Kapingamarangi - I John - 2

2:1  Au e-hihi-adu gi goodou, agu dama hagaaloho, bolo goodou hudee heia di huaidu. Maa tangada gaa-hai di huaidu, gidaadou tadau Dangada Hagamaamaa i-baahi o God, deenei go Jesus Christ, go Mee dela e-donu.

2:2  Tigidaumaha o Christ la di mee dela e-hui-ai tadau huaidu, hagalee go tadau huaidu la-hua, mo nia huaidu o-nia daangada henuailala hagatau.

2:3  Maa gidaadou ga-daudali nia haganoho a God, gidaadou e-donu bolo gidaadou la-gu-iloo a-Mee.

2:4  Maa tangada ga-helekai boloo, “Au e-iloo a-Mee”, geia hagalee hagagila-aga nnaganoho a God, mee e-helekai tilikai, gei di tonu la-hagalee i dono baahi.

2:5  Maa tangada ga-daudali ana helekai, deenei go mee dela guu-dohu dono aloho i God. Deenei di mee ga-iloo-gidaadou, bolo gidaadou gu-buni-anga gi God:

2:6  Maa tangada ga-helekai boloo, “Au e-buni-anga gi God”, geia gi-mouli be-di mouli o Jesus Christ.

2:7  Ogu ihoo hagaaloho-nei, taganoho deenei dela ne-hihi-adu gi goodou, hagalee taganoho hoou, gei taganoho namua dela guu-lawa di-iloo-goodou mai taamada. Go taganoho namua dela ne-agoago-ai, ge gu-longono-ai goodou.

2:8  Gei deeai, taganoho deenei dela e-hihi-adu gi goodou le e-hoou, idimaa, ono donu la-gu-kila-mai i-baahi o Christ mo mai godou baahi. Di bouli le e-mmaa gi-daha, gei di maalama donu gu-lawa di-maahina.

2:9  Maa tangada ga-helekai bolo ia e-noho i-lodo di maalama geia e-hagadugina gi dono duaahina, ia e-noho-hua i-lodo di bouli gaa-dae-mai-loo gi dangi-nei.

2:10  Tangada dela e-aloho i dono duaahina, deelaa tangada e-noho i-lodo di maalama, ia e-deemee di-hai tangada deelaa gii-hala.

2:11  Tangada dela e-hagadugineia dono duaahina, ia e-noho-hua i-lodo di bouli, ge e-heehee-hua i-lodo di bouli. E-de-iloo-ia di gowaa dela belee hana ginai, idimaa, di bouli gu-haga-dee-gida a-mee.

2:12  Au e-hihi-adu gi goodou, agu dama, idimaa, godou huaidu la-guu-lawa di-maahede i-di ingoo o Christ.

2:13  Au e-hihi-adu gi goodou, nia damana, idimaa, goodou e-iloo a-Mee dela nogo noho mai taamada. Au e-hihi-adu gi goodou, nia dama-daane, idimaa, goodou ala gu-haga-magedaa Tangada Huaidu.

2:14  Au e-hihi-adu gi goodou, agu dama, idimaa, goodou gu-iloo Tamana. Au e-hihi-adu gi goodou, nia damana, i-di godou iloo a-Mee dela nogo noho mai taamada. Au e-hihi-adu gi goodou, nia dama-daane, idimaa, goodou ala e-maaloo. Nia helekai a God e-noho i godou lodo, gei goodou gu-haga-magedaa Tangada Huaidu.

2:15  Goodou hudee aloho i henuailala, be nia goloo o henuailala. Maa goodou ga-aloho i henuailala, goodou hagalee aloho i Tamana.

2:16  Idimaa, nia mee huogodoo o henuailala, aanei la-go di hiihai huaidu o tuaidina, mo nia mee o-nia daangada e-mmada ginai ga-moinaa-ai, mo nia mee huogodoo koia e-hagapuu-ai nia daangada, nia mee aanei huogodoo hagalee ne-loomoi i-baahi o Tamana, ne-loomoi-hua i henuailala.

2:17  Henuailala mo ono mee huogodoo ala e-hiihai ginai nia daangada, le e-mmaa gi-daha huogodoo, gei tangada dela e-hai di manawa o God, le e-mouli, gaa-hana-hua beelaa.

2:18  Agu dama-nei, di madagoaa o-di hagaodi la-gu-hoohoo-mai. Goodou gu-longono bolo di hagadaumee o Christ la-ga-hanimoi. Dolomeenei nia hagadaumee o Christ gu-logowaahee, gu-kila-mai, ge gidaadou gu-iloo bolo di hagaodi la-gu-hoohoo-mai.

2:19  Nia hagadilinga daangada ala beenei, la-hagalee dau-mai gi gidaadou, dela ne-hula-ai digaula gi-daha. Maa nei bolo digaula ne-dau-mai gi gidaadou, digaula e-buni-mai gi gidaadou. Gei digaula guu-hula gi-daha mo gidaadou, e-gila-mai bolo ginaadou hagalee dau-mai gi gidaadou.

2:20  Goodou huogodoo guu-kae di Hagataalunga-Dabu a Christ dela ne-gowadu gi goodou, malaa goodou gu-iloo di tonu.

2:21  Au e-hihi-adu gi goodou, hagalee bolo goodou e-de-iloo nia mee ala e-donu. Au e-hihi-adu idimaa goodou gu-iloo-hua di tonu, gei goodou gu-iloo bolo nia dilikai hagalee ne-lloomoi i-di tonu.

2:22  Malaa koai dela e-tilikai? Go tangada dela e-helekai, “Jesus hagalee go Messiah.” Malaa tangada deenei la-di hagadaumee ni Christ, dela e-haga-de-iloo-ia Tamana mo Tama.

2:23  Tangada dela ga-haga-de-iloo-ia Tama, geia ne-haga-de-iloo-ia labelaa Tamana. Gei tangada dela e-hagadonu Tama, geia ne-hagadonu labelaa Tamana.

2:24  Hagamahi hagamau-dangihi-ina godou lodo gi-nia agoago ala gu-longono-ai goodou mai taamada. Maa nia agoago aanei ga-mau-dangihi i godou lodo, gei godou mouli ga-buni-anga gi-di Tama mo Tamana i-nia madagoaa huogodoo.

2:25  Di mee a Christ ne-hagababa-mai gi gidaadou, la-go di mouli dee-odi.

2:26  Au e-hihi-adu gi goodou nia mee aanei i-di hai o digau ala e-hagamada belee halahalau goodou.

2:27  Gei Christ ne-hagauda dana Hagataalunga-Dabu adu gi goodou. Di noho di Hagataalunga-Dabu i godou lodo, gei goodou hagalee bolo goodou e-hai gii-kabe godou mee mai tangada, idimaa, di Hagataalunga-Dabu e-agoago-adu gi goodou di hai o-nia mee huogodoo, mo-di agoago-adu gi goodou nia mee koia e-donu, hagalee dilikai. Malaa goodou gi-hagalongo gi-nia agoago di Hagataalunga, gei gi mau-dangihi ang-gi Christ.

2:28  Agu dama-nei, goodou dadaahia hua-beelaa i-di hagadaubuni ang-gi Mee i dono madagoaa dela ma-ga-hanimoi-ai, gei gidaadou e-maaloo dangihi huoloo, hagalee pala hagammuni, be e-langaadia i ono mua i-di laangi deelaa.

2:29  Goodou gu-iloo bolo Christ le e-donu. Goodou gi-iloo labelaa bolo digau huogodoo ala e-hai nia mee donu, guu-hai nia dama ni God.