Kapingamarangi - Job - 1

1:1  Dahi daane dono ingoo go Job, e-noho i Uz. Mee e-daumaha ang-gi God ge manawa-dahi. Mee tangada humalia, e-hagaligaliga i-daha mo nia huaidu.

1:2  Mee ana dama-daane dogohidu ge dogodolu dama-ahina.

1:3  Mee ana siibi e-hidu-mana-(7,000), ge dolu-mana-(3,000) ‘camel’, ge dahi mana-(1,000) kau, ge lima-lau-(500) ‘donkey’. Mee ana gau ngalua dogologo, gei di-maa go mee labelaa dela koia e-maluagina i-nia henua i bahi-i-dua.

1:4  Nia dama-daane Job e-hagadau haihai nadau hagamiami. Nia madagoaa digaula ma-gaa-hai nadau hagamiami, digaula e-haga-gahi-mai labelaa nadau duaahina-ahina dogodolu gi nadau hagamiami.

1:5  Nia luada o dono daiaa o-nia hagamiami, gei Job e-ala haga-luada-loo, e-hai dana tigidaumaha i ana dama huogodoo, e-haga-madammaa digaula. Mee e-haihai di mee deenei, idimaa, mee e-hagabaubau bolo holongo ana dama gu-hai-hala ang-gi God ge gu-hai-baahi gi Mee gei digaula e-de-iloo.

1:6  Dahi laangi hua, nia daangada di-langi ga-hagagila gi-mua o Dimaadua, gei Setan nogo i-baahi digaula labelaa i-di madagoaa deelaa.

1:7  Dimaadua ga-helekai gi mee, “Goe nogo hai dau-aha?” Setan ga-helekai, “Au nogo-heehee-hua i-nia gowaa huogodoo, e-haganiga henuailala.”

1:8  Dimaadua ga-heeu gi mee, “Goe gu-gidee dagu dangada hai-hegau go Job? Deai dahi dangada i-hongo henuailala e-manawa-dahi ge e-humalia be mee ai. Mee e-daumaha-mai gi-di-Au, gei mee e-hagaligaliga huoloo gi-dee-hai dana mee huaidu.”

1:9  Setan ga-heeu, “Job le e-mee di-daumaha hua igolo adu gi-di-Goe maa mee ga ono hagahumalia mai doo baahi ai?

1:10  Nia madagoaa huogodoo Goe e-benebene a-mee mo digau dono hale mo ana mee huogodoo. Gei Goe e-hagahumalia ana mee huogodoo ala e-hai, gei Goe guu-wanga gi mee nia mee e-logo, nia manu a-maa guu-logo i-lodo henua.

1:11  Malaa, dolomaa Goe gaa-daa gi-daha nia mee huogodoo mo mee, gei mee ga-hagahuaidu Goe i oo mua!”

1:12  Dimaadua ga-helekai gi Setan, “Nia mee a-maa huogodoo gu-i-lala o mogobuna, malaa, goe hudee hagahuaidu-ina tuaidina o-maa.” Malaa, Setan gaa-hana gi-daha mo Dimaadua.

1:13  Dahi laangi hua, nia dama Job ne-hai di-nadau hagamiami i-di hale di tama madua.

1:14  Tangada kae-hegau ga-lele-ia gi Job, ga-helekai, “Gimaadou nogo hagamaluu di hadagee gi-nia kau, gei nia ‘donkey’ nogo i-lodo nia geinga hoohoo-mai,

1:15  gei digau Sabea ga-lloomoi, ga-daaligi nia maa ga-gaiaa nia maa. Digaula gu-daaligi au gau ngalua huogodoo, ko-au hua modogoau dela ne-lele hagammuni belee hagi-adu gi-di-goe!”

1:16  Mee dela bolo ga-hagaodi ana helekai, gei tuai dangada hai-hegau ga-hanaga labelaa ga-helekai: “Di ila guu-daba, gu-daaligi nia siibi guu-mmade, gei digau hagaloohi-siibi huogodoo guu-mmade, gei ko-au hua modogoau dela ne-lele hagammuni belee hagi-adu gi-di-goe!”

1:17  Mee deelaa bolo ga-hagaodi ana helekai, gei tuai dangada hai-hegau ga-hanaga labelaa ga-helekai, “Nia buini-dauwa e-dolu o digau Chaldea gu-heebagi-mai gi gimaadou, guu-kae nia ‘camel’, gu-daaligi au gau ngalua huogodoo guu-mmade, ko-au hua modogoau dela ne-lele hagammuni belee hagi-adu gi-di-goe.”

1:18  Mee deelaa bolo ga-hagaodi ana helekai, gei tuai dangada hai-hegau ga-hanimoi ga-helekai labelaa, “Au dama nogo-hai di-nadau hagamiami i-di hale dau dama-daane madua,

1:19  malaa di madangi ne-gono-mai i-hongo di anggowaa gaa-ili di hale gii-hinga, gu-daaligi digaula huogodoo gii-mmade, ko-au hua modogoau dela ne-lele hagammuni belee hagi-adu gi-di-goe.”

1:20  Job gu-manawa-gee, ga-du-gi-nua ga-hahaahi ono goloo. Mee gaa-dahi dono libogo ga-haga-hinga-ia gi-hongo di gelegele.

1:21  Mee ga-helekai, “Au ne-haanau-mai, gei agu mee ai, gei au gaa-made deai agu mee ai. Dimaadua ne-gaamai gi-di-au, gei dolomeenei, Mee guu-kae nia maa gi-daha mo au. Dono ingoo gi-hagalaamua-ina!”

1:22  Ma e-aha maa nia mee huogodoo ala ne-hai, gei Job digi hai-hala i-di hagaanga nia huaidu gi God.