Kapingamarangi - Judges - 7

7:1  Gideon mo ana gau-dauwa huogodoo ga-aala-aga hagaluada, ga-haga-duu-aga nadau hale-laa i-baahi tama-monowai uwa-aga go Harod. Di waahale-laa digau Midian la i-hongo di gowaa mehanga gonduu i-di baahi gi-ngeia digaula i-baahi di Gonduu Moreh.

7:2  Dimaadua ga-helekai gi Gideon, “Au gau-dauwa le e-dogologo balua maa Au gaa-hai digaula gi-maaloo i digau Midian. Dolomaa digaula ga-helekai bolo ginaadou ne-maaloo mai hua i ginaadou, ge hagalee hagalaamua dogu mogobuna.

7:3  Haga-iloo-ina gi-nia daangada boloo, ‘Di-ingoo-hua tangada dela e-madagu, e-humalia e-hana gi dono hale, gei gidaadou gaa-noho i ginei i-di Gonduu Gilead.’ ” Malaa, nia daane e-madalua maa-lua mana-(22,000) ne-hula gi-muli, gei nia daane e-madangaholu mana-(10,000) ne-noho.

7:4  Dimaadua ga-helekai labelaa gi Gideon, “Au daangada le e-dogologo hua igolo. Lahia digaula gi-lala gi-di monowai, gei Au gaa-wwae digaula i-golo. Maa Au ga-helekai bolo taane deelaa e-hana i oo muli, gei mee e-hana i oo muli. Maa Au ga-helekai bolo taane deelaa hagalee hana i oo muli, gei mee hagalee hana.”

7:5  Gideon gaa-lahi ana gau-dauwa gi-baahi nia wai i-lala, gei Dimaadua ga-helekai gi mee, “Dugua-gee digau huogodoo ala ma-ga-inu-aga nia wai gi nadau holole gadoo be nia paana gi-daha mo digau huogodoo ala e-togo gi-lala gi-hongo nadau duli ga-inu-laa nadau wai.”

7:6  Nia daane e-dolu-lau ala e-huai nadau wai gi nadau lima ga-inu, gei digau huogodoo ala i-golo la-ne-togo gi-lala gi-hongo nadau duli ga-inu.

7:7  Dimaadua ga-helekai gi Gideon, “Au ga-benebene goe gi-daha mo nia haingadaa, gaa-hai goe gi-maaloo i digau Midian, e-hai-hegau gi digau e-dolu-lau ala nogo inu nadau wai gi nadau babaalima. Helekai gi digau ala i-golo huogodoo bolo gii-hula gi nadau guongo.”

7:8  Gideon ga-hagau digau Israel huogodoo gi nadau hale, aalaa-hua go digau e-dolu-lau ne-noho, ala nogo benebene nia goloo mo nia buu-‘trumpet’ o digau ala ne-hula. Nia hale-laa digau dauwa Midian la i-bahi-i-lala digaula i-hongo di gowaa mehanga gonduu.

7:9  Di boo hua deelaa, gei Dimaadua ga-helekai gi Gideon, “Du-gi-nua, hana heebagi gi digau Midian i nadau waahale-laa, idimaa, Au e-gowadu gi-di-goe di maaloo.

7:10  Maa goe e-madagu di heebagi, gei goe hana gi-di waahale-laa digaula, mo dau dangada hai-hegau go Purah.

7:11  Gei goe ga-longono be digaula e-helehelekai bolo-aha, gei goe ga-manawa-maaloo bolo e-heebagi.” Malaa, Gideon mo dana dangada hai-hegau go Purah gaa-hula gi-lala gi taalinga di gowaa o-nia hagadaumee.

7:12  Digau Midian, digau Amalek mo digau o-nia madawaawa o-di anggowaa le e-modoho gi-daha i-hongo di gowaa mehanga gonduu deelaa, e-logowaahee e-hai gadoo be-di waa-lamu-bege, ge nia ‘camel’ digaula e-logowaahee labelaa be nia gelegele i tongotai.

7:13  Di madagoaa Gideon ne-dau-adu gi-di waahale-laa digaula, mee ga-longono-ia tangada e-helekai gi dono ehoo i dana midi dela ne-hai. Mee e-helekai boloo, “Au ne-midi bolo di hagamunga palaawaa dela ne-hai-mai i-nia huwa o-di laagau-‘barley’ ne-doo-iha gi-lodo tadau waahale-laa, ga-nngenge i-di hale-laa. Di hale-laa deelaa la-guu-hinga guu-moe baabaa i-hongo di gelegele.”

