TpiKJPB - Ephesians - 6

6:1  ¶ Ol pikinini, bihainim tok bilong papamama bilong yupela insait long Bikpela. Long wanem, dispela em i stretpela.

6:2  Givim ona long papa na mama bilong yu, (dispela em i namba wan tok strong wantaim promis,)

6:3  Inap long em i ken go gutpela long yu, na yu ken stap laip longpela taim long dispela graun.

6:4  Na, yupela ol papa, no ken skrapim bel bilong ol pikinini bilong yupela long belhat tru, tasol lukautim ol insait long lukaut na strongpela skul bilong Bikpela.

6:5  Ol wokboi, bihainim tok long ol husat i stap ol bosman bilong yupela bilong bihainim bodi sait, wantaim pret na guria, wantaim bel bilong yupela i gat wanpela tingting, olsem yupela i mekim i go long Kraist,

6:6  I no wantaim pasin bilong man i ken lukim, olsem ol man bilong amamasim bel bilong ol man, tasol olsem ol wokboi bilong Kraist, taim yupela i mekim laik bilong God i kam long bel.

6:7  Wantaim gutpela bel mekim wok, olsem yupela i mekim long Bikpela, na i no long ol man,

6:8  Taim yupela i save long wanem gutpela samting wanpela man i mekim, dispela wankain samting bai em i kisim long Bikpela, sapos em i slevman o friman.

6:9  Na, yupela ol bosman, mekim ol wankain samting long ol, taim yupela i stap isi long pasin bilong toktok long bagarapim ol, taim yupela i save long Bosman bilong yupela tu i stap long heven. Na tu i no gat pasin bilong tingim namba bilong ol man wantaim em.

6:10  ¶ Na las, ol brata bilong mi, stap strong insait long Bikpela, na insait long pawa bilong strong bilong em.

6:11  Putim olgeta klos pait bilong God, inap long yupela i ken stap inap long sanap na birua long ol trik bilong Seten.

6:12  Long wanem, yumi no pait birua long bodi na blut, tasol yumi birua long ol hetman bilong gavman, birua long ol pawa, birua long ol hetman bilong tudak bilong dispela graun, birua long ol pasin nogut long sait bilong spirit long ol ples antap.

6:13  Olsem na kisim i go long yupela olgeta klos pait bilong God, inap long yupela i ken stap inap long sanap strong na birua long dispela de nogut, na taim yupela i bin mekim olgeta samting, long sanap.

6:14  Olsem na sanap, taim ol namel bilong bel bilong yupela i pas nabaut wantaim tok tru, na taim yupela i gat klos pait bilong bros bilong stretpela pasin,

6:15  Na ol fut bilong yupela i redi wantaim su bilong gutnius bilong bel isi.

6:16  Na antap long olgeta, kisim plang bilong bilip tru, we wantaim dispela yupela bai stap inap long kilim i dai olgeta liklik spia paia bilong dispela man nogut.

6:17  Na kisim hat ain bilong kisim bek, na bainat bilong Spirit, dispela em i tok bilong God,

6:18  Taim yupela i beten olgeta taim wantaim olgeta prea na autim askim insait long Spirit, na was long en wantaim olgeta pasin bilong stap strong yet na autim askim bilong helpim olgeta seint,

6:19  ¶ Na long mi, inap long pasin bilong toktok God i ken givim long mi, inap long mi ken opim maus bilong mi wantaim pasin bilong i no pret, long mekim ol man long save long samting hait bilong gutnius,

6:20  Bilong dispela mi stap wanpela mausman bilong gavman insait long ol kalabus, inap long insait long en mi ken toktok wantaim pasin bilong i no pret, olsem mi mas toktok.

6:21  Tasol inap long yupela tu i ken save long ol samting bilong mi, na long mi stap olsem wanem, Tikikas, wanpela brata i stap klostu tru long bel na wanpela wokman insait long Bikpela yu inap bilip long em, bai mekim yupela long save long olgeta samting,

6:22  Husat mi bin salim long yupela bilong dispela as stret, inap long yupela i ken save long ol samting bilong mipela, na long em i ken givim bel isi long ol bel bilong yupela.

6:23  Bel isi i ken stap long ol brata, na laikim tru wantaim bilip tru, i kam long God Papa na Bikpela Jisas Kraist.

6:24  Marimari i ken stap wantaim ol olgeta husat i laikim tru Bikpela bilong yumi Jisas Kraist wantaim trupela bel. Amen.