LinVB - II Kings - 4

4:1  Mwasi wa moyekoli moko wa profeta abondeli Elizeo na maloba maye : « Mobali wa ngai akufi, mpe oyebi ’te azalaki kobanga Yawe. Sikawa moto moko ayei kosenge nyongo ya ye, alingi kokamata bana ba ngai babale bo baombo. »

4:2  Elizeo alobi na ye : « Olingi nasala nini ? Ozali na eloko nini o ndako ya yo ? » Azongisi : « Ngai mosaleli wa yo, nazali na eloko yoko o ndako te, se mwa mbeki ya mafuta mpo ya kopakola nzoto. »

4:3  Elizeo alobi : « Kende kodefa mbeki epai ya baninga ba yo banso, meka kozwa mbeki izali mpamba, mingi mpenza.

4:4  Na nsima zonga o ndako elongo na bana ba yo mpe kanga ndako nsima ya yo. Osopa mafuta o mbeki inso ; iye otondisi, tia yango mpembeni. »

4:5  Atiki Elizeo, akoti o ndako elongo na bana mpe akangi ezibeli ya ndako. Bana basimbi mbeki, mpe ye atondisi yango na mafuta.

4:6  Etondi mbeki inso, mama alobi na mwana wa ye : « Pesa mbeki esusu. » Oyo azongisi : « Mbeki isili. » Bongo mafuta mpe ma­sili.

4:7  Mama akei koyebisa moto wa Nzambe. Ye alobi : « Kende koteke mafuta mana, mpe futa nyongo ya yo ; bongo maye matikali mazali ma yo mpe ma bana ba yo. »

4:8  Mokolo moko Elizeo aleki o Sunam ; mwasi moko wa lokumu abya-ngi ye o limpati. Uta mokolo mona Elizeo azalaki kolia kuna, mbala inso aleki o mboka ena.

4:9  Mwasi alobi na mobali wa ye : « Ntembe te, moto oyo akoyaka awa azali moto wa Nzambe.

4:10  Malamu totongela ye mwa esika o mokili mwa ndako ; totia mbeto, meza, kiti na mwinda ; soko ayei, akoki kofanda wana. »

4:11  Mokolo mosusu Elizeo ayei, ako­ti o esika ya likolo, alali mpongi.

4:12  Alobi na mosaleli wa ye Gekazi : « Benga mwasi malamu oyo wa Sunam. » Abengi ye mpe mwasi ayei koteleme liboso lya ye.

4:13  Elizeo alobi na mosaleli : « Loba na mama oyo : Tala, osaleli biso mosala moye monso. Tokoki kosalisa yo na nini ? Olingi tolobela yo epai ya mokonzi wa ekolo to epai ya komanda wa basoda ? » Kasi ye azongisi : « Nazali na bato ba ngai. »

4:14  Elizeo alobi na mosaleli : « Tokoki kosalisa ye na nini ? » Gekazi azongisi : « Abota te, mpe mobali wa ye anuni. »

4:15  Elizeo alobi : « Benga ye. » Gekazi abengi ye, mwasi ayei mpe atelemi o monoko mwa ndako.

4:16  Elizeo alobi : « O mobu mokoya, bobele o eleko eye, okozala na mwana mobali. » Kasi ye alobi : « Te, mokonzi wa ngai, moto wa Nzambe, okosa mosaleli wa yo te ! »

4:17  Nzokande mwasi azwi zemi mpe aboti mwana mobali bobele o eleko Elizeo alakelaki ye.

4:18  Mwana akoli. Mokolo moko mwana akei koluka tata wa ye o bilanga esika bato bazalaki kobuka mbuma,

4:19  alobi na tata : « Motó mpasi e, nazali koyoka motó mpasi mpe­nza ! » Tata atindi moko wa basali akende kotika ye epai ya mama wa ye.

4:20  Mosali akamati mwana mpe akei kotika ye epai ya mama wa ye. Mama afandisi ye o bibelo tee midi ; mwana akufi se wana.

4:21  Mama amemi ye o likolo mpe alalisi ye o mbeto ya moto wa Nzambe, akangi ezibeli ya ndako mpe abimi.

4:22  Abengi mobali wa ye, alobi : « Tindela ngai mosali moko na mpunda, bongo nakende koyebisa moto wa Nzambe, na nsima nakozonga. »

4:23  Mobali wa ye atuni ye : « Mpo nini olingi kokende lelo epai ya ye ? Lelo sanza ya sika ebimi, to ezali mokolo mwa Sabato ? » Kasi mwasi azongisi : « Tikala na boboto ! »

4:24  Abongisi mpu­nda mpe alobi na mosaleli wa ye : « Ke­nde kotika ngai, tambwisa mpu­nda ya ngai. Soko nayebisi yo te, oteleme o nzela te ! »

4:25  Akei bongo mpe akomi epai ya moto wa Nzambe o ngomba Karmel. Ezalaki ye naino mosika, moto wa Nzambe asili amoni ye, alobi na mosali : « Tala mwasi wa Sunam azali koya.

