Kekchi - Ezekiel - 34

34:1  Li Ka̱cuaˈ quia̱tinac cuiqˈuin ut quixye cue:

34:2  —At ralal cui̱nk, ye reheb li nequeˈiloc re li tenamit Israel nak ta̱cha̱lk raylal saˈ xbe̱neb. Ut ta̱ye reheb: Joˈcaˈin xye li Ka̱cuaˈ li nimajcual Dios. Raylal ta̱cha̱lk saˈ e̱be̱n la̱ex li nequex-iloc reheb laj Israel xban nak incˈaˈ nequeril chi tzˈakal li tenamit. Junes chokˈ e̱re nequeraj li us. ¿Ma incˈaˈ ta biˈ tento nak laj ilol xul ta̱ril chi us lix carner?

34:3  Nequerucˈ li leche ut nequerocsi li akˈej yi̱banbil riqˈuin rix li carner. Nequecamsi ut nequetiu xtibel li cha̱bil carner. Abanan incˈaˈ nequerileb chi us le̱ carner.

34:4  Incˈaˈ quetenkˈaheb li incˈaˈ cauheb rib, chi moco quebaneb li yaj, chi moco quelan ru lix tochˈolaleb. Ut incˈaˈ quesukˈisiheb li queˈel saˈ lix naˈajeb chi moco quesicˈ li queˈsacheˈ. Cau quextaklan saˈ xbe̱neb ut saˈ joskˈil.

34:5  Joˈcan nak queˈxchaˈchaˈi ribeb yalak bar xban nak ma̱cˈaˈ aj ilol reheb, ut quilajeˈtiˈeˈ xbaneb li joskˈ aj xul.

34:6  Eb lin carner yo̱queb chixbeninquil ribeb yalak bar saˈ eb li tzu̱l ut saˈ eb li xbe̱n bol. Ut saˈ chixjunil li ruchichˈochˈ queˈjeqˈui̱c ruheb. Ut ma̱ ani quisicˈoc reheb ut ma̱ ani quipatzˈoc reheb.

34:7  Joˈcan nak la̱ex aj ilol xul, cherabihak li cˈaˈru ninye la̱in li Ka̱cuaˈ Dios.

34:8  La̱in li yoˈyo̱quil Dios. Relic chi ya̱l tinye e̱re nak ma̱cˈaˈ eb aj ilol reheb lin carner. Xecanab chi elkˈa̱c lin carner ut xecanab chi camsi̱c xbaneb li joskˈ aj xul li cuanqueb saˈ qˈuicheˈ. La̱ex incˈaˈ nequesicˈ lin queto̱mk chi moco nequechˈolaniheb. Junes la̱ex nequechˈolani e̱rib.

34:9  Joˈcan ut la̱ex aj ilol xul, cherabihak li cˈaˈru naxye li Ka̱cuaˈ.

34:10  Joˈcaˈin naxye li nimajcual Dios: —La̱in yo̱ injoskˈil saˈ e̱be̱n la̱ex aj ilol xul ut tinqˈue saˈ e̱be̱n li cˈaˈru nequeˈxcˈul lin carner. Tincoleb che̱ru. Ma̱cuaˈ chic la̱ex tex-ilok reheb. La̱in tincuisiheb che̱ru re nak incˈaˈ chic yo̱kex chixtiubaleb. Incˈaˈ chic te̱chˈolani e̱rib e̱junes.

34:11  Joˈcaˈin quixye li nimajcual Dios: —Abiomak li tinye e̱re. La̱in tebinsicˈ lin carner toj retal tebintau ut la̱in chic tin-ilok reheb xban nak la̱in ninnauheb ru.

34:12  Joˈ nak laj ilol xul naxnau ru lix carner li jeqˈuinbileb ru, joˈcan ajcuiˈ nak tebinnau ru lin carner la̱in ut tebincol saˈ eb li naˈajej li cuanqueb cuiˈ chak li queˈjeqˈui̱c cuiˈ ruheb saˈ li cutan li kˈojyi̱n ru xban li raylal.

34:13  La̱in tincuisiheb chak lin carner saˈ eb li xni̱nkal ru tenamit ut tinchˈutubeb ru ut tincˈameb saˈ lix naˈajeb. La̱in tinqˈueheb chi cua̱nc saˈ eb li tzu̱l ut saˈ eb li ru takˈa ut saˈ eb li cha̱bil naˈajej aran Israel.

34:14  La̱in tebinqˈue chi ichajibc saˈ li cha̱bil pachˈayaˈ ut saˈ eb li tzu̱l li cuanqueb Israel tebinqˈue chi hila̱nc. Aran teˈcua̱rk saˈ li cha̱bil naˈajej. Ut tebinqˈue chi cuaˈac saˈ li kˈunil pim saˈ eb li tzu̱l li cuanqueb Israel.

34:15  Ut la̱in tincˈacˈale̱nk reheb lin carner. La̱in tinsicˈok re lix naˈajeb re teˈhila̱nk.

