TpiKJPB - Numbers - 20

20:1  ¶ Nau ol pikinini bilong Isrel i kam, yes, olgeta bung bilong ol manmeri, i go insait long ples i no gat man Sin long namba wan mun. Na ol manmeri i stap long Kedes. Na Miriam i dai pinis long dispela hap, na ol i planim em long dispela hap.

20:2  Na i no gat wara bilong bung bilong ol manmeri. Na ol i bungim ol yet wantaim i birua long Moses na i birua long Eron.

20:3  Na ol manmeri i tok pait wantaim Moses, na toktok, i spik, Gutpela moa em i laik bilong God long mipela i bin dai pinis taim ol brata bilong mipela i dai pinis long ai bilong BIKPELA!

20:4  Na bilong wanem yupela i bin bringim antap dispela bung bilong ol manmeri bilong BIKPELA i kam long dispela ples i no gat man, inap long mipela na ol bulmakau samting bilong mipela i ken dai long dispela hap?

20:5  Na olsem wanem na yupela i bin mekim mipela long kam ausait long Isip, long bringim mipela insait long dispela ples nogut? Dispela em i no ples bilong pikinini kaikai, o bilong ol fik, o bilong ol rop wain, o bilong ol pomigranet. Na tu i no gat sampela wara long dring.

20:6  Na Moses na Eron i lusim pes bilong lain i bung i go long dua bilong haus sel holi bilong bung bilong ol manmeri. Na ol i pundaun long ol pes bilong ol. Na glori bilong BIKPELA i kamap ples klia long ol.

20:7  Na BIKPELA i tokim Moses, i spik,

20:8  Kisim dispela stik, na yu bungim dispela lain bung wantaim, yu, na Eron, brata bilong yu, na yupela toktok i go long ston long ai bilong ol ai bilong ol, na em bai givim i kam ausait wara bilong em. Na yu bai bringim i kam ausait wara long ol, ausait long dispela ston. Olsem tasol yu bai givim dring long bung bilong ol manmeri na ol animal bilong ol.

20:9  Na Moses i kisim dispela stik long ai bilong BIKPELA, olsem Em i tok strong long em.

20:10  Na Moses na Eron i bungim bung bilong ol manmeri wantaim long ai bilong dispela ston, na em i tokim ol, Harim nau, yupela ol bikhet lain. Ating mipela mas kisim wara long yupela i kam ausait long dispela ston, a?

20:11  Na Moses i litimapim han bilong em, na wantaim stik bilong em em i paitim ston tupela taim. Na wara i kam ausait planti moa yet, na bung bilong ol manmeri i dring, na ol animal bilong ol tu.

20:12  Na BIKPELA i tokim Moses na Eron, Bikos yutupela i no bilipim Mi, long mekim Mi kamap holi long ol ai bilong ol pikinini bilong Isrel, olsem na yutupela bai i no inap bringim bung bilong ol manmeri i go insait long hap, dispela Mi bin givim ol.

20:13  Dispela em i wara bilong Meriba. Bilong wanem, ol pikinini bilong Isrel i pait wantaim BIKPELA, na Em i kamap holi insait long ol.

20:14  ¶ Na Moses i salim ol mausman i lusim Kedes i go long king bilong Idom, Brata bilong yu Isrel i tok olsem, Yu save pinis olgeta dispela hatwok wantaim pen i bin kam antap long mipela,

20:15  Long ol tumbuna papa bilong mipela i go daun long Isip olsem wanem, na mipela i bin stap long Isip longpela taim. Na ol lain Isip i givim hevi tru long mipela, na ol tumbuna papa bilong mipela.

20:16  Na taim mipela krai i go long BIKPELA, Em i harim nek bilong mipela, na salim wanpela ensel, na Em i bin bringim mipela ausait long Isip. Na, lukim, mipela i stap long Kedes, wanpela biktaun long las hap bilong arere bilong yu.

20:17  Larim mipela brukim, mi askim yu plis, namel bilong kantri bilong yu. Mipela bai i no inap wokabaut namel long ol dispela gaden, o namel long ol gaden wain, na tu mipela bai i no inap dringim bilong wara bilong ol hul wara. Mipela bai go long bikpela rot bilong king. Mipela bai i no inap tanim long han sut o han kais, inap long mipela i bin abrusim ol arere bilong yu.

20:18  Na Idom i tokim em, Yu no ken wokabaut klostu long mi, nogut mi kam ausait i birua long yu wantaim bainat.

20:19  Na ol pikinini bilong Isrel i tokim em, Mipela bai go long bikpela rot. Na sapos mi o ol bulmakau samting bilong mi i dring bilong wara bilong yu, orait mi bai baim dispela. Mi bai go namel long hap long ol lek bilong mi tasol, na mi no inap mekim narapela samting.

20:20  Na em i tok, Yu no ken go namel. Na Idom i kam ausait i birua long em wantaim planti manmeri, na wantaim wanpela han i strong.

20:21  Olsem tasol Idom i tok nogat long givim Isrel rot namel long arere bilong em. Olsem na Isrel i tanim na lusim em.

20:22  ¶ Na ol pikinini bilong Isrel, yes, bung bilong ol manmeri olgeta, i wokabaut i lusim Kedes, na kam long maunten Hor.

20:23  Na BIKPELA i tokim Moses na Eron long maunten Hor, klostu long arere bilong hap bilong Idom, i spik,

20:24  Eron bai bung i go long lain bilong em. Long wanem, em bai i no inap go insait long dispela hap, dispela Mi bin givim i go long ol pikinini bilong Isrel, bilong wanem, yutupela i bikhet i birua long tok bilong Mi long wara bilong Meriba.

20:25  Kisim Eron na Eleasar, pikinini man bilong em, na bringim ol antap i go long maunten Hor.

20:26  Na rausim long Eron ol klos bilong em, na putim ol antap long Eleasar, pikinini man bilong em. Na Eron bai bung i go long ol lain bilong em, na em bai dai long dispela hap.

20:27  Na Moses i mekim olsem BIKPELA i tok strong. Na ol i go antap long maunten Hor long ai bilong olgeta bung bilong ol manmeri.

20:28  Na Moses i rausim long Eron ol klos bilong em, na putim ol antap long Eleasar, pikinini man bilong em. Na Eron i dai pinis long antap bilong maunten. Na Moses na Eleasar i kam daun long maunten.

20:29  Na taim olgeta bung bilong ol manmeri i luksave long Eron i dai pinis, ol i soim sori long Eron 30 de, yes, olgeta hauslain bilong Isrel.