Geez - Joshua - 6

6:1  ወኢያሪኮሰ ፡ ዕጹት ፡ ይእቲ ፡ ወጥቅም ፡ ዘላዕሌሃ ፡ ወአልቦ ፡ ዘይወፅእ ፡ እምውስቴታ ፡ ወአልቦ ፡ ዘይበውእ ።

6:2  ወይቤሎ ፡ እግዚአብሔር ፡ ለኢየሱስ ፡ ናሁ ፡ ኣገብኣ ፡ ለኢያሪኮ ፡ ውስተ ፡ እደዊክሙ ፡ ወለንጉሥ ፡ ዘውስቴታ ፡ እለ ፡ ጽኑዓን ፡ እሙንቱ ፡ ወኀያላን ።

6:3  ወአንተሰ ፡ አቅሞሙ ፡ ላዕሌሃ ፡ ውስተ ፡ ዐውዳ ፡ ለኵሎሙ ፡ መስተቃትላን ፡ ወይዑድዋ ፡ ለሀገር ፡ ኵሎሙ ፡ ዕደው ፡ መስተቃትላን ፡ ውስተ ፡ ዐውዳ ፡ በይእቲ ፡ ሀገር ፡ በበ ፡ ምዕር ፡ ወከማሁ ፡ ግበሩ ፡ ሰዱሰ ፡ መዋዕለ ።

6:4  ወበሳብዕቱ ፡ ካህናት ፡ ይነሥኡ ፡ ሰብዐተ ፡ አቅርንተ ፡ ዘኢዮቤል ፡ ቅድመ ፡ ታቦት ፡ ወአመ ፡ ሳብዕት ፡ ዕለት ፡ ስብዕ ፡ ይዑድዋ ፡ ለሀገር ፡ ወይንፍኁ ፡ ካህናት ፡ በእሙንቱ ፡ አቅርንት ።

6:5  ወሶበ ፡ ነፍኁ ፡ በእሙንቱ ፡ አቅርንት ፡ ዘኢዮቤል ፡ እምከመ ፡ ሰማዕክሙ ፡ ቃለ ፡ ቀርን ፡ ለይወውዑ ፡ ኵሎሙ ፡ ሕዝብ ፡ ኅቡረ ፡ ወእምከመ ፡ ወውዑ ፡ እሙንቱ ፡ ይወድቅ ፡ ለሊሁ ፡ አረፋቲሃ ፡ ለሀገር ፡ ታሕቴሆሙ ፡ ወይ[ባ]እ ፡ እንከ ፡ ኵሉ ፡ ሕዝብ ፡ ወይሩጹ ፡ አሐዱ ፡ አሐዱ ፡ ቅድመ ፡ ገጹ ፡ ውስተ ፡ ሀገር ።

6:6  ወቦአ ፡ ኢየሱስ ፡ ኀበ ፡ ካህናት ፡ ወይቤሎሙ ፡ ንሥኡ ፡ ታቦተ ፡ ሕግ ፡ ወሰብዐቱ ፡ ካህናት ፡ ይንሥኡ ፡ ሰብዐተ ፡ መጣቅዕተ ፡ ዘኢዮቤል ፡ በቅድመ ፡ እግዚአብሔር ።

6:7  ወይቤሎሙ ፡ እንዘ ፡ ይብል ፡ አዝዝዎሙ ፡ ለሕዝብ ፡ ከመ ፡ ይሑሩ ፡ ወይዑድዋ ፡ ለሀገር ፡ ወመስተቃትላንሂ ፡ ይሑሩ ፡ ምስለ ፡ ንዋየ ፡ ሐቅሎሙ ፡ ቅድመ ፡ ታቦቱ ፡ ለእግዚአብሔር ።

6:8  ወበከመ ፡ ይቤሎሙ ፡ ኢየሱስ ፡ ለሕዝብ ፡ ነሥኡ ፡ ሰብዐቱ ፡ ካህናት ፡ ሰብዐተ ፡ መጣቅዕተ ፡ ቅዱሳነ ፡ ከመ ፡ ይሑሩ ፡ ቅድመ ፡ እግዚአብሔር ፡ ወሐዊሮሙ ፡ ይጥቅዑ ፡ በኀይል ፡ ወበትእምርት ፡ ወታቦተ ፡ ሕጉሂ ፡ ለእግዚአብሔር ፡ ትተልዎሙ ።

6:9  ወመስተቃትላንሰ ፡ ፍጽመ ፡ የሐውሩ ፡ ወካህናት ፡ ይጠቅዑ ፡ በመጣቅዕት ፡ ወእለሂ ፡ ይኬውሉ ፡ ድኅረ ፡ ታቦተ ፡ ሕጉ ፡ ለእግዚአብሔር ፡ የሐውሩ ፡ እንዘ ፡ ይነፍኁ ፡ ቀርነ ።

