CopSahBible2 - I Samuel - 9

9:1  ⲛⲉⲩⲛⲟⲩⲣⲱⲙⲉ ⲇⲉ ⲉⲃⲟⲗ ϩⲛ ⲛⲉϣⲏⲣⲉ ⲛⲃⲉⲛⲓⲁⲙⲓⲛ ⲉⲡⲉϥⲣⲁⲛ ⲡⲉ ⲕⲓⲥ ⲡϣⲏⲣⲉ ⲛⲁⲃⲓⲏⲗ ⲡϣⲏⲣⲉ ⲛⲥⲁⲣⲉⲇ ⲡϣⲏⲣⲉ ⲛⲃⲁⲭⲓⲣ ⲡϣⲏⲣⲉ ⲛⲁⲫⲉⲕ ⲡϣⲏⲣⲉ ⲛⲟⲩⲣⲱⲙⲉ ⲛⲓⲉⲙⲓⲛⲁⲓⲟⲥ ⲟⲩⲣⲱⲙⲉ ⲛⲇⲩⲛⲁⲧⲟⲥ

9:2  ⲁⲩⲱ ⲡⲁⲓ ⲛⲉⲟⲩⲛⲧϥ ⲟⲩϣⲏⲣⲉ ⲙⲙⲁⲩ ⲉⲡⲉϥⲣⲁⲛ ⲡⲉ ⲥⲁⲟⲩⲗ ⲉⲩⲣⲱⲙⲉ ⲡⲉ ⲉϥϫⲟⲥⲉ ϩⲛ ⲧⲉϥϭⲟⲧ ⲛⲁⲅⲁⲑⲟⲥ ⲁⲩⲱ ⲛⲉⲙⲛⲗⲁⲁⲩ ϩⲛ ⲛⲉϣⲏⲣⲉ ⲙⲡ ⲉⲛⲁⲛⲟⲩϥ ⲉⲣⲟϥ ⲉϥϫⲟⲥⲉ ⲉⲣⲟⲟⲩ ⲧⲏⲣⲟⲩ ⲉϩⲟⲩⲉ ⲉⲟⲩⲛⲁϩⲉⲃ ⲡⲁⲣⲁ ⲡⲕⲁϩ ⲧⲏⲣϥ

9:3  ⲁⲩⲱ ⲛⲉⲟⲟⲩ ⲛⲕⲓⲥ ⲡⲉⲓⲱⲧ ⲛⲥⲁⲟⲩⲗ ⲁⲩⲥⲱⲣⲙ ⲕⲓⲥ ⲇⲉ ⲡⲉⲓⲱⲧ ⲛⲥⲁⲟⲩⲗ ⲡⲉϫⲁϥ ⲛⲥⲁⲟⲩⲗ ⲡⲉϥϣⲏⲣⲉ ϫⲉ ϫⲓ ⲛⲙⲙⲁⲕ ⲛⲟⲩⲁ ⲛⲛⲉϩⲙϩⲁⲗ ⲛⲧⲉⲧⲛⲧⲱⲟⲩⲛ ⲛⲧⲉⲧⲛⲃⲱⲕ ⲛⲧⲉⲧⲛϣⲓⲛⲉ ⲛⲥⲁ ⲛⲉⲟⲟⲩ

9:4  ⲁⲩⲱ ⲁϥⲃⲱⲕ ⲉⲃⲟⲗ ϩⲙ ⲡⲧⲟⲟⲩ ⲛⲉⲫⲣⲁⲓⲙ ⲁⲩⲱ ⲟⲛ ⲁⲩⲃⲱⲕ ⲉⲃⲟⲗ ϩⲙ ⲡⲕⲁϩ ⲛⲥⲉⲗⲭⲁ ⲙⲡⲟⲩϩⲉ ⲉⲣⲟⲟⲩ ⲁⲩⲱ ⲟⲛ ⲁⲩⲃⲱⲕ ⲉⲃⲟⲗ ϩⲙ ⲡⲕⲁϩ ⲛⲉⲁⲥⲁⲕⲉⲙ ⲙⲡⲟⲩϩⲉ ⲉⲣⲟⲟⲩ ⲁⲩⲱ ⲟⲛ ⲁⲩⲃⲱⲕ ⲉⲃⲟⲗ ϩⲙ ⲡⲕⲁϩ ⲛⲓⲁⲕⲓⲙ ⲙⲡⲟⲩϩⲉ ⲉⲣⲟⲟⲩ

