LinVB - II Kings - 16

16:1  O mobu mwa zomi na nsambo mwa bokonzi bwa Peka, mwana wa Remalia, Akaz, mwana wa Yotam, akomi mokonzi o Yuda.

16:2  Akokisi mibu ntuku ibale o ntango akomi mokonzi ; ayangeli ekolo mibu zomi na motoba o Yeruzalem. Asali te lokola nkoko wa ye Davidi asalaki, asali bobele mabe o miso ma Yawe Nzambe wa ye.

16:3  Alandi nzela ya masumu ya bakonzi ba Israel ; atumbi mpe mwana wa ye, alandi bongo mimeseno mya nsomo mya bikolo biye Yawe abenganaki o boso bwa ba-Israel.

16:4  Abonzi miboma mpe atu­mbi mpaka ya malasi o bisika bya kokumisa banzambe basusu, o ngomba mpe o nse ya nzete ibesu inso.

16:5  O mikolo mina, Rason, mokonzi wa Aram, na Peka, mwana wa Remalia, mokonzi wa Israel, bakei kobunda na bato ba Yeruzalem. Bazingi mboka ya Akaz, kasi bakoki ye te.

16:6  O ntango ena Rason, mokonzi wa Aram azongisi Elat o mokili mwa Aram, abengani ba-Yuda. Ba-Edom bakei kofanda o Elat ; tee lelo bazali naino kuna.

16:7  Akaz atindeli Teglat-Falasar, mokonzi wa Asur, bantoma, baloba na ye : « Nazali mosaleli wa yo, ngai mwana wa yo ! Yaka kobikisa ngai o maboko ma mokonzi wa Aram mpe ma mokonzi wa Israel, baye bayei kobunda na ngai etu­mba. »

16:8  Akaz akamati palata na wolo inso ya Tempelo ya Yawe mpe ya ndako ya mokonzi ; akabeli mokonzi wa Asur binso.

16:9  Mokonzi wa Asur andimeli ye, akei kobunda na Damasko mpe abotoli mboka. Akangi bato banso o boombo mpe atindi bango o Kir. Abomi mpe Rason.

16:10  Mokonzi Akaz akei kokutana na Teglat-Falasar, mokonzi wa Asur, o Damasko. Kuna amoni altare. Mokonzi Akaz atindeli nganga Nzambe Uria elili na mpe mwango mwa altare mpo ’te akoka kotonga altare ya sika se lolenge loko.

16:11  Bongo nganga Nzambe Uria atongi altare, atosi mibeko minso mokonzi Akaz atindi ye ut’o Damasko ; asilisi mosala mobi­mba liboso ’te mokonzi alongwa o Damasko.

16:12  Euti mokonzi Akaz o Damasko, amoni altare. Abelemi mpe abuteli yango.

16:13  Abonzi libonza lya kotumba na mabonza masusu, asopeli lyango masanga ma libonza, mpe anyakeli lyango makila ma nyama iye abonzaki bo miboma mya bo­ndeko.

16:14  Kasi altare ya mbengi eye bato-ngelaki Yawe, alongoli yango kati ya Tempelo na altare ya sika, mpe atii yango o mopanzi mwa altare ya sika, epai ya Nordi.

16:15  Na nsima mokonzi Akaz apesi nganga Nzambe Uria eti­nda eye : « Okotumba libonza lya ntongo na libonza lya mpokwa bobele o altare enene, ná libonza lya mokonzi, ná libonza lya kotumba, ná mabonza ma bolei mpe ma bomeli, maye bato bakobonza ; okosopela altare makila manso ma miboma mpe ma mabonza ma kotumba. Kasi ngai moko nakopangana na botali altare ya mbengi. »

16:16  Nganga Nzambe Uria asali manso lokola mokonzi Akaz ati­ndaki ye.

16:17  Mokonzi Akaz alongoli biloko bi­kokembisaka makolo ma sani ya mai ; alongoli mpe sani mpe akitisi yango o nse. Alongoli mpe ebombelo enene ya mai ya mbengi, eye etiami o bikeko bya ngombe ; atii binso mpe­mbeni o nse.

16:18  Mpo ya kosepelisa mokonzi wa Asur, alongoli mpe o Tempelo ya Yawe ngwende ya lokumu esika mokonzi akofandaka o mikolo mya Sabato, eye batongaki o Tempelo ; alongoli mpe ezibeli ya libanda esika mokonzi azalaki kokoto.

16:19  Makambo masusu ma Akaz, misala minso asalaki, manso makomami o buku ya Bikela bya bakonzi ba Yuda.

16:20  Akaz akei kokutana na bankoko ba ye mpe bakundi ye o Engumba ya Davidi. Mwana wa ye Ezekia akitani ye.