4:26  Kende koyamba ye mpe tuna ye : Ozali malamu ? Mobali wa yo azali malamu ? Mwana wa yo azali malamu ? » Mwasi azongisi : « Tozali malamu. »

4:27  Kasi awa akomi epai ya moto wa Nzambe o ngomba, akangi ye o makolo. Gekazi ayei kolongola ye, kasi moto wa Nzambe alobi : « Tika ye, zambi azali koyoka motema mawa mpenza. Yawe abombeli ngai likambo, ayebisi ngai eloko te. »

4:28  Mwasi alobi : « Ngai moto nasengeki mokonzi wa ngai mwana ? Nalobelaki yo : Okosa ngai te ! »

4:29  Elizeo alobi na Gekazi : « Kanga nkamba, kamata lingenda lya ngai mpe kende. Soko okutani na moto o nzela, opesa ye mbote te ; soko ye apesi yo mbote, ozongisela ye losako te ! Tanda lingenda lya ngai likolo lya mwana. »

4:30  Kasi mama alobi na Elizeo : « Lokola Yawe azali na bomoi mpe lokola yo ozali na bomoi, nakotika yo te ! » Bongo Elizeo atelemi mpe alandi ye.

4:31  Gekazi akendeki liboso, atandaki lingenda likolo lya mwana, kasi mwana azongisaki liloba te, alakisaki mpe elembo ya bomoi te. Azongi epai ya Elizeo mpe ayebisi ye : « Mwana alamuki te. »

4:32  Elizeo ayei o ndako ; amoni mwana akufi, alali o mbeto ya ye.

4:33  Akoti o ndako, akangi ezibeli ya ndako, batikali se bango babale, mpe asambeli Nzambe.

4:34  Na nsima amilalisi likolo lya mwana, monoko mwa ye o monoko mwa mwana, miso ma ye o miso ma mwana, maboko ma ye o maboko ma mwana. Amitandi likolo lya mwana mpe nzoto ya ye ekomi lisusu móto.

4:35  Elizeo atelemi, abandi kotambola o kati ya ndako, na nsima amitandi lisusu likolo lya ye ; mbala nsambo asali bongo ; mwana akosoli mpe afungoli miso.

4:36  Elizeo abengi Gekazi mpe alobi na ye : « Benga mwa­si malamu oyo wa Sunam. » Abengi ye. Awa akomi, Elizeo alobi : « Kamata mwana wa yo. »

4:37  Mama akoti, akwei o boso bwa Elizeo, aku­mbami tee o nse ; na nsima amemi mwana wa ye mpe abimi.

4:38  Elizeo azongi o Gilgal. Nzala enene ezalaki kongala o mokili. Bayekoli ba profeta bafandi liboso lya ye. Alobi na mosali wa ye : « Tia nzu­ngu enene o móto mpe lambela bayekoli ba profeta supu. »

4:39  Moko wa bango abimi mpe akei kobuka ndu­nda o elanga ; kuna amoni nsinga ya mbika ya zamba, abuki mbuma mpe atondisi elamba na yango. Azongi mpe akati yango biteni biteni, abwaki yango o nzungu ya supu ; ayebi ndunda eye malamu te.

4:40  Bapesi bato supu mpe balei. Kasi awa bameki supu ena, banso bagangi : « Moto wa Nza­mbe, liwa lizali o nzungu ! » Mpe babangi kolia yango lisusu.

4:41  Bongo Elizeo alobi : « Boyela ngai mwa fufu. » Abwaki yango o nzungu, alobi : « Pesa bato balia. » Eloko ebe ezalaki lisusu o nzungu te.

4:42  Moto moko auti o Baal-Salisa mpe ayeli moto wa Nzambe eteni ya zomi ya mbuma ya yambo ya bila­nga, mampa ntuku ibale ya loso mpe mbuma ibesu o ekoló. Elizeo alobi na ye : « Pesa bato balia. »

4:43  Kasi mosali azongisi : « Naleisa na yango bato nkama ? » Elizeo alobi lisusu : « Pesa bato yango, balia, zambi Yawe alobi : Bakolia mpe ndambo ya bilei ekotikala. »

4:44  Apesi bango, banso balei mpe ndambo etikali, lokola Yawe alobaki.