9:5  ⲛⲧⲟⲟⲩ ⲇⲉ ⲛⲧⲉⲣⲟⲩⲉⲓ ⲉⲡⲕⲁϩ ⲛⲥⲓⲫ ⲡⲉϫⲉⲥⲁⲟⲩⲗ ⲙⲡⲉϥϩⲙϩⲁⲗ ⲉⲧⲛⲙⲙⲁϥ ϫⲉ ⲁⲙⲟⲩ ⲛⲧⲉⲛⲕⲧⲟⲛ ⲛⲧⲉⲛⲃⲱⲕ ⲉϩⲣⲁⲓ ⲉⲡⲉⲛⲙⲁ ⲙⲏⲡⲱⲥ ⲛⲧⲉⲡⲁⲉⲓⲱⲧ ⲗⲟ ⲉϥϥⲓⲣⲟⲟⲩϣ ϩⲁ ⲛⲉⲟⲟⲩ ⲛϥϥⲓⲣⲟⲟⲩϣ ⲉⲧⲃⲏⲏⲧⲛ

9:6  ⲡϩⲙϩⲁⲗ ⲇⲉ ⲡⲉϫⲁϥ ⲛⲁϥ ϫⲉ ⲉⲓⲥ ⲡⲣⲱⲙⲉ ⲙⲡⲛⲟⲩⲧⲉ ϩⲛ ⲧⲉⲓⲡⲟⲗⲓⲥ ⲁⲩⲱ ⲡⲣⲱⲙⲉ ⲉⲧⲙⲙⲁⲩ ϥⲛⲟⲉⲓ ⲛϩⲱⲃ ⲛⲓⲙ ⲁⲩⲱ ϣⲁϫⲉ ⲛⲓⲙ ⲛϣⲁϥϫⲟⲟⲩ ϣⲁⲩϣⲱⲡⲉ ⲧⲉⲛⲟⲩ ϭⲉ ⲙⲁⲣⲟⲛ ⲛⲁϥ ϫⲉⲕⲁⲥ ⲉϥⲉⲧⲁⲙⲟⲛ ⲉⲡⲧⲱϣ ⲛⲧⲛϩⲓⲏ ⲉⲧⲉⲛⲛⲁⲃⲱⲕ ⲉⲣⲟⲥ

9:7  ⲥⲁⲟⲩⲗ ⲇⲉ ⲡⲉϫⲁϥ ⲙⲡⲉϥϩⲙϩⲁⲗ ⲉⲧⲛⲙⲙⲁϥ ϫⲉ ⲉⲓⲥ ϩⲏⲏⲧⲉ ϩⲏ ⲁⲛⲃⲱⲕ ⲟⲩ ⲡⲉⲧⲉⲛⲛⲁⲧⲁⲁϥ ⲙⲡⲣⲱⲙⲉ ⲙⲡⲛⲟⲩⲧⲉ ϫⲉ ⲛⲉⲟⲉⲓⲕ ⲁⲩⲟⲩⲱ ⲉⲃⲟⲗ ϩⲛ ⲛⲉⲛⲥⲕⲉⲩⲏ ⲁⲩⲱ ⲙⲛ ϭⲉ ⲗⲁⲁⲩ ⲛϩⲟⲩⲟ ⲛⲧⲟⲟⲧⲛ ⲉⲧⲣⲉⲛϫⲓⲧϥ ⲉⲣⲁⲧϥ ⲙⲡⲣⲱⲙⲉ ⲙⲡⲛⲟⲩⲧⲉ

