Kapingamarangi - II Chronicles - 12

12:1  Di madagoaa Rehoboam ne-haganoho ono mogobuna king, mee mo ana daangada huogodoo ga-diiagi nnaganoho Dimaadua.

12:2  I-lodo di lima ngadau Rehoboam nogo dagi, Dimaadua gu-hagaduadua digaula i-di nadau dee-hagalongo. King Shishak o Egypt gu-heebagi gi Jerusalem

12:3  gi ana waga-dauwa hongo-henua e-mana maa lua-lau-(1,200) ge modoono mana-(60,000) digau llele nia hoodo, mo ana gau dauwa dogologo e-deemee di-dau, hagapuni ang-gi nia hagabuulinga dauwa mai Libya, Sukkite mo Ethiopia.

12:4  Mee guu-kumi nia waahale o Judah ala gu-abaaba gi-mau-dangi, ga-hanadu gaa-tugi i Jerusalem.

12:5  Soukohp Shemaiah gaa-hana gi-di King Rehoboam mo nia dagi Judah ala ne-dagabuli i Jerusalem belee llele gi-daha mo Shishak. Mee ga-helekai gi digaula, “Aanei nnelekai Dimaadua adu gi goodou: ‘Goodou gu-diiagi Au, dolomeenei gei Au gu-diiagi goodou guu-wanga goodou gi Shishak.’ ”

12:6  Di king mo nia dagi guu-donu ang-gi ginaadou bolo ginaadou gu-ihala, ga-helekai, “Nia mee ala e-hai go Dimaadua le e-hai-donu.”

12:7  Di madagoaa Dimaadua ne-gidee di-mee deenei, Mee ga-helekai labelaa gi Shemaiah, gaa-hai gi mee, “Idimaa digaula gu-helekai bolo ginaadou gu-ihala, Au ga-hagalee daaligi digaula gi-daha. Malaa di madagoaa Shishak ga-heebagi gi digaula, digaula ga-deloaa di mouli. Jerusalem ga-de-longono-ia di maaloo o dogu hagawelewele hagatau,

12:8  gei Shishak ga-hagamagedaa digaula, gei digaula ga-iloo di mee dela e-hai-geegee i-mehanga di hai-hege mai gi-di Au mo-di hai-hege gi-nia dagi o henuailala.”

12:9  King Shishak gu-hanimoi gi Jerusalem guu-kae nia goloo maluagina ala nogo i-lodo di Hale Daumaha mo di hale king. Mee guu-kae nia mee huogodoo ngaadahi mo nia mee abaaba dangada ala ne-hai go-di King Solomon gi-nia goolo.

12:10  Rehoboam guu-hai ana mee abaaba dangada baalanga-mmee e-pono nia maa, guu-wanga nia maa gi-nia daangada hagaloohi nia bontai di hale di king gi-benabena-ina.

12:11  Nia madagoaa huogodoo di king ma-gaa-hana gi-di Hale Daumaha, digau hagaloohi ga-aamo nia maa, gaa-lawa ga-gaamai labelaa gi-muli gi-di ruum digau hagaloohi.

12:12  Idimaa mee gu-haga-hila-ia gi-lala gi Dimaadua, gei di hagawelewele Dimaadua digi daaligidia a-mee, gei nia mee gu-humalia i-baahi Judah.

12:13  Rehoboam ne-dagi Jerusalem ga-hagamaaloo-aga ono mogobuna king. Mee ne-madahaa maa-dahi ono ngadau i dono madagoaa ne-hai di king, gaa-dagi nia ngadau e-madangaholu maa-hidu i Jerusalem, di waahale dela ne-hilihili go Dimaadua mai i-lodo tenua hagatau Israel belee hai di gowaa e-hagalaamua-ai dono ingoo. Tinana Rehoboam la-go Naamah mai tenua go Ammon.

12:14  Rehoboam guu-hai nia mee huaidu idimaa mee digi hagamada e-halahala di hiihai o Dimaadua.

12:15  Nnegau Rehoboam mai taamada gaa-tugi gi-di hagaodi, mo nia ingoo dono madahaanau la-guu-hihi i-lodo Di Kai a Soukohp Shemaiah mo i-lodo Di Kai a Soukohp Iddo. Rehoboam mo Jeroboam nogo hagadau heebagi i nau mehanga i-nia madagoaa huogodoo.

12:16  Rehoboam gaa-made gaa-danu i-lodo di waa-daalunga o-nia king i-lodo di Waahale o David, gei tama-daane a-maa go Abijah gaa-pono di lohongo o-maa gaa-king.