CSlElizabeth - Judith - 5

5:1  И возвещено бысть Олоферну вождоначалнику силы Ассурския, яко сынове Израилевы уготовашася на брань, и проходы горния заключиша, и оградиша стенами всякий верх горы высокия, и положиша на полях преткновения.

5:2  И разгневася яростию зело, и созва всех началников Моавлих и воевод сынов Аммоних и всех властелей помория,

5:3  и рече им: возвестите убо ми, сынове Ханаани, кто людие сии живущии в горней, и каковы, в нихже живут, гради, и множество силы их, и в чем держава их и крепость их, и кто поставлен над ними царь вождь воинства их?

5:4  И чесо ради сопротивишася, еже не изыти во сретение мне, паче всех живущих на западех?

5:5  И рече к нему Ахиор вождь всех сынов Аммоних: послушай убо, господине мой, слова от уст раба твоего, и возвещу тебе истину о людех сих, иже обитают в горней сей близ тебе живуще, и не изыдет ложь из уст раба твоего:

5:6  людие сии суть исчадия Халдеов

5:7  и вселишася первее в Месопотамии, понеже не восхотеша последовати богом отцев своих, иже беша в земли Халдейстей:

5:8  и отвратишася от пути отец своих и поклонишася Богу небесе, Богу, Егоже познаша: и изгнаша их от лица богов своих, и побегоша в Месопотамию и обиташа тамо дни многи:

5:9  и рече Бог их, да изыдут от пришелствия своего и да идут в землю Ханааню: и вселишася тамо, и умножишася златом и сребром и скоты многими зело:

5:10  и снидоша во Египет, покры бо лице земли Ханаани глад, и пришелствоваша тамо, дондеже прекормишася, и быша тамо во множество много, и не бе числа роду их:

5:11  и воста на них царь Египетский и прехитри их, и в труде и плинфе смири их, и положи их в рабы:

5:12  и возопиша к Богу своему, и порази всю землю Египетскую язвами, в нихже не бе изцеление, и изгнаша их Египтяне от лица своего:

5:13  и изсуши Бог Чермное море пред ними,

5:14  и веде их на путь Сины и Кадис-Варни, и изгнаша всех живущих в пустыни,

5:15  и вселишася в земли Аморреов, и всех Есевонитов истребиша крепостию своею, и прешедше Иордан наследиша всю горнюю:

5:16  и изгнаша от лица своего Хананеа и Ферезеа, и Иевусеа и Сихема и всех Гергесеов, и обиташа в ней дни многи:

5:17  и дондеже не согрешиша пред Богом своим, беша благая с ними, понеже Бог ненавидяй неправды с ними есть:

5:18  егда же отступиша от пути, егоже завеща им, истребишася во мнозех бранех на много зело, и пленени быша в землю не свою, и храм Бога их бысть в попрание, и гради их одержани быша от супостат:

5:19  и ныне обратившеся к Богу своему, взыдоша от разсеяния, идеже разсеяни быша тамо, и одержаша Иерусалим, идеже святилище их, и вселишася в горней, понеже бе пуста:

5:20  и ныне, владыко господине, аще убо есть безумие в людех сих, и согрешают к Богу своему, и разсмотрим сие, яко есть в них соблазн сей, и взыдем и повоюем их:

5:21  аще же несть беззакония в языце их, да прейдет господин мой, да не когда защитит Господь их и Бог их по них, и будем в поношение пред всею землею.

5:22  И бысте яко преста Ахиор глаголя словеса сия, и возропташа вси людие обстоящии шатер и предстоящии, и реша вельможи Олоферновы и вси живущии в примории и в Моаве посещи его:

5:23  не бо убоимся от сынов Израилевых: се бо, людие, в нихже несть силы, ниже могутства ко ополчению крепкому:

5:24  темже убо взыдим, и будут во снедь всему воинству твоему, владыко Олоферне.