمايان، عظمتلي، قودرتلي، و زَهملي تاري‌دير.

10:18  او، يِتئمئن و دولون دادينا چاتير. قرئبي سِوئر، اونا چؤرک و پالتار ورئر.

10:19  سئز ده قرئبي سِوئن، چونکي اؤزونوز ده مئصئر اؤلکه‌سئنده قرئب ائدئنئز.

10:20  تارينيز ربدن قورخون، اونا خئدمت ادئب باغلي قالين و آندلارينيزي آنجاق اونون آدينا ائچئن.

10:21  سئزئن فَخرئنئز اودور. بو عظمتلي و زَهملي عمللري تاري ادئر کي، گؤزلرئنئزله گؤرورسونوز.

10:22  آتالارينيز يتمئش نفر اولاراق مئصئره گتدئلر. آمّا ائندي تارينيز رب سئزي چوخالديب گؤيده‌کي اولدوزلار قدر ادئبدئر.