Kapingamarangi - Job - 31

31:1  “Au guu-hai dagu hagababa bolo au hagalee daumada di ahina i-nia maanadu huaidu.

31:2  Di God Mogobuna e-hai dana-aha mai gi gidaadou? Dehee di hai a-Mee e-hui tadau hangaahai?

31:3  Mee e-hagau-mai dana hagaduadua e-hagahuaidu digau ala e-hai nadau huaidu.

31:4  God e-iloo nia mee huogodoo ala e-hai ko-au, ge e-gidee ogu hanga-heehee huogodoo.

31:5  “Au e-hagamodu bolo au hagalee hai di huaidu ge hagalee hagamada e-halahalau tei dangada.

31:6  God la-gi-hagadina-ina au gi-di mee pauna-mee dela e-hai-donu, gi-gidee Ia be au e-humalia behee.

31:7  Maa nei bolo au guu-huli gi-daha mo-di ala dela e-donu, be dogu huaidina la-gu-hiihai gi-di huaidu, be ogu lima la-gu-dogolia gi-nia huaidu,

31:8  maa e-hai beelaa laa, daaligidia agu hagadili be wanga-ina agu mee ne-dogi gi nnuai daangada gi-geina.

31:9  “Maa nei bolo au gu-hiihai gi-di lodo o tangada dela i dogu baahi, ge gu-talitali hagammuni i-daha mo di bontai di ahina deelaa,

31:10  malaa, dogu lodo gi-heia nia meegai tuai daane, gei gii-kii labelaa i-hongo di moenge o tuai daane.

31:11  Nia huaidu ala beenei le e-haga-langaadia belee hui-hua gi-di made.

31:12  E-hai gadoo be-di ahi maaloo-dangihi dela e-dudu agu mee huogodoo ala e-hai-mee ginai au.

31:13  “Di madagoaa dagu dangada hai-hegau gaa-hai ono donu mai gi-di-au, gei au gu-hagalongo gi mee, ge guu-hai a-mee hagahumalia.

31:14  Maa nei bolo au hagalee ne-hai beelaa, gei au gaa-duu i-mua nnadumada o God behee? Au ga-helekai gi God bolo-aha, maa God ga-hanimoi belee hagi-aga au?

31:15  Di God dela ne-hai au i-lodo tinae dogu dinana, la-go Mee labelaa dela ne-hai agu daangada hai-hegau i-lodo nia dinae nadau dinana.

31:16  “Nia madagoaa huogodoo, gei au nogo hagamaamaa digau hagaloale, digi heia nia ahina nadau lodo ai gii-noho huaidu,

31:17  be nia dama nadau maadua ai gii-noho hiigai gei au e-maaluu.

31:18  I-lodo dogu mouli hagatau, au gu-benebene digaula.

31:19  Au ga-gidee tangada e-haingadaa ang-gi deia, e-deemee di hui ono goloo,

31:20  gei au e-wanga gi mee nia goloo ala ne-hai gi-nia ngaahulu ala ne-gaamai i-baahi agu siibi, gei mee ga-tenetene-aga i-lodo dono manawa ga-hagaamu au.

31:21  “Maa nei bolo au ne-halahalau di tama ono maadua ai, bolo au gaa-wiini i-lodo di gabunga,

31:22  malaa, ogu lima e-humalia-hua e-hadihadi, gii-mmodu gi-daha mo ogu bakau.

31:23  Idimaa au dela e-madagu nia hagaduadua a God, au e-deemee di hai di-mee beelaa.

31:24  “Au hagalee-loo e-hagadagadagagee gi-nia maluagina,

31:25  be e-hagapuu i ogu goloo ala gu-hai-mee ginai au i-lodo dogu lima.

31:26  Au digi daumaha ang-gi di laa i-lodo dono maalama, be-di malama i-lodo dono madamada.

31:27  Au digi hagamaanadu belee hagalaamua di laa be-di malama i-di hongi dogu lima e-haga-modongoohia bolo au e-hagalaamua nia maa.

31:28  Di huaidu dela e-hai beenei e-humalia-hua e-hagaduadua gi-di made, dela e-haga-de-iloo di God Mogobuna.

31:29  “Au digi manawa tenetene ang-gi ogu hagadaumee i-di nadau madagoaa e-haingadaa ang-gi ginaadou.

31:30  Au digi hai-hala i-di dalodalo bolo ginaadou gii-mmade.

31:31  Nia daane huogodoo ala e-ngalua-mai gi-di-au le e-iloo huogodoo bolo au e-hila ang-gi digau mai-daha huogodoo.

31:32  Au e-haga-ulu digau heehee mai mogowaa gi-lodo dogu hale, hagalee hai digaula gii-kii i-hongo nia ala.

31:33  “Nia daangada ala i-golo e-daalo hagammuni nadau mee hala, gei au hagalee hagammuni ogu huaidu.

31:34  Au hagalee-loo e-madagu i-nia daangada i nadau helekai, gei au digi noho dee-muu be e-noho-hua i-lodo dogu hale, i dogu madagu i nadau helekai hai-baahi mai gi-di-au.

31:35  “Ma hagalee tangada e-hagalongo gi agu helekai ala e-helekai-iei au ai? Au e-haga-donu bolo nia helekai huogodoo le e-donu. Di God Mogobuna la-gi-helekai-mai gi-di-au! Maa nei bolo nia helekai hagahuaidu mai baahi tangada dela e-hai-baahi mai gi-di-au la-guu-hihi gi-lala, gei au e-mee di-mmada gi-nia maa,

31:36  malaa, e-donu au e-tenetene di-dugu-aga nia maa gi-hongo dogu libogo gaa-hai be-di hau-king, ga-taiaga gi-nua gi-gidee digau huogodoo.

31:37  Au ga-hagi-anga gi God agu mee huogodoo ala ne-hai, ge daahi-aga dogu libogo gi-nua loo i ono mua.

31:38  “Maa nei bolo au ne-gaiaa di gowaa dela e-hai dagu hadagee i tangada dana gowaa donu,

31:39  be au ne-gai nia meegai ala e-tomo i-golo, gei gu-diiagi digau hai-hadagee gi-hiigai,

31:40  maa e-hai beelaa, le e-humalia-hua go nia geinga mono balu laagau gii-tomo i-lodo di hadagee deelaa, e-pono nia ‘barley’ mono ‘wheat’.” Nia helekai a Job gu-hagaodi.