Kapingamarangi - Ecclesiastes - 10

10:1  Nia lamu mmade e-mee di-haga-bilau di-nadau loaabi lolo-kala dogomaalia, gei tadaulia dulii-loo e-mee-hua di-hunahuna gi-daha di kabemee kaedahi damanaiee.

10:2  Tangada kabemee e-hai go di mee dela e-donu, gei tangada dadaulia e-hai go di mee dela e-hagalee donu.

10:3  Tadaulia o-maa le e-hagamodongoohia hogi gi-nia dangada hua-gee ala e-heetugi gi mee. Mee e-hai nia daangada huogodoo gi-iloo bolo ia le e-dadaulia.

10:4  Maa doo dagi ga-hagawelewele-adu gi-di-goe, hudee hai beebaa hagamolooloo i dau moomee. Nia hala llauehe e-mee di-dumaalia ginai maa goe gaa-noho deemuu.

10:5  Deenei di mee hala ne-gidee-au i henuailala, di mee hala ne-hidi-mai i-nia dagi:

10:6  Digau dadaulia e-wanga ginai nia lohongo dagi, gei digau maluagina e-haga-de-iloo.

10:7  Au gu-gidee nia hege e-hula i-hongo nia hoodo, gei digau aamua e-haele i-lala gadoo be nia hege.

10:8  Maa goe e-geli dau luwa, goe e-doo gi no-lodo. Maa goe e-oho e-ulu laa-lodo di abaaba, goe e-kadi go di gihaa lodo-geinga.

10:9  Maa goe e-ngalua i-di gowaa mama hadugalaa, goe e-dilidili go nia hadu. Maa goe e-haahi au laagau, goe e-lauwa mai dau ngalua.

10:10  Maa dau dalai le e-malili gei goe e-hagalee olo di-maa, goe e-ngalua damana gi-hai-hegau di-maa. Ma e-koia e-humalia di-bilaan i-mua.

10:11  E-balumee do iloo di haga-gaidala di gihaa, maa goe e-dugu goe gii-kadi go-di gihaa i-mua do haga-gaidala di-maa.

10:12  Nia helekai o digau kabemee le e-hai ginaadou gi-haga-laamua, gei digau dadaulia le e-hagahuaidu go nadau helekai donu.

10:13  Digaula e-daamada e-helehelekai i-nia balu helekai, gei di hagaodi gi-muli go-di hagadugina huoloo.

10:14  Tangada dadaulia e-helehelekai e-hagalee noho. Deai tangada e-iloo nia mee ala ma-ga-kila-aga maalia ai, gei deai tangada e-mee di-hagi-mai gi gidaadou nia mee ala e-hai i-muli tadau mmade ai.

10:15  Tangada dadaulia le e-hagaduadua-hua ia. Mee e-de-iloo-ia di-hana gi dono hale.

10:16  Di madagoaa tenua gaa-dagi go di king dama-daane, gei nia dagi e-buni e-haihai nadau hagamiami tenetene i-di boo hagatau, gei tenua deelaa gaa-tale gi-di haingadaa.

10:17  Malaa, tenua haadanga-lamalia la-go tenua dela e-dagi go di king gi ono hagamaanadu donu, mo nia dagi ala e-miami i-di madagoaa humalia e-miami-ai, e-benebene humalia ginaadou, e-hagalee libaliba.

10:18  Maa goe ga-hagatoo huoloo di hau doo hale, doo hale la-gaa-tulu ga-mooho.

10:19  Nia hagamiami llauehe e-haga-tenetene goe, gei nia waini e-hagamanawa lamalia goe, malaa, ma go-di bahihadu dela e-hai nia mee aanei gii-gila.

10:20  Hudee helekai hai-baahi gi-di king, ma e-aha ma-ga-helekai deemuu, hudee helekai hai-baahi gi digau maluagina, ma e-aha maa goe e-modogoe i-lodo do ruum-kii. Holongo dahi manu e-kae au helekai e-hagi-anga gi digaula.