LinVB - Philemon

Chapter 1

1:1  Pólo, o bolóko mpô ya Krístu Yézu, na ndeko Timotéo, óna Fílemo, móníngá wa bísó wa bolingo,

1:2  na ndeko mwásí Apia, na Arsípo, mó­ní­ngá wa bísó wa mosálá, mpé na bakrís­tu bá­nso bakosanganaka epái ya yó.

1:3  ngrásya mpé bobóto na bino éutí na Nzá­mbe Tatá wa bísó mpé Mokonzi Yézu Krístu !

1:4  Nazalí kotóndo Nzámbe wa ngaí ntángo ínso nakokanisaka yǒ o losámbo la ngáí,

1:5  zambí nayókí bóníbóní okolingaka mpé okoyambaka Mokonzi Yézu na mpé bandeko bánso.

1:6  Boyambi boye bokokómisaka yǒ lisangá na Krístu bósála ’te óyéba malámu maye tokokí kosála mpô ya Krístu.

1:7  Sôló, ndeko, bolingi bwa yǒ bozalí kosepelisa mpé koléndisa ngáí, zambí oléndísí mitéma mya bakrístu !

1:8  Yangó wâná, atâ nakokí kotínda yǒ o nkómbó ya Krístu ókokisa lotó­mo la yǒ,

1:9  mpô nayébí bolingi bwa yǒ nalingí kosénge yǒ éloko mǒ­kó, ngáí Pólo : mobangé, o bolóko mpô ya Krístu Yézu.

1:10  Nabó­ndélí yǒ mpô ya mwána wa ngáí Onezímo ; oyo napési bomoi áwa o bolóko.

1:11  Sôló, libosó ozwákí litómba na yě té, kasi sikáwa akokí kopésa yǒ lisálisi, sé lokóla asálísí ngáí.

1:12  Nazóngísí yě epái ya yǒ ; yě azalí lokóla motéma mwa ngáí mǒ­kó.

1:13  Nalingákí átíkala na ngáí mpô ’te ásálisa ngáí o nkómbó ya yǒ, áwa nakangémí o bolóko mpô ya Nsango Elámu.

1:14  Nzókandé nali­ngákí kosála yangó té sókó yǒ ondi­mí té. Nalingí kotínda yǒ na makási té, malámu ósála yangó na motéma mwa yǒ mǒkó.

1:15  Mbele Onezímo atíkákí yǒ mwâ mikolo mpô ózala na yě sékô,

1:16  lokóla moómbo lisúsu té, kasi lokóla ndeko wa bolingo, óyo alekí moómbo na bolámu. Azalí ndeko wa ngáí wa sôló, kasi akozala libosó ndeko wa yǒ o míso ma bato mpé ma Mokonzi !

1:17  Bôngó, sókó omímóní ’te ozalí motéma mǒkó na ngáí, yambá yě ngáí mǒkó.

1:18  Sókó asálákí yǒ mabé tǒ azalí na nyongo, tálá yangó lokóla ngáí moto nazalí na nyongo na yǒ.

1:19  Na bokomi nkómbó ya ngáí, ngáí Pólo nandimí kofúta… Nakoku­ndola mpé té bóníbóní yǒ mǒkó ozalí na nyongo ya ngáí ; nyongo êná, ndé yǒ mǒkó !

1:20  Ya sôló, ndeko wa ngáí, sálélá ngáí mosálá moye mpô ya Mokonzi. Kitísá mo­téma mwa ngáí mpô ya Krístu.

1:21  Nayébí malámu ’te okosála maye nakomélí yǒ o monkandá ; okosála leká naíno maye nazalí kosénge yǒ.

1:22  Bongísélá ngáí mpé esíká ya kolála ; mpô ya losámbo la bínó nazalí na elíkyá ’te nakozóngela bínó.

1:23  Epafráse atíndélí yǒ mbóte, yě azalí esíká yǒ kó na ngáí o bolóko mpô ya Krístu Yézu.

1:24  Oyamba mpé mbóte ya Márko, Aristárko, Démas mpé ya Lúka, bangó bánso bakosálaka na ngáí elongó.

1:25  Ngrásya ya Mokonzi Yézu Krístu ézala na bínó.