HebModern - Lamentations - 5

5:1  זכר יהוה מה היה לנו הביט וראה את חרפתנו׃

5:2  נחלתנו נהפכה לזרים בתינו לנכרים׃

5:3  יתומים היינו אין אב אמתינו כאלמנות׃

5:4  מימינו בכסף שתינו עצינו במחיר יבאו׃

5:5  על צוארנו נרדפנו יגענו לא הונח לנו׃

5:6  מצרים נתנו יד אשור לשבע לחם׃

5:7  אבתינו חטאו אינם אנחנו עונתיהם סבלנו׃

5:8  עבדים משלו בנו פרק אין מידם׃

5:9  בנפשנו נביא לחמנו מפני חרב המדבר׃

5:10  עורנו כתנור נכמרו מפני זלעפות רעב׃

5:11  נשים בציון ענו בתלת בערי יהודה׃

5:12  שרים בידם נתלו פני זקנים לא נהדרו׃

5:13  בחורים טחון נשאו ונערים בעץ כשלו׃

5:14  זקנים משער שבתו בחורים מנגינתם׃

5:15  שבת משוש לבנו נהפך לאבל מחלנו׃

5:16  נפלה עטרת ראשנו אוי נא לנו כי חטאנו׃

5:17  על זה היה דוה לבנו על אלה חשכו עינינו׃

5:18  על הר ציון ששמם שועלים הלכו בו׃

5:19  אתה יהוה לעולם תשב כסאך לדר ודור׃

5:20  למה לנצח תשכחנו תעזבנו לארך ימים׃

5:21  השיבנו יהוה אליך ונשוב חדש ימינו כקדם׃

5:22  כי אם מאס מאסתנו קצפת עלינו עד מאד׃