SP - Deuteronomy - 6

6:1  וזאת המצוה החקים והמשפטים אשר צוה יהוה אלהיכם ללמד אתכם לעשות בארץ אשר אתם עברים שמה לרשתה

6:2  למען תירא את יהוה אלהיך לשמר את כל חקיו ומצותיו אשר אנכי מצוך היום אתה ובנך ובן בנך כל ימי חייך ולמען יארכון ימיך

6:3  ושמעת ישראל ושמרת לעשות אשר ייטב לך ואשר תרבה מאד כאשר דבר יהוה אלהי אבתיך לך ארץ זבת חלב ודבש

6:4  שמע ישראל יהוה אלהינו יהוה אחד

6:5  ואהבת את יהוה אלהיך בכל לבבך ובכל נפשך ובכל מאדך

6:6  והיו הדברים האלה אשר אנכי מצוך היום על לבבך

6:7  ושננתם לבניך ודברת בם בשבתך בבית בלכתך בדרך בשכבך ובקומך

6:8  וקשרתם לאות על ידיך והיו לטטפות בין עיניך

6:9  וכתבתם על מזזות בתיך ובשעריך

6:10  והיה כי יביאך יהוה אלהיך אל הארץ אשר נשבע לאבתיך לאברהם ליצחק וליעקב לתת לך ערים גדלות וטובות אשר לא בנית

6:11  בתים מלאים כל טוב אשר לא מלאת ברות חצבים אשר לא חצבת כרמים וזיתים אשר לא נטעת ואכלת ושבעת

6:12  השמר לך פן תשכח את יהוה אלהיך אשר הוציאך מארץ מצרים מבית עבדים

6:13  את יהוה אלהיך תירא ואתו תעבד ובשמו תשבע

6:14  לא תלכו אחרי אלהים אחרים מאלהי העמים אשר סביבתיכם

6:15  כי אל קנא יהוה אלהיך בקרבך פן יחר אף יהוה אלהיך בך והשמידך מעל פני האדמה

6:16  לא תנסו את יהוה אלהיכם כאשר נסיתם במסה

6:17  שמר תשמרון את מצות יהוה אלהיכם ועדתיו וחקיו אשר צוך

6:18  ועשית הישר והטוב בעיני יהוה אלהיך למען ייטב לך ובאת וירשת את הארץ הטובה אשר נשבע יהוה לאבתיך

6:19  להדיף את כל איביך מפניך כאשר דבר יהוה והיה

6:20  כי ישאלך בנך מחר לאמר מה העדת החקים והמשפטים אשר צוה יהוה אלהינו אתכם

6:21  ואמרת לבנך עבדים היינו לפרעה במצרים ויוציאנו יהוה ממצרים ביד חזקה

6:22  ויתן יהוה אתות ומופתים גדלים ורעים במצרים בפרעה ובכל ביתו לעינינו

6:23  ואתנו הוציא משם למען הביא אתנו לתת לנו את הארץ אשר נשבע לאבתינו

6:24  ויצונו יהוה לעשות את כל החקים האלה ליראה את יהוה אלהינו לטוב לנו כל הימים ולהחיתנו כיום הזה

6:25  וצדקה תהיה לנו כי נשמר לעשות את כל המצוה הזאת לפני יהוה אלהינו כאשר צונו