UyCyr - I Chronicles - 16

16:1  Улар Худаниң келишим сандуғини Давут униңға атап тиктүргән чедирға әкирип қойди. Улар Худаға атап көйдүрмә вә аманлиқ қурванлиқлири қилди.

16:2  Шуниңдин кейин Давут хәлиққә Пәрвәрдигарниң нами билән бәхит тилиди.

16:3  Йәнә пүтүн хәлиққә, әр-аял демәй һәрбир адәмгә бирдин нан, хорма қеқи вә кишмиш бөлүп бәрди.

16:4  Давут бир қисим лавийларни Пәрвәрдигарниң келишим сандуғи алдида хизмәттә болушқа, йәни дуа-тилавәт қилишқа Исраилниң Пәрвәрдигари Худаға рәхмәт-тәшәккүр ейтишқа вә мәдһийә оқушқа тайинлиди.

16:5  Уларниң беши Асаф болуп, униң ярдәмчиси Зикирия еди. Улардин башқилири Йииел, Шимирамот, Йихиел, Маттитя, Әлиаб, Биная, Обед-Идом вә Йииеллар еди. Улар чилтар вә лира челишқа буйрулди. Асаф җаң чалғучи болди.

16:6  Биная билән Яхазиел дегән икки роһаний Худаниң келишим сандуғи алдида һәр дайим канай челишқа буйрулди.

16:7  Шу күни Давут тунҗа қетим Асаф вә қериндашлирини Пәрвәрдигарға һәмдусана ейтишқа бәлгүлиди:

16:8  Пәрвәрдигарға шүкүрләр ейтиңлар, Униң шәнигә мәдһийиләр оқуңлар, Карамәтлирини әлләр ара баян қилиңлар!

16:9  Худани күйләңлар қетип нахша-нәғмигә, Мөҗүзилирини Униң җакалаңлар һәммигә.

16:10  Улуқлаңлар муқәддәс хисләтлирини Худаниң, Қәлби шатлансун Пәрвәрдигарни сеғинғанларниң.

16:11  Тәлпүнүңлар Худаниң қудритигә-күчигә, Интилиңлар һәм Униң һозуриға-меһригә.

16:12  Есиңларда болсун Униң карамәтлири, Мөҗүзилири вә чиқарған һөкүмлири,

16:13  Әй Худаниң қули, Исраилниң нәсиллири, У Өзи таллиған Яқупниң әвлатлири.

16:14  У Пәрвәрдигардур, У бизниң Худайимиздур, Униң һөкүмлири һәммә йәрдә күчкә егидур.

16:15  Униң түзгән келишими әбәдий ядидидур, Бу Униң мәңгүгә вәдә қилған сөзидур.

16:16  Пәрвәрдигар Ибраһим билән келишим түзгән еди, Исһаққиму қәсәм ичкән еди.

16:17  У буни Яқупқиму низам қилип бәргән еди. Исраилға мәңгүлүк келишим қилип мундақ дегән еди:

16:18  «Қанан зиминини сениң мүлкүң қилимән, Уни саңа тәәллуқ несивәң қилимән».

16:19  У чағда улар наһайити аз санлиқ еди, Нәзәрдә йоқ һәм мусапир еди.

16:20  Улар жутму-жут сәрсән еди, Әлдин-әлгә кезәр еди.

16:21  Худа һечкимниң уларни езишигә йол қоймиди, Уларни дәп падишаларниму мундақ агаһландурди:

16:22  «Мениң таллиғанлиримға тәгмәңлар, Пәйғәмбәрлиримгә зиянкәшлик қилмаңлар».

16:23  Нахша ейтиңлар Пәрвәрдигарға, Әй җаһан әһли, баян әйләп һәр күни Униң ниҗатлиғини.

16:24  Тарқитиңлар шан-шәривини әлләр ара, Әҗайип ишлирини хәлиқ ара.

16:25  Улуқ болғач Пәрвәрдигар дайима, У лайиқтур һәссиләп мәдһийилинишкә, Үстүн болғач У барлиқ «илаһлардин», Пәқәт Ула әрзийду әйминишкә.

16:26  Пәқәт буттур башқиларниң илаһлири, Амма Худа яратқандур асманларни.