9:8  ⲡϩⲙϩⲁⲗ ⲇⲉ ⲁϥⲟⲩⲱϩ ⲉⲧⲟⲟⲧϥ ⲁϥⲣⲟⲩⲱ ϩⲁⲣⲱϥ ⲛⲥⲁⲟⲩⲗ ϫⲉ ⲉⲓⲥ ϩⲏⲏⲧⲉ ⲁⲓϭⲓⲛⲉ ⲛⲟⲩϭⲓⲥⲕⲓⲧⲉ ⲛⲥⲁⲧⲉⲉⲣⲉ ⲛϩⲁⲧ ϩⲛ ⲧⲁϭⲓϫ ⲉⲕⲉϫⲓⲧⲥ ⲛⲅⲧⲁⲁⲥ ⲙⲡⲣⲱⲙⲉ ⲙⲡⲛⲟⲩⲧⲉ ⲛϥⲧⲁⲙⲟⲛ ⲉⲡⲧⲱϣ ⲛⲧⲛϩⲓⲏ

9:9  ϫⲓⲛ ⲉϣⲟⲣⲡ ⲇⲉ ϩⲙ ⲡ ⲛⲁⲓ ⲛⲉ ⲛϣⲁⲣⲉⲡⲟⲩⲁ ⲡⲟⲩⲁ ϫⲟⲟⲩ ⲙⲡⲉⲑⲓⲧⲟⲩⲱϥ ⲉⲩⲛⲁⲃⲱⲕ ⲉϣⲓⲛⲉ ⲙⲡⲛⲟⲩⲧⲉ ⲉⲩϫⲱ ⲙⲙⲟⲥ ϫⲉ ⲁⲙⲏⲉⲓⲧⲛ ⲙⲁⲣⲟⲛ ⲉⲣⲁⲧϥ ⲙⲡⲉⲧⲛⲁⲩ ⲉⲃⲟⲗ ϫⲉ ϫⲓⲛ ⲛϣⲟⲣⲡ ⲛⲉⲣⲉⲡⲗⲁⲟⲥ ⲙⲟⲩⲧⲉ ⲉⲡⲉⲡⲣⲟⲫⲏⲧⲏⲥ ϫⲉ ⲡⲉⲧⲛⲁⲩ ⲉⲃⲟⲗ

9:10  ⲁⲩⲱ ⲥⲁⲟⲩⲗ ⲡⲉϫⲁϥ ⲙⲡⲉϥϩⲙϩⲁⲗ ϫⲉ ⲛⲁⲛⲟⲩ ⲙϣⲁϫⲉ ⲛⲧⲁⲕϫⲟⲟϥ ⲁⲙⲟⲩ ⲙⲁⲣⲟⲛ ⲁⲩⲱ ⲁⲩⲃⲱⲕ ⲉϩⲣⲁⲓ ⲉⲧⲡⲟⲗⲓⲥ ⲉⲡⲏⲓ ⲉⲧⲉⲣⲉⲡⲣⲱⲙⲉ ⲙⲡⲛⲟⲩⲧⲉ ⲛϩⲏⲧϥ

9:11  ⲛⲧⲟⲟⲩ ⲉⲩⲙⲟⲟϣⲉ ⲉϩⲣⲁⲓ ⲉⲡⲥⲁ ⲛⲧⲡⲟⲗⲓⲥ ⲉⲓⲥ ϩⲏⲏⲧⲉ ⲁⲩϩⲉ ⲉϩⲉⲛϣⲏⲣⲉ ϣⲏⲙ ⲉⲩⲛⲏⲩ ⲉⲃⲟⲗ ⲉⲙⲉϩⲙⲟⲟⲩ ⲡⲉϫⲁⲩ ⲛⲁⲩ ϫⲉ ⲉⲛⲉⲡⲉⲧⲛⲁⲩ ⲉⲃⲟⲗ ⲙⲡⲉⲓⲙⲁ

