Kapingamarangi - I Chronicles - 19

19:1  Nomuli-mai, gei Nahash di king o Ammon, gaa-made, gei dana dama-daane go Hanun gaa-pono di lohongo o-maa, gaa-hai di king.

19:2  Di King David ga-helekai, “Au e-hai gii-buni gi Hanun be-di hai o dono damana go Nahash nogo hai-mai gi-di-au.” Deelaa-laa David ga-hagau ana daangada e-hagi-anga gi mee dono huaidu ono lodo gi-di made o dono damana. I di-nadau dau i Ammon, digaula ga-heetugi gi-di king Hanun.

19:3  Nia dagi digau Ammon ga-helekai gi-di king. “Goe e-hagabau bolo ma di mee i-lodo di hagalaamua o do damana dela David ne-hagau-mai ana daane aanei belee hagi-adu dono huaidu ono lodo gi-di-goe? E-donu hagalee! Mee ne-hagau-mai digaula gi kinei belee hagadina tenua hagatau deenei gii-mee-ai dana kumi gaa-dagi!”

19:4  Hanun gaa-kumi digau kae hegau a David, gaa-dahi gi-daha nia ngaahulu nadau ngudu, ga-duuduu gi-daha nia gahu digaula tugi nia gaba, ga-hagau digaula gii-hula.

19:5  Digaula gu-langaadia di-nadau hula gi nadau guongo. Di madagoaa David ne-longono di mee dela ne-hai, mee gaa-kae dana haga-iloo gi digaula gi-noho-hua i Jericho, gaa-dae-loo gi-nia ngaahulu nadau ngudu guu-tomo gi ono lohongo.

19:6  King Hanun mo digau Ammon gu-modongoohia-ginaadou bolo ginaadou guu-hai David gii-hai di-nadau hagadaumee, dela gaa-hidi-ai digaula ga-dahi-aga nia pauna silber e-madahidu maa-lima mana-(75,000) gaa-hui nadau waga-hongo-henua dagi go nia hoodo mai i Mesopotamia i-baahi i-nua, mo mai i nnenua llauehe go Maacah mo Zobah ala i Syria.

19:7  Nia waga hongo-henua e-motolu maa-lua mana-(32,000) ala ne-hui go digaula mo-di gau-dauwa o King Maacah gu-loomoi guu-hau nadau hale-laa guu-noho-ai hoohoo gi Medeba, gei digau Ammon labelaa gu-loomoi gi-daha mo nadau waahale huogodoo, gu-haga-togomaalia ga-hai-tauwa.

19:8  Di madagoaa David ne-longono-ia nia mee ala guu-hai, mee ga-hagau a Joab mo-di hagabuulinga gau-dauwa hagatau.

19:9  Digau Ammon gaa-hula gaa-noho i-di ngudu di abaaba dela e-hana gi Rabbah go di-nadau waahale damana, gei nia king ala ne-loomoi belee hagamaamaa guu-hai di-nadau lohongo i-hongo tenua maalama.

19:10  Joab gu-gidee-ia nia hagabuulinga gau-dauwa ala belee heebagi gi ginaadou mai mua mo mai muli. Mee ga-hilihili digau-dauwa o Israel ala e-kaedahi gaa-dugu digaula gi-di lohongo dela e-huli-adu gi digau Syria.

19:11  Gei mee gaa-dugu digau ala ne-dubu gi dono duaahina go Abishai gi-dagi-ina, gei Abishai gaa-dugu digaula i-di lohongo dela e-huli-adu gi digau Ammon.

19:12  Joab ga-helekai gi mee, “Maa goe gu-gidee bolo digau Syria ga-haga-magedaa au, gei goe hanimoi e-hagamaamaa-mai au; maa digau Ammon ga-haga-magedaa goe, gei au ga-hanadu ga-hagamaamaa goe.

19:13  Gi-maaloo gei gi-hagamataane! Gidaadou gi-maaloo e-heebagi i tadau daangada mo nia waahale o tadau God. Di hiihai o Dimaadua gii-gila i tadau baahi.”

19:14  Joab mo ana gau-dauwa ga-lloo-adu belee heebagi, gei digau Syria gaa-hula guu-llele gi-daha.

19:15  Digau Ammon ma-gaa-mmada gi digau Syria guu-llele gi-daha, digaula gaa-hula gaa-llele gi-daha mo Abishai, gaa-hula gi-lodo di waahale deelaa. Gei Joab gaa-hana labelaa gi Jerusalem.

19:16  Digau Syria gu-iloo bolo ginaadou gu-haga-magedaa go digau Israel. Digaula gaa-hula ga-laha-mai nadau gau-dauwa i-nia guongo o Syria ala i-bahi-i-dua di monowai Euphrates, gaa-dugu digaula gi-lala nia mogobuna o Shobach, di tagi digau-dauwa o Hadadezer go di king o Zobah.

19:17  Di madagoaa David ne-longono di mee deenei, gei mee ga-haga-dagabuli-mai di llongo-dauwa o Israel, gaa-tuu-adu laa-lodo di monowai Jordan, ga-haganoho digaula i-di lohongo dela e-huli-adu gi digau Syria. Tauwa gu-daamada,

19:18  gei digau Israel gu-hagabagi digau-dauwa o Syria gi-muli. David mo ana gau-dauwa gu-daaligi nadau daane o Syria e-hidu mana-(7,000) ala nogo deledele nia waga hongo-henua, ge madahaa mana-(40,000) gau-dauwa ala e-taele i-lala. Digaula gu-daaligi labelaa a Shobach go di tagi-dauwa o Syria.

19:19  Nia king ala nogo i-lala nia mogobuna o Hadadezer ga-iloo-laa bolo ginaadou gu-haga-magedaa go digau Israel, gaa-hai di-nadau dangidangi di noho di aumaalia gi David, gei nomuli digaula guu-hai nia daangada ni mee. Digau Syria gu-hagalee-loo e-hiihai e-hagamaamaa digau Ammon labelaa.