UyCyr - I Chronicles - 28

28:1  Давут падиша Исраилдики барлиқ әмәлдарларни, йәни һәрқайси қәбилиләрниң башлиқлирини, падишаға хизмәт қиливатқан һәрқайси һәрбий қисимларниң ләшкәр башлирини, миңбеши, йүзбашлирини, падиша вә шаһзадиләрниң мал-мүлүк, чарвилирини башқурғучиларни, орда хизмәткарлирини, баһадирларни вә башқа барлиқ батур җәңчиләрни Йерусалимға чақиртти.

28:2  Давут падиша орнидин туруп, уларға мундақ деди: — Қериндашлирим, хәлқим, гепимгә қулақ селиңлар! Мән әсли Пәрвәрдигарниң пут қойғучи болған келишим сандуғини сақлайдиған бир ибадәтхана салмақчи едим. Мән буниң үчүн қурулуш тәйярлиқлирини пүтирип қойған едим.

28:3  Лекин Худа: «Мениң нам-шәривим үчүн ибадәтханини сән салсаң болмайду, чүнки сән илгири көп җәңләрни қилип, нурғун адәмләрниң қенини төктүң», деди.

28:4  Һалбуки, Пәрвәрдигар — исраиллар етиқат қилип кәлгән Худа пүтүн җамаитимиз ичидин мени таллап, Исраил хәлқиниң мәңгүлүк падишаси қилип тиклиди. Чүнки У бу таллашта Йәһуда қәбилисини асас қилди, Йәһуда қәбилиси ичидин атамниң җамаитини мувапиқ көрди. Атамниң оғуллири ичидин У мени Исраилниң падишаси қилип тикләшни халиди.

28:5  Пәрвәрдигар маңа көп оғул бәрди һәм бу оғуллиримниң арисидин Сулайманни Исраилниң падишалиғиға таллап, Пәрвәрдигарниң падишалиқ тәхтигә олтарғузди.

28:6  Пәрвәрдигар маңа: «Мениң ибадәтханамни вә һойлилиримни оғлуң Сулайман салиду. Мән Сулайманни Өзәмгә оғул қилип таллидим, Мән униң Атисидурмән.

28:7  Әгәр у бүгүнкидәк Мениң әмир-пәрманлиримни һәр дайим қәтъий иҗра қилса, Мән униң тәхтини мәңгү мустәһкәм қилимән», деди.

28:8  Шуниң үчүн һазир мән Пәрвәрдигарниң җамаити болған пүтүн исраил хәлқи алдида, шундақла Худайимизниң гувалиғида силәргә шуни ейтимәнки, силәр Пәрвәрдигариңлар Худаниң барлиқ әмирлириниң бириниму қалдурмай иҗра қилишиңлар керәк. Шундақ қилғандила, мана бу гөзәл зиминға егә болалайсиләр, шундақла уни әвлатлириңларғиму мәңгү мирас қилип қалдуралайсиләр.

28:9  Оғлум Сулайман, атаң етиқат қилип кәлгән Худани тонуғин, пүтүн җан-дилиң вә ихтиярлиғиң билән Униң хизмитидә болғин. Чүнки У һәрбир инсанниң көңлидикини, униң нийитини билиду. Әгәр сән Уни издисәң, Уни чоқум тапалайсән, әгәр сән Униңдин йүз өрүсәң, Уму сени мәңгү ташлап кетиду.

28:10  Гепимгә қулақ сал, Пәрвәрдигар муқәддәс җай болған ибадәтханини селишқа сени таллиған екән, жүрәклик бол, бу ишқа бәл бағла!

28:11  Давут ибадәтханиниң қурулмисини, йәни ибадәтханиниң айвини, амбарлири, жуқури вә ичкири ханилириниң һәм әң муқәддәс җай — гунадин паклиниш җайиниң лайиһәсини оғли Сулайманға бәрди.

28:12  Давут униңға йәнә ибадәтханиниң һойлилири, әтрапидики өйләр вә Худаға аталған соғатларни сақлайдиған ғәзниләр һәққидиму Пәрвәрдигарниң өзиниң көңлигә салғанлири бойичә көрсәтмә бәрди.

28:13  Давут униңға йәнә роһанийлар вә лавийларни қандақ тәшкилләшкә, уларниң ибадәтханида қилидиған хизмәтлиригә вә хизмәт қилғанда ишлитилидиған буюмларға аит ишларниму чүшәндүрди.

28:14  Униңға йәнә Худаниң хизмитидә ишлитилидиған түрлүк буюмларға кетидиған алтун, күмүчниң миқдари,

28:15  йәни һәрбир алтун вә күмүч, чирақ вә чирақданларниң ишлитилидиған орниға қарап, униңға кетидиған алтун вә күмүчниң миқдари,

28:16  Худаға аталған нанларни қойидиған алтун ширәләргә кетидиған алтунниң миқдари вә күмүч ширәләргә кетидиған күмүчниң миқдари,

28:17  һәрбир алтун ара, алтун дас, алтун комзәк вә алтун, күмүч тәхсиләргә кетидиған алтун вә күмүчниң миқдари,

28:18  алтун исриқданға кетидиған алтунниң миқдарини бәлгүләп бәрди. Шундақла алтун һарвудики Пәрвәрдигарниң келишим сандуғиниң үстини ечилған қанатлири билән йепип туридиған алтун керубниң лайиһәсиниму Сулайманға бәрди.

28:19  Давут мундақ деди: — Мән буларниң һәммисини Пәрвәрдигарниң маңа Өз қоли билән көрсәткәнлири бойичә бирму-бир тәпсилий йезип чиқтим.

28:20  У оғли Сулайманға йәнә: — Сән қәйсәр вә җасарәтлик бол, ишни башла! Һәргиз қорқма һәм чүшкүнләшмә. Чүнки Пәрвәрдигар Худа, йәни мән етиқат қилип кәлгән Худа сән билән биллидур. Шуңа Пәрвәрдигарниң ибадәтханиси чоқум қурулиду, Пәрвәрдигар сәндин һәргиз айрилмайду, сени ташлимайду.

28:21  Мана қара, Худаниң ибадәтханисида роһанийлар вә лавийлар һәрқандақ хизмәтләрни қилишқа тәйяр туриду. Уста һүнәрвәнләрму саңа җан-дили вә ихтиярлиғи билән ярдәм қилиду. Пүтүн әмәлдар вә хәлиқ сениң буйруғуңға бойсуниду, — деди.