CSlElizabeth - Isaiah - 33

33:1  Горе обидящым вас! Вас никтоже и изобидит, и отвергаяй вас не отвержет: пленени будут отметающии (вас) и предадятся, и яко молие в ризе, тако побеждени будут.

33:2  Господи, помилуй ны, на Тя бо уповахом: бысть племя непокаряющихся в пагубу, спасение же наше во время печали.

33:3  Гласом страха Твоего ужасошася людие от страха Твоего, и разсеяшася языцы.

33:4  Ныне же соберутся корысти вашя малаго и великаго: якоже аще кто соберет пруги, тако наругаются вам.

33:5  Свят Бог живый в вышних, наполнися Сион суда и правды.

33:6  В законе предадятся, в сокровищих спасение наше, тамо премудрость и хитрость и благочестие ко Господеви: сия суть сокровища правды.

33:7  Се, ныне во страсе вашем тии убоятся: ихже боястеся, возопиют от вас: вестницы бо послани будут горце плачущеся, просяще мира.

33:8  Опустеют бо сих путие: преста страх языков, и завет иже к ним вземлется, и не вмените их в человеки.

33:9  Восплакася земля, посрамлен Ливан, блато бысть Саронь: явлена будет Галилеа и Хермель.

33:10  Ныне воскресну, глаголет Господь, ныне прославлюся, ныне вознесуся.

33:11  Ныне узрите, ныне ощутите, тщетна будет крепость духа вашего: огнь вы пояст.

33:12  И будут языцы пожжени, аки терние на ниве разметано и пожжено.

33:13  Услышат дальнии, яже сотворих, (глаголет Господь,) уведят приближающиися крепость Мою.

33:14  Отступиша, иже в Сионе, беззаконницы, приимет трепет нечестивыя: кто возвестит вам, яко огнь горит? Кто возвестит вам место вечное?

33:15  Ходяй в правде, глаголяй правый путь, ненавидяй беззакония и неправды и руце оттрясаяй от даров: отягчаваяй ушы, да не услышит суда крове: смежаяй очи, да не узрит неправды,

33:16  сей вселится во высоце пещере камене крепкаго: хлеб ему дастся и вода его верна.

33:17  Царя со славою узрите, и очи ваши узрят землю издалеча,

33:18  душа ваша поучится страху Господню: где суть книгочии? Где суть совещавающии? Где есть изчитаяй питаемыя малы и велики люди?

33:19  Имже не совещаше, ниже ведяше глубокий глас имущаго, яко не слышати людем уничтоженым, и несть слышащему смысла.

33:20  Се, Сион град, спасение наше, очи твои узрят, Иерусалиме, граде богатый, кущы не поколеблются, ниже подвигнутся колие храмины его в вечное время, и ужя его не преторгнутся.

33:21  Яко имя Господне велико вам есть, место вам будет, реки и ровенницы широцы и пространни: не пойдеши по сему пути, ниже пойдет корабль пловущь:

33:22  Бог бо мой велик есть: не минет мене Господь судия наш, Господь князь наш, Господь царь наш, Господь Той нас спасет.

33:23  Прервашася ужя твоя, яко не укрепишася: щогла твоя преклонися, не распустит ветрил, не воздвигнет знамения, дондеже предастся на пленение: темже мнози хромии плен сотворят,

33:24  и не рекут: труждаемся, людие живущии в них, оставися бо им грех.