I SAMUEL
Chapter 9
I Sa | Kapingam | 9:1 | Dahi daane mai di madawaawa Benjamin dono ingoo go Kish, di tama ni Abiel, di tama ni Zeror, di tama ni Becorath, di tama ni Aphiah. Kish taane maluagina huoloo. | |
I Sa | Kapingam | 9:2 | Dana dama-daane dono ingoo go Saul, tama-daane madanga gei e-maaloo, holongo e-looloo di piidi e-dahi i-hongo nia dama-daane ala i-golo i Israel, gei e-humalia nnuaidina digau ala i-golo. | |
I Sa | Kapingam | 9:3 | Kish ana ‘donkey’ guu-nngala, gei mee ga-helekai gi Saul, “Hula goolua mo dahi dangada hai-hegau, halahala-ina-mai nia maa.” | |
I Sa | Kapingam | 9:4 | Meemaa gaa-hula laa-lodo tenua gonduu o Ephraim, gaa-dau-adu-loo gi Shalishah gei digi gidee-ginaua, ga-lloo-adu laa-lodo tenua go Shaalim, gei digi gidee-ginaua, ga-lloo-adu laa-lodo tenua go Benjamin, gei ginaua digi gidee nia maa. | |
I Sa | Kapingam | 9:5 | Meemaa gaa-dau-adu gi Zuph, gei Saul ga-helekai gi dono ehoo deelaa, “Gidaua gaa-hula gi tau guongo, holongo dogu damana la-ga-hagalee haa-manawa i ana ‘donkey’, dela-hua ga-haa-manawa i gidaua.” | |
I Sa | Kapingam | 9:6 | Gei dono ehoo ga-helekai gi Saul, “Nnoo-malaa, ma iai taane haga-madagu e-noho i-lodo di waahale deenei, e-hagalabagau huoloo i-baahi o-nia daangada, idimaa, ana helekai ala ma-ga-helekai-ai le e-kila huogodoo. Gidaua gaa-hula gi-baahi o mee, holongo mee ga-hagi-mai gi gidaua di gowaa dela e-iai nia ‘donkey’.” | |
I Sa | Kapingam | 9:7 | Saul ga-heeu-adu gi mee, “Maa gidaua gaa-hula gi-baahi o mee, gei gidaua ga-kisakis tau-aha gi mee, tau meegai ala i-lodo tau gada la-guu-odi, malaa, di-aha gaa-wanga go gidaua gi mee?” | |
I Sa | Kapingam | 9:8 | Gei di hege ga-helekai gi Saul, “Dahi baahi e-haa o-di bahihadu silber deenei, deelaa tau mee gaa-wanga gi taane a God, gei mee ga-hagi-mai tau ala dela e-hula-ai gidaua gi-nia maa.” | |
I Sa | Kapingam | 9:9 | (I-mua i Israel, maa tangada e-hiihai bolo ia e-heeu dana mee gi God, gei mee ga-helekai boloo: “Hanimoi, gidaua gaa-hula gi-baahi taane haga-madagu”, idimaa taane haga-madagu le e-gahi go digaula gi soukohp.) | |
I Sa | Kapingam | 9:10 | Gei Saul ga-helekai gi dana hege, “E-humalia, hanimoi-laa, gaa-hula.” Gei meemaa gaa-hula gi-di waahale dela e-noho-ai taane haga-madagu. | |
I Sa | Kapingam | 9:11 | Meemaa ga-lloo-adu laa-hongo di gowaa nnoonua, e-hula gi-di waahale deelaa, ga-heetugi gi-nia dama-ahina ala e-lloo-ia belee udu nadau wai, ga-heeu gi digaula, “Taane haga-madagu le e-noho i ginei?” | |
I Sa | Kapingam | 9:12 | Gei digaula ga-helekai-anga, “Uaa, i-golo. Mmada, mee deenaa e-hana i gulu mua. Hula gi-limalima dolomeenei, idimaa, mee dogo hanimoi-hua gi-di-madau waahale, idimaa digaula e-hai di-nadau tigidaumaha dangi-nei i-di gowaa hai-tigidaumaha dela i-nua. | |
I Sa | Kapingam | 9:13 | Goolua gaa-dau i-di waahale, gei goolua ga-gidee a-mee i-mua dono hana gi-di gowaa hai-tigidaumaha deelaa. Nia daangada la-hagalee e-miami gaa-dae-loo gi mee gaa-dau i-golo, idimaa, ma go mee dela e-hagadabu tigidaumaha deelaa, gei nomuli gei digaula gaa-mee-laa di-miami.” | |
