LinVB - Galatians - 1

1:1  Ngáí Pólo, nazalí apóstolo ; bato batíndí ngáí té, moto mǒ­kó mpé té aponí ngáí o mosálá môná. Bobélé Yézu Krístu moto aponí ngáí, yě na Nzámbe Tatá óyo asé­kwísí yě o bawá.

1:2  Ngáí na bandeko bánso bazalí áwa totíndélí bakrístu ba Eklézya ya Galáta monkandá moye.

1:3  Nzámbe Tatá wa bísó na Mokonzi wa bísó Yézu Krístu bákabela bínó ngrásya na bobóto.

1:4  Krístu amíkabí mpô ya masúmu ma bísó, mpô ’te álongola bísó o mabé ma nsé eye, sé lokóla Nzá-mbe Tatá wa bísó alingákí.

1:5  Nkémbo na yě Tatá o bileko na bileko ! Amen.

1:6  Nakámwí míngi mpô botíkí nokí boye Nzámbe óyo abyángí bínó na ngrásya ya Krístu, mpé bokómí kondima Nsango Elámu esúsu.

1:7  Nsango Elámu ya íbalé ezalí té, nzókandé bato basúsu bazalí kokótisa ntembe o mitéma mya bínó ; balingí kobébisa Nsango Elámu ya Krístu.

1:8  Bôngó, atâ bísó mǒkó atâ ǎnzelú óyo aútí o likoló ayéí kosa­ngela bínó Nsango Elámu ekeséní na eye bísó tosangélákí bínó, mabé mákwêla yě !

1:9  Maye nasílí nayébísákí bínó, nakoloba mangó lisúsu sikáwa : Sókó moto ayéí kosangela bínó Nsango Elámu ekeséní na eye bínó bosílí boyambí, mabé mákwêla yě !

1:10  Bôngó bokanísí ’te nazalí koluka ’te bato bándima ngáí tǒ Nzámbe ándima ngáí ? Nazalí koluka ndé kosepelisa bato ? Sókó nazalákí koluka naíno kosepelisa bato, mbele nazalákí mosáleli wa Krístu té.

1:11  Bandeko, bóyéba ’te Nsango Elámu eye nakosangelaka eútí na bato té :

1:12  nazwí yangó epái ya moto té, moto mǒkó mpé té alakísí ngáí yangó, kasi Yézu Krístu óyo abimélí ngáí, yě mpenzá alakísí ngáí yangó.

1:13  Ntembe té, bínó boyébí ezaleli ya ngáí ya libosó, ntángo naza­lákí kolanda mibéko mya ba-Yúda : nazalákí konyókolo Eklézya ya Nzámbe míngi mpenzá, mpé namekákí koboma yangó.

1:14  Nalandákí mibéko mya ba-Yúda malámu, mpé leká bato baíké ba ekólo ya ngáí, baye bakokánákí na ngáí na mbúla, natíákí motéma mónso na maye bankóko batíkélí bísó.

1:15  Kasi Nzámbe óyo aponókí ngáí út’o libumu lya mamá, abyángí ngáí na ngrásya ya yě.

1:16  Mokolo mǒkó andimákí kolakisa ngáí Mwána wa yě mpô ’te nákende kosangela nkómbó ya yě o bikólo bisúsu. Nalukákí mayéle epái ya bato té.

1:17  Nakendékí mpé o Yerúzalem té epái ya baye bakómí bapóstolo libosó lya ngáí, kasi nakendékí o Arábia, na nsima nazóngákí o Damásko.

1:18  Nsima ya mibú mísáto nakendékí o Yerúzalem mpô ’te nákútana na Pétro ; nafándákí epái ya yě póso íbalé.

1:19  Namónókí apóstolo mosúsu té, tíká sé Yakóbo, ndeko wa Mokonzi.

1:20  Maye nakomélí bínó áwa, nazalí kosakola mangó o míso ma Nzámbe, yě moto ayébí ’te nazalí kobúka lokutá té.

1:21  Na nsima nakendékí o Síria mpé o Silísia ;

1:22  kasi bandeko bakrístu ba Biklézya bya Yudéa, bayébákí ngáí naíno té.

1:23  Bangó bayókákí bobélé ’te : « Moto óyo azalákí konyókolo bísó libosó, akómí sikáwa kosakola eya­mba eye alingákí koboma. »

1:24  Mpé bakúmísí Nzámbe mpô ya maye asálí ngáí.