9:12  ⲛϣⲉⲉⲣⲉ ϣⲏⲙ ⲁⲩⲟⲩⲱϣⲃ ϫⲉ ⲥⲉ ϥⲙⲡⲉⲓⲙⲁ ⲉⲓⲥ ϩⲏⲏⲧⲉ ϥϩⲓϩⲏ ⲙⲙⲱⲧⲛ ⲧⲉⲛⲟⲩ ⲉⲧⲃⲁ ⲡⲉϩⲟⲟⲩ ⲛⲣⲁⲛ ⲛⲧⲁϥⲉⲓ ⲉϩⲣⲁⲓ ⲉⲧⲡⲟⲗⲓⲥ ϫⲉ ⲉⲣⲉⲟⲩⲑⲩⲥⲓⲁ ϣⲟⲟⲡ ⲙⲡⲟⲟⲩ ⲙⲡⲗⲁⲟⲥ ϩⲛ ⲃⲁⲙⲁ

9:13  ⲉⲧⲉⲧⲛϣⲁⲛⲣⲡϩⲟⲩⲛ ⲛⲧⲡⲟⲗⲓⲥ ⲧⲁⲓ ⲧⲉ ⲑⲉ ⲉⲧⲉⲧⲛⲛⲁϩⲉ ⲉⲣⲟϥ ϩⲛ ⲧⲡⲟⲗⲓⲥ ⲉⲙⲡⲁⲧⲉϥⲃⲱⲕ ⲉϩⲣⲁⲓ ⲉⲃⲁⲙⲁ ⲉⲟⲩⲱⲙ ϫⲉ ⲙⲡⲗⲁⲟⲥ ⲛⲁⲟⲩⲱⲙ ⲁⲛ ϣⲁⲛⲧⲉϥⲉⲓ ϫⲉ ⲡⲁⲓ ⲡⲉⲧⲛⲁⲥⲙⲟⲩ ⲉⲧⲉⲑⲩⲥⲓⲁ ⲁⲩⲱ ⲙⲛⲛⲥⲁ ⲛⲁⲓ ⲛϣⲙⲙⲟ ⲥⲉⲛⲁⲟⲩⲱⲙ ⲧⲉⲛⲟⲩ ϭⲉ ⲃⲱⲕ ⲉϩⲣⲁⲓ ϫⲉ ⲉⲧⲃⲉ ⲡⲉⲓϩⲟⲟⲩ ⲧⲉⲧⲛⲛⲁϩⲉ ⲉⲣⲟϥ

9:14  ⲁⲩⲱ ⲁⲩⲧⲁⲁⲩ ⲉϩⲣⲁⲓ ⲉⲧⲡⲟⲗⲓⲥ ⲛⲧⲟⲟⲩ ⲇⲉ ⲛⲧⲉⲣⲟⲩⲣⲡϩⲟⲩⲛ ⲛⲧⲡⲩⲗⲏ ⲛⲧⲡⲟⲗⲓⲥ ⲉⲓⲥ ⲥⲁⲙⲟⲩⲏⲗ ⲁϥⲉⲓ ⲉⲃⲟⲗ ⲉϩⲣⲁⲩ ⲉϥⲛⲁϩⲉ ⲉϩⲣⲁⲓ ⲉⲃⲁⲙⲁ

9:15  ⲁⲩⲱ ⲡϫⲟⲉⲓⲥ ⲁϥϭⲉⲗⲉⲡⲡⲁⲓ ⲉⲡⲙⲁⲁϫⲉ ⲛⲥⲁⲙⲟⲩⲏⲗ ϩⲁⲑⲏ ⲛⲟⲩϩⲟⲟⲩ ⲙⲡⲁⲧⲉⲥⲁⲟⲩⲗ ⲉⲓ ϣⲁⲣⲟϥ ⲉϥϫⲱ ⲙⲙⲟⲥ ⲛⲁϥ

