Kapingamarangi - Ecclesiastes - 3

3:1  God guu-dugu nia madagoaa e-tau ang-gi nia mee huogodoo ala e-hai i-lodo o henuailala.

3:2  God guu-dugu di madagoaa e-haanau-ai, mo-di madagoaa e-made-ai, di madagoaa e-dogi-ai, mo-di madagoaa e-hagi-ai,

3:3  di madagoaa e-daaligi-ai, mo-di madagoaa e-haga-hili-ai, di madagoaa e-oho gi-daha, mo-di madagoaa e-hau-ai.

3:4  God guu-dugu di madagoaa e-manawa-gee-ai, mo-di madagoaa e-manawa lamalia-ai, di madagoaa e-lodo-huaidu-ai, mo-di madagoaa e-gagaalege-ai,

3:5  di madagoaa e-heetugi-ai nnuaidina taane mo-di ahina, mo-di madagoaa hagalee heetugi-ai nnuaidina taane mo-di ahina, di madagoaa e-hongi-ai, mo-di madagoaa hagalee hongi-ai.

3:6  God guu-dugu di madagoaa e-gida-ai nia mee, mo-di madagoaa e-ngala-ai nia mee, di madagoaa e-benebene, mo-di madagoaa e-kili gi-daha,

3:7  di madagoaa e-haahi, mo-di madagoaa e-dui, di madagoaa e-noho-hua deemuu, mo-di madagoaa e-leelee.

3:8  God guu-dugu di madagoaa e-aloho-ai, mo-di madagoaa e-de-hiihai, di madagoaa tauwa, mo-di madagoaa e-noho i-di aumaalia.

3:9  Ma ni-aha ala e-gaamai i tadau moomee?

3:10  Au e-iloo nia mee daamaha a God ne-haga-uda-mai gi gidaadou.

3:11  Mee ne-haga-noho nia madagoaa tau ang-gi nia mee huogodoo. Mee ne-gaamai gi gidaadou di hiihai gi-iloo-gidaadou nia mee ala ma-ga-kila-aga maalia, gei mee digi gaamai gi gidaadou di-iloo hagatau o ana mee ala e-hai.

3:12  Gei au gu-modongoohia-mai gi-di-au bolo tadau mee dela e-mee tadau hai, la-gi-tenetene-hua mo di-hagamahi i tadau madagoaa ala e-mouli-ai gidaadou.

3:13  Gidaadou huogodoo belee miami mo-di inuinu mo-di tenetene gi tadau mee ala ne-ngalua ginai. Deenei la di wanga dehuia mai baahi o God.

3:14  Au e-iloo bolo nia mee huogodoo a God ne-hai le e-noho-hua beelaa, deai ono hagaodi ai. Goe e-deemee di-haga-puni be e-daa dau mee i-nia mee a-Maa. Di mee deenei dela e-hai go God, le e-hai gidaadou gi-hagalaamua a-Mee.

3:15  Nia mee huogodoo ala e-kila-mai be e-mee di-kila-aga, huogodoo la-guu-lawa di-kila-aga i-mua. God e-hai nia mee gi-kila-aga i-nia holongo e-logo.

3:16  Au gu-modongoohia-eau labelaa bolo i-lodo henuailala-nei, di manawa hai-mee huaidu la-guu-pono di lohongo o-di manawa hai-mee donu mo-di haihai di mee dela e-donu.

3:17  Au e-maanadu bolo nia daangada ala e-donu mo nia daangada ala e-hai di hala, la-ga-gabunga go God be-di mee hua e-dahi, idimaa, nia mee huogodoo mo nia hai huogodoo ga-kila-aga-hua i nadau madagoaa donu ala guu-lawa di-dugu.

3:18  Au gu-maanadu labelaa bolo God e-haga-madamada gidaadou, belee haga-modongoohia-mai gi gidaadou bolo gidaadou e-hai-hua be nia manu.

3:19  I-di hagaodi, tangada mo-di manu le e-hula gi-di gowaa e-dahi, meemaa e-mmade-hua be-di mee e-dahi. Meemaa ne-hai-hua be-di mee e-dahi. Tangada le e-deai ono humalia i-di manu ai, idimaa, di mouli le e-deai dono hadinga ai ang-gi tei meemaa.

3:20  Meemaa dogolua le e-hula gi-di gowaa e-dahi dela go di gelegele. Meemaa dogolua ne-hai-mai i-di gelegele deelaa, gei meemaa dogolua e-hula labelaa gi-di gelegele.

3:21  Ma e-modongoohia di-aha bolo di hagataalunga o tangada le e-hana gi-nua, gei-ogo di hagataalunga o-di manu le e-hana gi-lodo di gelegele?

3:22  Gei-au gu-modongoohia bolo di mee e-kaedahi e-humalia dela belee hai go gidaadou: gidaadou gi-haga-tenetene-ina gidaadou gi tadau mee ala ne-ngalua ginai. Deai di mee i-golo e-mee tadau hai ai. Gidaadou e-de-iloo be gidaadou le e-hai behee i-muli o tadau mmade.