I Sa | Kapingam | 9:14 | Meemaa gaa-hula gi-di waahale gaa-dau i-golo. I di-nau ulu-adu-hua, gei meemaa ga-gidee-ginaua a Samuel dela bolo gaa-hana gi-di gowaa hai-tigidaumaha dela i-nua belee daumaha i-golo. | |
I Sa | Kapingam | 9:15 | Di laangi i-mua o Saul ne-dau-mai gi-di waahale deelaa, gei Dimaadua gu-helekai gi Samuel boloo, | |
I Sa | Kapingam | 9:16 | “Daiaa, holongo i-di madagoaa beenei, gei Au ga-hagau-adu dagu dangada mai i-di madawaawa Benjamin, gei goe gi-hagatulu-ina a-mee e-hai di tagi ni agu dama Israel. Go mee dela ga-haga-dagaloaha digaula gi-daha mo digau Philistia. Au gu-gidee nadau hagaduadua, gei Au gu-longono-e-Au nadau dangidangi gi-hagamaamaa-ina ginaadou.” | |
I Sa | Kapingam | 9:17 | Di madagoaa-hua Samuel ne-gidee-ia Saul, gei Dimaadua ga-helekai-anga, “Deenaa taane dela nogo helekai-iei Au adu gi-di-goe. Go mee dela gaa-dagi agu daangada.” | |
I Sa | Kapingam | 9:18 | Saul ga-hanadu gi Samuel i taalinga di bontai di abaaba ga-heeu-adu gi mee, “Dumaalia-mai-mua, hagia-mai-mua di gowaa dela e-noho-ai taane haga-madagu la-i-hee?” | |
I Sa | Kapingam | 9:19 | Samuel ga-helekai, “Ko-au deenei dela go taane haga-madagu. Goolua hula i-ogu mua gi-di gowaa dela e-hai-ai taumaha. Goolua dogolua le e-miami dalia au dangi-nei. Luada daiaa, gei au ga-helekai-adu gi gulu heeu huogodoo, gaa-lawa ga-hagau goolua. | |
I Sa | Kapingam | 9:20 | Gei goe hudee haa-manawa i-nia ‘donkey’ ala ne-nngala i-nia laangi e-dolu, idimaa, nia maa guu-kida. Gei tangada koai dela e-haa-manawa huoloo iei digau Israel e-hidihidi ginai huoloo? Deenei dela go kooe, mo-di madawaawa o do damana.” | |
I Sa | Kapingam | 9:21 | Gei Saul ga-helekai-anga, “Au tangada mai i-di madawaawa Benjamin, go di madawaawa Israel dela e-kaedahi e-dulii-loo, mo dogu madahaanau dela hagalee dau i-lodo di madawaawa deenei, gei goe ga-hai-mai au helekai beenaa beleiaha?” | |
I Sa | Kapingam | 9:22 | Samuel gaa-lahi a Saul mo dana hege gi-lodo di ruum damana ga-haga-noho meemaa gi-di libogo teebele i-baahi digau motolu ala ne-gahi-mai. | |
I Sa | Kapingam | 9:23 | Samuel ga-helekai gi tangada hai meegai, “Gaamai di goneiga dela ne-helekai-iei au bolo gi-dugua gi-daha.” | |
I Sa | Kapingam | 9:24 | Tangada hai meegai ga-gaamai di goneiga humalia o-di wae, gaa-dugu gi-mua o Saul. Samuel ga-helekai gi Saul, “Mmada, deenei di goneiga dela ne-dugudugu-adu gi-di-goe, geina, ma di mee ne-dugu belee gai kooe dolomeenei, e-miami dalia digau ala ne-gahi-mai ko-au.” Saul ga-miami dalia Samuel i-di laangi deelaa. | |
I Sa | Kapingam | 9:25 | I di-nau hagatanga-ia i-di gowaa nogo daumaha-ai, meemaa gaa-hula gi-di waahale, ga-hagatogomaalia di lohongo Saul i-tua di hale i-nua. | |
I Sa | Kapingam | 9:26 | Gei mee gaa-kii i-golo. Heniheni-loo, gei Samuel ga-gahigahi a Saul i dono noho i-nua, “Ala-aga, au ga-hagau goe.” Gei Saul gu-ala-aga, mee mo Samuel gaa-hula i-hongo di ala. | |