34:16  La̱in tinsiqˈueb chak li sachenakeb li queˈco̱eb saˈ jalan be ut tinqˈueheb chi sukˈi̱c saˈ xya̱nkeb li queto̱mk. La̱in tinban lix yocˈolal ut tinlan. Tinqˈue xcacuilaleb li yajeb. Ut la̱in tinsach ruheb li ni̱nkeb xtibel ut li cauheb rib. La̱in tin-ilok reheb lin carner saˈ ti̱quilal.

34:17  La̱in li nimajcual Dios ninye aˈin e̱re: La̱ex lin queto̱mk. La̱in tinrakok a̱tin saˈ e̱be̱n. Tincuisi lin carner saˈ xya̱nkeb li chiba̱t.

34:18  ¿Ma incˈaˈ ta biˈ tzˈakal riqˈuin nak nequetzaca li cha̱bil tzacae̱mk? ¿Ma toj tento ta biˈ nak te̱yekˈi saˈ e̱rok li incˈaˈ nequetzaca? La̱ex nequerucˈ li haˈ li sak ru ut nequetzˈajni ru riqˈuin le̱ rok li joˈ qˈuial chic nacana.

34:19  Eb lin carner nequeˈxtzaca li tzacae̱mk li quiyekˈi̱c saˈ e̱rok ut nequerucˈ li haˈ li nequetzˈajni ru la̱ex.

34:20  Joˈcan nak la̱in ninye e̱re nak tinrakok a̱tin saˈ xbe̱neb li carner. Tincuisiheb li ni̱nkeb xtibel saˈ xya̱nkeb li bakeb.

34:21  La̱ex nequetiquisiheb li ma̱cˈaˈeb xmetzˈe̱u riqˈuin le̱ tel ut nequexekˈeb toj retal nequera̱linaheb ut nequejeqˈui ruheb.

34:22  La̱in tincoleb lin carner re nak incˈaˈ chic teˈrahobtesi̱k. La̱in tinrakok a̱tin saˈ xbe̱neb lin carner.

34:23  La̱in tinqˈue aj ilol reheb. La̱in tinqˈue laj David laj cˈanjel chicuu chi iloc reheb ut aˈan tixchˈolaniheb.

34:24  La̱in li Ka̱cuaˈ. La̱inak lix Dioseb ut laj David laj cˈanjel chicuu ta̱takla̱nk saˈ xbe̱neb. La̱in li Ka̱cuaˈ xinyehoc re aˈin.

34:25  La̱in tinba̱nu jun li contrato riqˈuineb re nak teˈxcˈam ribeb saˈ usilal cuiqˈuin. Tincuisi chixjunileb li joskˈ aj xul saˈ lix naˈajeb re nak naru teˈcua̱nk yalak bar saˈ eb li cˈaleba̱l ut naru teˈcua̱rk saˈ eb li qˈuicheˈ chi ma̱cˈaˈ nachˈiˈchˈiˈin reheb.

34:26  La̱in tincuosobtesiheb ut tebincanab chi cua̱nc chixjun sutam lin tzu̱l. Tincuosobtesiheb ut tintakla li hab saˈ xkˈehil.

34:27  Eb li cheˈ teˈu̱chi̱nk ut li acui̱mk saˈ li cˈaleba̱l ta̱u̱chi̱nk. Ut chixjunileb teˈcua̱nk saˈ xnaˈajeb chi ma̱cˈaˈ ta̱chˈiˈchˈiˈi̱nk reheb. La̱in tincoleb saˈ rukˈeb li queˈnumta saˈ xbe̱neb ut queˈrahobtesin reheb. Ut riqˈuin aˈan teˈxqˈue retal nak la̱in li Ka̱cuaˈ.

34:28  Li xni̱nkal ru tenamit li incˈaˈ nequeˈxpa̱b li Dios incˈaˈ chic teˈxmakˈ chiruheb li cˈaˈru reheb, chi moco li joskˈ aj xul teˈxcamsiheb chokˈ xtibeb. Teˈcua̱nk ban chi saheb saˈ xchˈo̱l ut ma̱cˈaˈ ta̱seˈbesi̱nk reheb.

34:29  La̱in tinqˈue li cha̱bil chˈochˈ reheb re nak ta̱e̱lk li racui̱mkeb chi cha̱bil. Ut incˈaˈ chic ta̱cua̱nk li cueˈej saˈ lix tenamiteb. Ut incˈaˈ chic ta̱cˈutekˈ xxuta̱neb xbaneb li jalan xtenamiteb.

34:30  Chixjunileb teˈxqˈue retal nak la̱in li Ka̱cuaˈ lix Dioseb ut cua̱nkin riqˈuineb. Eb laj Israel, aˈaneb lin tenamit.

34:31  La̱ex aj Israel, la̱ex lin carner. La̱in ninchˈolanin e̱re. La̱ex lin tenamit ut la̱in le̱ Dios, chan li nimajcual Dios.