9:16  ϫⲉ ⲉϩⲟⲩⲛ ϩⲙ ⲡⲉⲓⲛⲁⲩ ⲛⲣⲁⲥⲧⲉ ϯⲛⲁⲧⲛⲛⲟⲟⲩ ϣⲁⲣⲟⲕ ⲉⲃⲟⲗ ϩⲙ ⲡⲕⲁϩ ⲛⲃⲉⲛⲓⲁⲙⲓⲛ ⲛⲟⲩⲣⲱⲙⲉ ⲛⲅⲧⲱⲟⲩⲛ ⲛⲅⲧⲁϩⲥϥ ⲉⲩⲁⲣⲭⲱⲛ ⲙⲡⲗⲁⲟⲥ ⲙⲡ ⲁⲩⲱ ϥⲛⲁⲧⲟⲩϫⲉⲡⲗⲁⲟⲥ ⲉⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ϫⲉ ⲁⲓϭⲱϣⲧ ⲉϫⲙ ⲡⲉⲑⲃⲃⲓⲟ ⲙⲡⲁⲗⲁⲟⲥ ⲡⲉⲩϩⲣⲟⲟⲩ ⲅⲁⲣ ⲁϥⲉⲓ ⲛⲁⲓ ⲉϩⲣⲁⲓ

9:17  ⲁⲩⲱ ⲥⲁⲙⲟⲩⲏⲗ ⲁϥⲛⲁⲩ ⲉⲥⲁⲟⲩⲗ ⲡϫⲟⲉⲓⲥ ⲇⲉ ⲁϥϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ ϫⲉ ⲉⲓⲥ ⲡⲣⲱⲙⲉ ⲡⲉ ⲡⲁⲓ ⲛⲧⲁⲓϫⲟⲟⲥ ⲛⲁⲕ ⲉⲧⲃⲏⲏⲧϥ ⲡⲁⲓ ⲉⲧⲛⲁⲣⲁⲣⲭⲱⲛ ⲉϫⲙ ⲡⲁⲗⲁⲟⲥ

9:18  ⲁⲩⲱ ⲥⲁⲟⲩⲗ ⲁϥϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲥⲁⲙⲟⲩⲏⲗ ϩⲛ ⲧⲙⲏⲧⲉ ⲛⲧⲡⲟⲗⲓⲥ ⲡⲉϫⲁϥ ⲛⲁϥ ϫⲉ ⲙⲁⲧⲁⲙⲟⲓ ϫⲉ ⲁϣ ⲡⲉ ⲡⲏⲓ ⲙⲡⲉⲧⲛⲁⲩ ⲉⲃⲟⲗ

9:19  ⲥⲁⲙⲟⲩⲏⲗ ⲇⲉ ⲁϥⲟⲩⲱϣⲃ ⲡⲉϫⲁϥ ⲛⲥⲁⲟⲩⲗ ϫⲉ ⲁⲛⲟⲕ ⲡⲉ ⲙⲟⲟϣⲉ ⲉϩⲣⲁⲓ ϩⲓϩⲏ ⲙⲙⲟⲓ ⲉⲃⲁⲙⲁ ⲛⲅⲟⲩⲱⲙ ⲛⲙⲙⲁⲓ ⲙⲡⲟⲟⲩ ⲁⲩⲱ ϩⲧⲟⲟⲩⲉ ϯⲛⲁϫⲟⲟⲩⲕ ⲉⲃⲟⲗ ⲛⲧⲁⲧⲁⲙⲟⲕ ⲉⲛⲉⲧϩⲛⲡⲉⲕϩⲏⲧ ⲧⲏⲣⲟⲩ