7:14  Di hoo o-maa ga-helekai, “Ma go tulumanu-dauwa o tangada Israel, Gideon, go di tama a Joash! Ma e-deemee di-hai tuai hadinga! God la-guu-wanga gi mee di maaloo i digau Midian mo tadau gau-dauwa hagatau!”

7:15  Di madagoaa Gideon ne-longono-ia di midi taane deelaa mo dono hadinga, gei mee gaa-bala gi-hongo ono duli ga-daumaha gi Dimaadua. Gei mee gaa-hana gi-muli gi-di waahale-laa digau Israel ga-helekai, “Tu-gi-nua, Dimaadua le e-gowadu gi goodou di maaloo i digau dauwa Midian!”

7:16  Mee ga-wwae-dolu ana gau e-dolu-lau, gaa-wanga gi tangada-nei mo tangada-nei dana buu-‘trumpet’ mo dana loaabi dela iai di lama-ulaula i ono lodo.

7:17  Gideon ga-hagi-anga gi digaula, “Dogu dau-adu gi taalinga di gowaa digaula, goodou ga-mmada-mai gi-di-au, gaa-hai be dagu hai dela e-hai.

7:18  Au mo dagu buini ma-ga-ili madau buu-‘trumpet’, gei goodou ilihia huogodoo godou buu-‘trumpet’ mo-di wwolo boloo, ‘Ang-gi Dimaadua mo ang-gi Gideon!’ ”

7:19  Gideon mo ana daane e-lau gaa-dau i taalinga di waahale-laa i-mua di madahidi-waelua di boo, i-muli-hua di koodai o digau hagaloohi. Gei digaula ga-ili nadau buu-‘trumpet’ mo di hahaahi nia loaabi ala nogo daahi go digaula,

7:20  gei nia buini e-lua ala i-golo gaa-hai labelaa be nia mee di buini deelaa ne-hai. Digaula e-kumi nia lama-ulaula i-lodo nadau lima gau-ihala, nia buu-‘trumpet’ i-lodo nadau lima gau-donu gaa-wwolo gi-nua-loo, “Tulumanu-dauwa ang-gi Dimaadua mo ang-gi Gideon!”

7:21  Nia daane huogodoo guu-tuu i nadau lohongo e-haganiga di waahale-laa, gei digau-dauwa hagadaumee huogodoo guu-llele gi-daha mo-di wwolowwolo gi-nua.

7:22  Di madagoaa nia daane a Gideon nogo ili nadau buu-‘trumpet’, gei Dimaadua gaa-hai digau-dauwa hagadaumee gi-hagadau heebagi gi nadau hulumanu i nadau mehanga. Digaula ga-llele-adu beelaa gi Zarethan gaa-dae-adu gi Beth=Shittah, mo-di waahale go Abel=Meholah e-hoohoo gi-di gowaa go Tabbath.

7:23  Nia daane mai i-nia madawaawa Naphtali, Asher mo nia baahi e-lua o Manasseh ga gahi-mai, ga-waluwalu-adu i-muli digau Midian.

7:24  Gideon ga-hagau ana gau kae-hegau gi-lodo tenua gonduu o Ephraim hagatau, belee hai boloo, “Lloo-ia gi-lala e-heebagi gi digau Midian. Hagaloohia di monowai Jordan mono dama monowai, gaa-dau-adu-loo gi-di gowaa go Beth=Barah, gi-de lloomoi digau Midian laa-lodo nia maa.” Nia daane o Ephraim la-guu-gahi gi-di gowaa e-dahi, ga-hagaloohi di monowai Jordan mo nia dama monowai gaa-tugi-loo i Beth=Barah.

7:25  Digaula gaa-kumi nia dagi dogolua o Midian, go Oreb mo Zeeb, digaula ga-daaligi Oreb gii-made i Tadugalaa Oreb, gei-ogo Zeeb la i-di Gowaa Dagadagahi Waini a Zeeb. Digaula ga-waluwalu hua igolo digau Midian, ga gaamai nia libogo o Oreb mo Zeeb gi Gideon, dela gu-i-bahi-i-dua di monowai Jordan i di madagoaa deelaa.