6:10  ወአዘዞሙ ፡ [ኢየሱስ ፡] ለሕዝብ ፡ ከመ ፡ ኢያውክቱ ፡ ወአልቦ ፡ ዘይስማዕ ፡ ቃሎሙ ፡ መኑሂ ፡ ወከመ ፡ ኢይፃእ ፡ ቃል ፡ እምነ ፡ አፉሆሙ ፡ እስከ ፡ አመ ፡ ውእቱ ፡ ይኤዝዞሙ ፡ ከመ ፡ ይወውዑ ።

6:11  ወሖረት ፡ ታቦተ ፡ ሕጉ ፡ ለእግዚአብሔር ፡ ወዖደታ ፡ ለሀገር ፡ ወእምዝ ፡ ገብአት ፡ ውስተ ፡ ትዕይንት ፡ ወቤተት ፡ ህየ ።

6:12  ወበሳኒታ ፡ ዕለት ፡ ተንሥአ ፡ ኢየሱስ ፡ በጽባሕ ፡ ወካህናትኒ ፡ ጾሩ ፡ ታቦተ ፡ ሕጉ ፡ ለእግዚአብሔር ።

6:13  ወሰብዐት ፡ ካህናት ፡ ነሥኡ ፡ ሰብዐተ ፡ መጣቅዕተ ፡ ወሖሩ ፡ ቅድመ ፡ ታቦቱ ፡ ለእግዚአብሔር ፡ ወእምዝ ፡ ይተልው ፡ መስተቃትላን ፡ ወእምዝ ፡ ይተልው ፡ እለ ፡ ተርፉ ፡ ሕዝብ ፡ ወየሐውሩ ፡ ድኅረ ፡ ታቦተ ፡ ሕጉ ፡ ለእግዚአብሔር ፡ እንዘ ፡ ይነፍኁ ፡ በአቅርንት ፡ ወካህናትኒ ፡ ይጠቅዑ ፡ በመጣቅዕት ።

6:14  ወሕዝብኒ ፡ ኵሉ ፡ ዘተርፈ ፡ ዖድዋ ፡ ለሀገር ፡ አመ ፡ ሳኒት ፡ ዕለት ፡ እንዘ ፡ ይቀርብዋ ፡ ወእምዝ ፡ ካዕበ ፡ ገብኡ ፡ ውስተ ፡ ትዕይንት ፡ ወከመዝ ፡ ገብሩ ፡ ሰዱሰ ፡ መዋዕለ ።

6:15  ወኮነ ፡ አመ ፡ ሳብዕት ፡ ዕለት ፡ ተንሥኡ ፡ ጊዜ ፡ ይገውሕ ፡ ጽባሕ ፡ ወዖድዋ ፡ ከማሁ ፡ ለሀገር ፡ ስብዕ ፡ ወዳእሙ ፡ በይእቲ ፡ ዕለት ፡ ዖድዋ ፡ ስብዕ ፡ ለሀገር ።

6:16  ወኮነ ፡ ሶበ ፡ ዖድዋ ፡ ሰብዐተ ፡ ለሀገር ፡ ጠቅዑ ፡ ካህናት ፡ በመጣቅዕቲሆሙ ፡ ወይቤሎሙ ፡ ኢየሱስ ፡ ለደቂቀ ፡ እስራኤል ፡ ወውዑ ፡ እስመ ፡ አግብኣ ፡ እግዚአብሔር ፡ ለነ ።

6:17  ወአሕረምናሃ ፡ ለዛቲ ፡ ሀገር ፡ ወኵሉ ፡ ዘውስቴታ ፡ ለእግዚአብሔር ፡ ጸባኦት ፡ ትኩን ፡ ዘእንበለ ፡ ራኣብ ፡ ዘማ ፡ እንተ ፡ ታሐይው ፡ ኪያሃ ፡ ወኵሉ ፡ ዘሀለወ ፡ ውስተ ፡ ቤታ ፡ እስመ ፡ ኀብአቶሙ ፡ ለሰብአ ፡ ዐይን ፡ እለ ፡ ፈነውነ ።

6:18  ወአንትሙ ፡ ባሕቱ ፡ ዑቁ ፡ ኢትንሥኡ ፡ እምውስተ ፡ ዘሕሩም ፡ ዘአሕረምነ ፡ ኢትፍትው ፡ ወኢትንሥኡ ፡ እምውስቴቱ ፡ ወእመ ፡ አኮሰ ፡ ትገብርዋ ፡ ርግምተ ፡ ለትዕይንቶሙ ፡ ለደቂቀ ፡ እስራኤል ፡ ወትቀጠቅጡነ ።

6:19  ወኵሉ ፡ ወርቅ ፡ ወኵሉ ፡ ብሩር ፡ ወብርት ፡ ወኀፂን ፡ ቅዱሰ ፡ ለይኩን ፡ ለእግዚአብሔር ፡ ወውስተ ፡ መዝገበ ፡ እግዚአብሔር ፡ ይባእ ።