9:20  ⲁⲩⲱ ⲉⲧⲃⲉ ⲛⲉⲕⲉⲟⲟⲩ ⲛⲧⲁⲩⲥⲱⲣⲙ ⲉⲓⲥ ⲡⲙⲉϩϣⲟⲙⲛⲧ ⲛϩⲟⲟⲩ ⲡⲉ ⲡⲟⲟⲩ ⲙⲡⲉⲣⲕⲁ ⲡⲉⲕϩⲏⲧ ϩⲓⲱⲟⲩ ⲁⲩϩⲉ ⲅⲁⲣ ⲉⲣⲟⲟⲩ ⲁⲩⲱ ⲛϣⲟⲩϣⲟⲩ ⲙⲡ ⲉⲩⲛⲁⲧⲁⲁⲩ ⲛⲛⲓⲙ ⲛⲉⲩⲛⲁⲧⲁⲁⲩ ⲁⲛ ⲛⲁⲕ ⲙⲛ ⲡⲏⲓ ⲙⲡⲉⲕⲉⲓⲱⲧ

9:21  ⲥⲁⲟⲩⲗ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲥⲁⲙⲟⲩⲏⲗ ϫⲉ ⲙⲏ ⲁⲛⲅ ⲡϣⲏⲣⲉ ⲁⲛ ⲛⲟⲩⲣⲱⲙⲉ ⲛⲓⲉⲙⲓⲛⲁⲓⲟⲥ ⲉⲃⲟⲗ ϩⲙ ⲡⲕⲟⲩⲓ ⲛⲕⲗⲏⲣⲟⲥ ⲧⲉⲫⲩⲗⲏ ⲛⲃⲉⲛⲓⲁⲙⲓⲛ ⲧⲉⲫⲩⲗⲏ ⲉⲧⲥⲏϣ ⲉⲃⲟⲗ ϩⲙ ⲡⲉⲕⲗⲏⲣⲟⲥ ⲧⲏⲣϥ ⲙⲡ ⲁⲩⲱ ⲉⲧⲃⲉ ⲟⲩ ⲁⲕϣⲁϫⲉ ⲛⲙⲙⲁⲓ ⲕⲁⲧⲁ ⲛⲉⲓϣⲁϫⲉ

9:22  ⲁⲩⲱ ⲥⲁⲙⲟⲩⲏⲗ ⲁϥϫⲓ ⲛⲥⲁⲟⲩⲗ ⲙⲛ ⲡⲉϥϩⲙϩⲁⲗ ⲁϥϫⲓⲧⲟⲩ ⲉϩⲟⲩⲛ ⲉⲡⲙⲁ ⲛϣⲱⲡⲉ ⲁϥⲕⲱ ⲛⲁⲩ ⲉⲃⲟⲗ ⲛⲟⲩⲙⲁ ⲉϥϫⲟⲥⲉ ϩⲛ ⲛⲛⲟϭ ⲛⲧⲁⲩⲧⲁϩⲙⲟⲩ ⲉⲩⲛⲁⲣϣϥⲉ ⲛⲣⲱⲙⲉ

9:23  ⲁⲩⲱ ⲥⲁⲙⲟⲩⲏⲗ ⲡⲉϫⲁϥ ⲙⲡⲙⲁⲅⲉⲓⲣⲟⲥ ϫⲉ ⲙⲁ ⲛⲁⲓ ⲛⲧⲙⲉⲣⲓⲥ ⲛⲧⲁⲓϫⲟⲟⲥ ⲛⲁⲕ ⲉⲧⲃⲏⲏⲧⲥ ϫⲉ ⲕⲁⲁⲥ ϩⲁϩⲧⲏⲕ