16:27  Орап турар шан-шәрәп вә бүйүклүк Уни, Қудрәт вә шат-хорамлиққа толғандур Униң тураргаһи.

16:28  Махтаңлар, әй әл-қовумлар, Пәрвәрдигарни, Күйләңлар Униң шан-шөһрәт вә қудритини.

16:29  Пәрвәрдигар шәривигә мунасип һәмдусана оқуңлар, Худаниң һозуриға һәдийә билән кириңлар. Әй җаһан әһли, Пәрвәрдигардин қорқуңлар, Парлақ, муқәддәс Пәрвәрдигарға сәҗдә қилиңлар, Бәрһәқ, дуния мустәһкәм, тәврәнмәстур.

16:30  Пәрвәрдигар шәривигә мунасип һәмдусана оқуңлар, Худаниң һозуриға һәдийә билән кириңлар. Әй җаһан әһли, Пәрвәрдигардин қорқуңлар, Парлақ, муқәддәс Пәрвәрдигарға сәҗдә қилиңлар, Бәрһәқ, дуния мустәһкәм, тәврәнмәстур.

16:31  Шатлансун йәр-җаһан, хуш болсун асманлар, Ейтишсун әлләр ара: «Пәрвәрдигар әң алий Һөкүмрандур».

16:32  Тәнтәнә қилишсун деңиз вә униңдики җанлиқлар, Яйрисун далалар, униңдики чарвилар.

16:33  Нахша ейтсун Егимиз алдида орманлар, Чүнки Пәрвәрдигар җәзмән келиду дунияға һөкүмранлиқ қилишқа.

16:34  Пәрвәрдигарға шүкүр ейтиңлар, Чүнки У шапаәтликтур, Униң муһәббити мәңгүлүктур.

16:35  Йәнә шундақ дәп ейтиңлар: — Әй Ниҗаткар болған Худайимиз, Қутқузғин бизни, Ят әлләр арисидин қайта жиғип әкәлгин бизләрни. Шунда Сени мәдһийиләйли, күйләйли, Шу муқәддәс намиңға шүкүр-рәхмәт ейтайли.

16:36  Мәдһийиләнгәй мәңгүдин-мәңгүгә, Исраилларни таллиған Пәрвәрдигар! Андин кейин пүтүн халайиқлар «амин» дейишип, Пәрвәрдигарға һәмдусана оқушти.

16:37  Давут Асаф билән униң қериндашлирини һәр күни Пәрвәрдигарниң келишим сандуғи алдида давамлиқ хизмәттә болуш вәзиписигә қалдуруп қойди.

16:38  Уларниң ичидә Обед-Идом билән униң қериндашлиридин атмиш сәккиз киши бар еди. Шуниңдәк Йидутунниң оғли Обед-Идом билән Хосаһ дәрвазивәнликкә қоюлди.

16:39  Давут роһаний Задоқ билән униң роһаний қериндашлирини Гибъондики муқәддәс җайға тикилгән Пәрвәрдигарниң ибадәт чедирида хизмәт қилишқа тайинлиди.

16:40  Улар Пәрвәрдигарниң исраилларға чүшәргән Тәврат қанунида йезилғини бойичә һәр күни әтигини, ахшими қурванлиқ суписи үстидә Пәрвәрдигарға атап көйдүрмә қурванлиқларни сунушқа буйрулди.

16:41  Улар билән биллә болғанлар, йәни Һеман, Йидутун вә қалған талланғанлар, шундақла барлиқ исми тизимланғанлар Пәрвәрдигарға һәмдусана ейтишқа буйрулди, чүнки «Униң меһир-муһәббити мәңгүлүктур».

16:42  Һеман вә Йидутун болса сазәндиликкә, җүмлидин канай, җаң вә Худа үчүн челинидиған барлиқ сазларни челип, мәдһийә нахшилирини ейтишқа җавапкәр қилинди. Йидутунниң оғуллири дәрвазиға қарашқа қоюлди.

16:43  Шуниңдин кейин көпчилик өз өйлиригә қайтишти, Давутму өз аилисидикиләргә бәхит тиләшкә қайтти.