6:20  ወወውዑ ፡ ሕዝብ ፡ ወካህናትኒ ፡ ጠቅዑ ፡ በመጣቅዕት ፡ ወኅቡረ ፡ ወውዑ ፡ ኵሉ ፡ ሕዝብ ፡ በዐቢይ ፡ ውውዓ ፡ ወጽኑዕ ፡ ወወድቀ ፡ ኵሉ ፡ አረፋቲሃ ፡ ዘዐውዳ ፡ ወቦኡ ፡ ኵሉ ፡ ሕዝብ ፡ ውስተ ፡ ሀገር ፡ ወኵሎሙ ፡ ሮጹ ፡ ቅድሜሆሙ ፡ ወረከብዋ ፡ ለሀገር ።

6:21  ወአሕረማ ፡ ኢየሱስ ፡ ወኵሎ ፡ ዘሀለወ ፡ ውስቴታ ፡ ለይእቲ ፡ ሀገር ፡ እምተባዕቱ ፡ እስከ ፡ አንስቱ ፡ ወእምንዑሶሙ ፡ እስከ ፡ ልሂቆሙ ፡ ወእስከ ፡ ላህመ ፡ ወእስከ ፡ በግዐ ፡ ወእስከ ፡ አድገ ፡ ቀተሉ ፡ በኀፂን ።

6:22  ወይቤሎሙ ፡ ኢየሱስ ፡ ለእልክቱ ፡ ክልኤቱ ፡ ወራዙት ፡ ሰብአ ፡ ዐይን ፡ እለ ፡ ርእዩ ፡ ብሔረ ፡ [ሑ]ሩ ፡ ውስተ ፡ ቤታ ፡ ለእንታክቲ ፡ ብእሲት ፡ ዘማ ፡ ወአውፅእዋ ፡ እምህየ ፡ ወኵሎ ፡ ዘሀለወ ፡ ምስሌሃ ፡ በከመ ፡ መሐልክሙ ፡ ላቲ ።

6:23  ወቦኡ ፡ እልክቱ ፡ ክልኤቱ ፡ ወራዙት ፡ ሰብአ ፡ ዐይን ፡ እለ ፡ ርእይዋ ፡ ለይእቲ ፡ ሀገር ፡ ውስተ ፡ ቤታ ፡ ለይእቲ ፡ ብእሲት ፡ ወአውፅእዋ ፡ ለራኣብ ፡ ዘማ ፡ ወለአቡሃ ፡ ወለእማ ፡ ወለአኀዊሃ ፡ ወለኵሉ ፡ ዘመዳ ፡ ወኵሎ ፡ ዘባቲ ፡ ወአብጽሕዋ ፡ እስከ ፡ አፍአ ፡ እምነ ፡ ትዕይንቶሙ ፡ ለእስራኤል ።

6:24  ወውዕየት ፡ ሀገር ፡ ምስለ ፡ ኵሉ ፡ ዘውስቴታ ፡ በእሳት ፡ ዘእንበለ ፡ ወርቅ ፡ ወብሩር ፡ ወኵሉ ፡ ብርት ፡ ወኀፂን ፡ ዘአግብኡ ፡ ውስተ ፡ መዝገበ ፡ ቤቱ ፡ ለእግዚአብሔር ፡ ዘአብኡ ።

6:25  ወራኣብ ፡ ዘማ ፡ ወኵሉ ፡ ቤተ ፡ አቡሃ ፡ ዘአሕየወ ፡ ኢየሱስ ፡ ወነበረት ፡ ውስተ ፡ እስራኤል ፡ እስከ ፡ ዮም ፡ ወእስከ ፡ ዛቲ ፡ ዕለት ፡ እስመ ፡ ኀብአቶሙ ፡ ለሰብአ ፡ ዐይን ፡ እለ ፡ ፈነወ ፡ ኢየሱስ ፡ ከመ ፡ ይርአይዋ ፡ ለሀገር ፡ ኢያሪኮ ።

6:26  ወአምሐለ ፡ ኢየሱስ ፡ በይእቲ ፡ ዕለት ፡ ወይቤ ፡ ርጉመ ፡ ለይኩን ፡ ዘያነሥኣ ፡ ለይእቲ ፡ ሀገር ፤ በበኩሩ ፡ ለይሳርራ ፡ ወ[በ]ደኃሪ ፡ [ወል]ዱ ፡ ለያቅም ፡ ኆኅተ ፡ አንቀጻ ። ወከማሁ ፡ ገብረ ፡ [ኦዘን ፡] ዘእምነ ፡ ቤቴል ፤ በአቢሮን ፡ በኵሩ ፡ ሳረራ ፡ ወበደኃሪ ፡ [ወል]ዱ ፡ ዘድኅነ ፡ አቀመ ፡ ኆኅተ ፡ አንቀጻ ።

6:27  ወሀለወ ፡ እግዚአብሔር ፡ ምስሌሁ ፡ ለኢየሱስ ፡ ወበጽሐ ፡ ስሙ ፡ ውስተ ፡ ኵሉ ፡ ምድር ።