9:24  ⲁⲩⲱ ⲡⲙⲁⲅⲉⲓⲣⲟⲥ ⲁϥⲡⲓⲥⲉ ⲛⲧⲕⲱⲗⲉⲁ ⲉⲧⲉⲡⲙⲉⲣⲟⲥ ⲡⲉ ⲁϥⲕⲁⲁϥ ϩⲁⲣⲱϥ ⲛⲥⲁⲟⲩⲗ ⲡⲉϫⲉⲥⲁⲙⲟⲩⲏⲗ ⲛⲥⲁⲟⲩⲗ ϫⲉ ⲉⲓⲥ ⲡⲉⲓⲥⲉⲉⲡⲉ ⲏ ⲡⲉⲓϣⲁⲩ ⲕⲁⲁϥ ϩⲁⲣⲱⲕ ⲛⲅⲟⲩⲱⲙ ϫⲉ ⲛⲧⲁⲩⲕⲁⲁϥ ⲛⲁⲕ ⲉⲩⲙⲛⲧⲙⲛⲧⲣⲉ ⲡⲙⲁⲣⲁ ⲛⲕⲟⲟⲩⲉ ⲡⲱϣ ⲛⲁⲕ ⲛⲅⲟⲩⲱⲙ ⲁⲩⲱ ⲥⲁⲟⲩⲗ ⲁϥⲟⲩⲱⲙ ⲙⲛ ⲥⲁⲙⲟⲩⲏⲗ ⲙⲡⲉϩⲟⲟⲩ ⲉⲧⲙⲙⲁⲩ

9:25  ⲁϥⲉⲓ ⲉⲃⲟⲗ ϩⲛ ⲃⲁⲙⲁ ⲉϩⲣⲁⲓ ⲉⲧⲡⲟⲗⲓⲥ ⲁⲩⲡⲱⲣϣ ϩⲁⲣⲟϥ ⲛⲥⲁⲟⲩⲗ ϩⲓ ϫⲉⲛⲉⲡⲱⲣ ⲛϩⲉⲛϩⲟⲉⲓⲧⲉ ⲉⲛⲁϣⲱⲟⲩ

9:26  ⲁϥⲉⲛⲕⲟⲧⲕ ⲡⲟⲩⲟⲉⲓⲛ ⲇⲉ ⲛⲧⲉⲣⲉϥⲥⲱⲣ ⲥⲁⲙⲟⲩⲏⲗ ⲇⲉ ⲁϥⲙⲟⲩⲧⲉ ⲉⲥⲁⲟⲩⲗ ϩⲓ ⲧϫⲉⲛⲉⲡⲱⲣ ⲉϥϫⲱ ⲙⲙⲟⲥ ⲛⲁϥ ϫⲉ ⲧⲱⲟⲩⲛ ⲛⲅⲉⲓ ⲛⲧⲁϫⲟⲟⲩⲕ ⲉⲃⲟⲗ ⲁⲩⲱ ⲥⲁⲟⲩⲗ ⲁϥⲧⲱⲟⲩⲛ ⲁϥⲉⲓ ⲉⲡⲉⲥⲏⲧ ⲉϥⲙⲟⲟϣⲉ ⲉⲃⲟⲗ ⲛⲧⲟϥ ⲙⲛ ⲥⲁⲙⲟⲩⲏⲗ

9:27  ⲛⲧⲉⲣⲟⲩⲉⲓ ⲇⲉ ⲉⲃⲟⲗ ⲉⲩⲥⲁ ⲛⲧⲡⲟⲗⲓⲥ ⲥⲁⲙⲟⲩⲏⲗ ⲡⲉϫⲁϥ ⲛⲥⲁⲟⲩⲗ ϫⲉ ⲁϫⲓⲥ ⲙⲡⲉⲕϩⲉⲣϣⲓⲣⲉ ⲛϥⲙⲟⲟϣⲉ ϩⲓϩⲏ ⲙⲙⲟⲛ ⲛⲧⲟⲕ ⲇⲉ ⲁϩⲉⲣⲁⲧⲕ ⲙⲡⲉⲓⲙⲁ ⲧⲉⲛⲟⲩ ⲛⲅⲥⲱⲧⲙ ⲉⲡϣⲁϫⲉ ⲙⲡⲛⲟⲩⲧⲉ