Kapingamarangi - I Chronicles - 23

23:1  Di madagoaa David ne-dau gi dono madumadua, mee gu-hagamenege-aga dana dama-daane go Solomon guu-hai di king o Israel.

23:2  Di King David gu-haga-dagabuli nia dagi huogodoo o digau Israel gi-di gowaa e-dahi, mo digau hai-mee-dabu, mo digau Levi huogodoo.

23:3  Mee guu-hai dana hihi nia daangada, e-hihi di hulu daane huogodoo o Levi ala guu-tugi nia ngadau e-motolu be nonua. Di hulu damana huogodoo e-motolu maa-walu mana-(38,000).

23:4  Di king gu-haga-ingoo nia daane e-madalua maa-haa mana-(24,000) e-hai nia moomee o-di Hale Daumaha, mo-nia daane e-ono mana-(6,000) e-madamada humalia di hagailongo nia mee gi-lodo nia beebaa mo e-haga-donu nia lagalagamaaloo hai-baahi gii-donu,

23:5  mo-nia daane e-haa mana-(4,000) e-hai nadau moomee hagaloloohi nia bontai di abaaba di Hale Daumaha, mo nia daane e-haa mana-(4,000) di-nadau moomee e-hai nadau daahili e-hagaamu Dimaadua, digaula e-hai nadau daahili gi-nia mee hai-daahili ala ne-haga-togomaalia go di king ang-gi di moomee.

23:6  David guu-wwae nia daangada o Levi guu-hai nia hagabuulinga e-dolu, e-hagatau gi-nia hagadili o nadau madahaanau llauehe go Gershon, Kohath, mo Merari.

23:7  Gershon ana dama-daane dogolua go Ladan mo Shimei.

23:8  Ladan guu-hai ana dama-daane dogodolu go Jehiel, Zetham, mo Joel.

23:9  Digaula ala go nia dagi o-nia madahaanau llauehe ne-hagadili-mai Ladan. (Shimei guu-hai ana dama-daane dogodolu go Shelomoth, Haziel, mo Haran).

23:10  Shimei guu-hai ana dama-daane dogohaa go Jahath, Zina, Jeush, mo Beriah, e-hagatau-ia di mmaadua. Jeush mo Beriah digi hai nau hagadili e-logo, malaa, meemaa e-dau be-di madahaanau damana e-dahi.

23:11  Shimei guu-hai ana dama-daane dogohaa go Jahath, Zina, Jeush, mo Beriah, e-hagatau-ia di mmaadua. Jeush mo Beriah digi hai nau hagadili e-logo, malaa, meemaa e-dau be-di madahaanau damana e-dahi.

23:12  Kohath guu-hai ana dama-daane dogohaa go Amram, Izhar, Hebron, mo Uzziel.

23:13  Tama-daane madua a-maa go Amram go tamana o Aaron mo Moses. (Aaron mo ono hagadili gu-dugu-gee e-madamada humalia nia hegau hagamadagu ga-hana-hua beelaa. Digaula e-dudu nia ‘incense’ i-di madagoaa e-hai taumaha ang-gi Dimaadua, e-hai nia hegau a-Maa, e-hagalaamua nia daangada i-di ingoo o-Maa.

23:14  Nia dama-daane Moses, taane ni God, e-dau gi-di baahi o-di madawaawa Levi.)

23:15  Moses guu-hai ana dama-daane dogolua go Gershom mo Eliezer.

23:16  Shebuel go tama madua di madahaanau o Gershom.

23:17  Eliezer ne-hai dana dama-daane e-dahi go Rehabiah, gei Rehabiah ono hagadili e-dogologo.

23:18  Togo-lua dama-daane a Kohath go Izhar, guu-hai dana dama-daane go Shelomith, tagi o-di madahaanau damana.

23:19  Togo-dolu dama-daane a Kohath go Hebron, guu-hai ana dama-daane dogohaa go Jeriah, Amariah, Jahaziel, mo Jekameam.

23:20  Togo-haa dama-daane a Kohath go Uzziel, guu-hai ana dama-daane dogolua go Micah mo Isshiah.

23:21  Merari guu-hai ana dama-daane dogolua go Mahli mo Mushi. Mahli guu-hai ana dama-daane dogolua go Eleazar mo Kish,

23:22  gei Eleazar gaa-made digi hagadili ana dama-daane, nia dama-ahina la-hua. Nia dama-ahina a-maa guu-hai nadau lodo gi-nia dama-daane o tuaahina-daane o di-nadau damana, nia dama-daane a Kish.

23:23  Togo-lua dama-daane a Merari go Mushi guu-hai ana dama-daane dogodolu go Mahli, Eder, mo Jeremoth.

23:24  Aanei nia hagadili o Levi mai nia madahaanau llauehe mo-nia madahaanau lligi. Tangada-nei mo tangada-nei e-hihi dono ingoo gi-lodo di beebaa. Tei i ono hagadili e-madalua be nonua nadau ngadau, guu-hai dono waawa hegau i-di moomee o-di Hale Dimaadua.

23:25  David ga-helekai, “Dimaadua go di God o Israel, gu-hagauda di noho di aumaalia gi ana daangada, gei Mee gaa-noho i Jerusalem ga-hana-hua beelaa.

23:26  Malaa, digau Levi guu-lawa di-nadau moomee di-dagidagi di Hale-Laa e-noho Dimaadua no-lodo mo nia goloo hagamadagu huogodoo ala nogo hai nia hegau di madagoaa e-daumaha.”

23:27  Aanei nia helekai hagamuliagina a David, “Digau Levi huogodoo ala guu-tugi nia ngadau e-madalua e-hai gi-hihi nadau ingoo ang-gi nia moomee.”

23:28  Digaula guu-duwwe gi-nia moomee aanei: E-hagamaamaa digau hai-mee-dabu ala mai di hagadili o Aaron i-nia daumaha o-di Hale Daumaha, ge e-madamada humalia di malaelae dela i-lodo di abaaba mo nia ruum, ge e-mmada gi-nia goloo hagamadagu huogodoo gi-de-dogolia,

23:29  ge e-madamada humalia nia palaawaa hai-tigidaumaha, mo-nia palaawaa-mada ala e-hai-hegau nia tigidaumaha, mo-nia palaawaa lahilahi ala ono ‘yeast’ ai, mo-nia tigidaumaha ala e-daa, mo-nia palaawaa e-unugi gi-nia lolo-olib, ge e-pauna mo-di hagatau nia tigidaumaha o-di Hale Daumaha,

23:30  ge e-hagaamu mo-di hagamadamada Dimaadua nia luada huogodoo mo nia hiahi huogodoo,

23:31  mo nia madagoaa nia tigidaumaha ma-gaa-dudu ang-gi Dimaadua i-di Laangi-Sabad, mo-di Budu o-di Malama Hoou, mo nia budu ala i-golo. Nia haganoho ne-hau e-hagamodongoohia di hulu dangada Levi dogohia ala e-haga-ingoo gi-di moomee i tolongo e-dahi. Digau Levi la-gu-haga-ingoo gi tegau dela e-hai daumaha ang-gi Dimaadua i-nia madagoaa huogodoo.

23:32  Digaula guu-wanga ginai tegau e-madamada humalia di Hale-Laa e-noho Dimaadua no-lodo mo-di Hale Daumaha, ge e-hagamaamaa nadau duaahina, digau hai-mee-dabu mai di hagadili o Aaron, i-lodo di Hale Daumaha.