Kapingamarangi - Numbers - 12

12:1  Miriam mo Aaron guu-tamu a Moses, idimaa mee guu-lodo gi-di ahina o Cush.

12:2  Meemaa ga-helekai, “Ma go Moses hua dela ne-helekai ginai Dimaadua? Gei hagalee go gidaua labelaa?” Dimaadua gu-longono di-nau tamu.

12:3  (Moses taane hila-gi-lala, ge koia e-kaedahi e-hila-gi-lala i digau hagatau i henuailala.)

12:4  Di madagoaa-hua deelaa, gei Dimaadua ga-helekai gi Moses, Aaron mo Miriam, “Goodou dogodolu aanaa, lloomoi-laa gi dogu Hale.” Digaula guu-hula,

12:5  gei Dimaadua ga-haneia i-lodo di baahi gololangi, gu-hanimoi gi-mua di bontai di Hale-laa, ga-gahi-mai a Aaron mo Miriam, gei meemaa ga-loomoi.

12:6  Dimaadua ga-helekai, “Goolua hagalongo gi agu helekai aanei: Ma iai nia soukohp i-golo i godou baahi, gei Au e-haga-gida Au gi digaula i-lodo nia moe, gei Au e-helekai gi digaula i-lodo nadau midi.

12:7  E-hai-gee mo dagu hai dela e-helekai gi dagu dangada hai-hegau go Moses, idimaa Au guu-wanga gi mee tegau dela belee dagi agu daangada Israel huogodoo.

12:8  Au e-helekai hua hagammaa gi mee, mee e-mmada-mai gei Au e-mmada gi mee, hagalee i-di ada-mee hua, gei mee guu-mmada labelaa gi dogu ada! Gei goolua e-aha ala e-maaloo-dangihi e-tamu a Moses, e-hai-baahi gi dagu dangada hai-hegau?”

12:9  Dimaadua gu-hagawelewele gi meemaa, ga-hagatanga gi-daha.

12:10  gei di gololangi ga-hagatanga gi-daha mo-di Hale-laa, gei di gili o Miriam gaa-kene i-di magi genegene gadoo be nia ‘snow’. Di madagoaa Aaron ne-mmada gi mee, gu-gidee-ia bolo Miriam la-guu-hii go di magi genegene,

12:11  Aaron ga-helekai gi Moses, “Dumaalia, goe hudee haga-huaidu-ina gimaua gi-di hagaduadua o-di-mau mee hala dela ne-hai.

12:12  Hudee heia di ahina deenei gii-hai be di mee ne-haanau gei digi hai tangada, idimaa di baahi tuaidina o-maa guu-gai gi-daha.”

12:13  Moses ga-dangidangi gi-nua ang-gi Dimaadua, “Meenei God, dumaalia-mai, haga-hili-ina a-mee.”

12:14  Dimaadua ga-helekai gi Moses, “Maa tamana o-maa guu-bui ana haawale gi-nia golomada o-maa, gei mee e-hai gi-haga-langaadia i-lodo nia laangi e-hidu. Deenei-laa, mee e-hai gii-noho i-daha mo-di waahale-laa i-lodo tabu e-dahi, ga-nomuli ga-laha-mai-laa gi-lodo di waahale-laa.”

12:15  Miriam gu-haga-noho i-daha mo-di waahale-laa i-nia laangi e-hidu, gei nia daangada digi hagatanga gi-daha, e-noho-hua i-di gowaa deelaa, gaa-dae-loo gi-di laha-mai a Miriam gi-muli.

12:16  Nomuli, gei digaula ga-hagatanga gi-daha mo Hazeroth ga-hagaduu-aga di-nadau waahale-laa i-lodo di Anggowaa o Paran.