Kapingamarangi - I Chronicles - 14

14:1  Malaa, Hiram di king o digau Tyre ga-hagau ana daangada kae-hegau gi David, mono laagau-‘cedar’, mono gau hai-hadu, mono degitanga, bolo gii-hula hauhia di hale o David.

14:2  David ga-iloo-laa bolo Dimaadua gu-haga-noho bolo ia di king o Israel, gei gu-haga-maluagina dono henua ang-gi ana daangada digau Israel.

14:3  I Jerusalem, David guu-hai ono lodo e-logo, guu-hai labelaa ana dama-daane mono dama-ahina.

14:4  Aanei la-nia dama-daane a-maa ala ne-hai i Jerusalem: Shammua, Shobab, Nathan, Solomon,

14:5  Ibhar, Elishua, Elpelet,

14:6  Nogah, Nepheg, Japhia,

14:7  Elishama, Beeliada, mo Eliphelet.

14:8  Di madagoaa digau Philistia ne-longono bolo David guu-hai di king i-hongo tenua go Israel hagatau, nadau gau-dauwa guu-hula belee kumi a-mee. David ga-hanadu belee heetugi gi digaula.

14:9  Digau Philistia guu-dau i-di gowaa mehanga gonduu o Rephaim, gei gu-daamada gu-heebagi gi digau ala i-golo, guu-kae nia goloo digaula.

14:10  David ga-heeu gi Dimaadua, “E-humalia bolo au gaa-hana ga-heebagi gi digau Philistia? Goe gaa-hai au gi-maaloo?” Dimaadua ga helekai gi mee, “Uaa, hana, heebagi! Au ga-dugu-adu gi-di-goe gi-maaloo!”

14:11  Malaa, David ga-heebagi gi digaula i Baal=Perazim gu-maaloo. Mee ga-helekai, “God ne-daaligi ogu hagadaumee i-ogu mua, gadoo be-di labagee e-haga-bongoo di abaaba o-di monowai.” Deenei-laa di gowaa deelaa gu-haga-ingoo bolo Baal=Perazim.

14:12  Di madagoaa digau Philistia ne-llele gi-daha, digaula gu-diiagi nadau ada balu-ieidu, gei-ogo David gaa-hai dana hagamodu bolo nia maa gi-duungia.

14:13  Digi duai, gei digau Philistia gu-loomoi gi-muli gi-di gowaa baba deelaa, gu-daamada gu-heebagi labelaa e-kae nia goloo digaula.

14:14  David ga-heeu labelaa gi God, dela ga-helekai, “Hudee heebagi mai i-kinei. Haganiga laa-tua, ga-heebagi mai di baahi dela i-golo, hoohoo gi-nia laagau-‘balsam’.

14:15  Do madagoaa ga-longono di lee o digau e-taele i-hongo nia laagau aalaa, goe heebagi hagalimalima, idimaa, Au e-hana i oo mua, e-haga-magedaa digau-dauwa o Philistia.”

14:16  David guu-hai be nia haganoho a God ne-hai. Mee ne-daaligi digau Philistia mai-loo i Gibeon gaa-hana gaa-tugi i Gezer.

14:17  Di longo o David guu-dele guu-tugi i-nia madagowaa huogodoo, gei Dimaadua guu-hai nia henua llauehe huogodoo gi-mmaadagu i mee.