Site uses cookies to provide basic functionality.

OK
ISAIAH
Prev Up Next
Chapter 50
Isai Kekchi 50:1  Aˈan aˈin li naxye li Ka̱cuaˈ: —Ma̱re la̱ex xecˈoxla nak la̱in xintzˈekta̱na lin tenamit Israel joˈ nak naxtzˈekta̱na rixakil junak li cui̱nk li naxjach rib. Cui joˈcan xinba̱nu, ¿bar cuan li hu re jachoc ib? Malaj ut xecˈoxla nak la̱in xexincˈayi xban xtojbal incˈas. ¿Ma incˈaˈ ta biˈ nequenau nak xban le̱ ma̱c nak xexcˈameˈ chi najt? ¿Ma ma̱cuaˈ ta biˈ xban nak xekˈetkˈeti e̱rib nak xexcˈameˈ chi najt?
Isai Kekchi 50:2  ¿Cˈaˈut nak ma̱ ani xintau nak xincˈulun? ¿Cˈaˈut nak incˈaˈ xine̱sume nak xexinbok? ¿Ma xecˈoxla nak la̱in incˈaˈ xru xexintenkˈa? ¿Ma xecˈoxla nak la̱in ma̱cˈaˈ incuanquil re e̱colbal? ¿Ma incˈaˈ nequenau nak yal riqˈuin li cua̱tin ninchakihobresi li palau ut ninsukˈisi li nimaˈ chokˈ chaki chˈochˈ? Ut eb li car nequeˈcam ut nequeˈkˈa xban nak ma̱cˈaˈ chic li haˈ.
Isai Kekchi 50:3  La̱in ninqˈue chi kˈojyi̱nocˈ ru li choxa. Ut nacˈutun nak ra saˈ xchˈo̱l. Chanchan jun li naxqˈue kˈeki tˈicr chirix xban xrahil xchˈo̱l.—
Isai Kekchi 50:4  Li Ka̱cuaˈ Dios naqˈuehoc innaˈleb ut naxqˈue cua̱tin re nak tinnau xcˈojobanquil xchˈo̱leb li tacuajenakeb. Rajlal cutan nak nasake̱u ninxqˈue chirabinquil li ra̱tin li naxcˈut chicuu.
Isai Kekchi 50:5  Li Ka̱cuaˈ Dios quiqˈuehoc innaˈleb ut la̱in incˈaˈ quincacuubresi inchˈo̱l, chi moco quinkˈetkˈeti cuib chiru.
Isai Kekchi 50:6  Quinkˈaxtesi ban lix yi cuix chi saqˈuecˈ. Ut quincanab cuib re teˈxmichˈ lin mach. Ut incˈaˈ quinmuk li xnakˈ cuu chiruheb nak quineˈxhob ut nak quineˈxchu̱ba.
Isai Kekchi 50:7  Li Ka̱cuaˈ Dios aˈan li natenkˈan cue. Joˈcan nak incˈaˈ ra nacuecˈa nak niquineˈxhob. La̱in xakxo̱quin chi cau joˈ jun li sako̱nac. La̱in ninnau nak incˈaˈ xuta̱nal tine̱lk mokon.
Isai Kekchi 50:8  Laj Colol cue cuan cuiqˈuin. ¿Ani ta̱ru̱k ta̱yehok re nak cuan inma̱c? Toxic riqˈuin laj rakol a̱tin. ¿Ani ta̱ru̱k ta̱jitok cue? Chicha̱lk ut chixyehak cue.
Isai Kekchi 50:9  Li Ka̱cuaˈ Dios, aˈan li natenkˈan cue. ¿Ma cuan ta biˈ junak ta̱yehok re nak cuan inma̱c? Chixjunileb li xicˈ nequeˈiloc cue telajeˈosokˈ joˈ nak na-osoˈ li tˈicr li namaxen.
Isai Kekchi 50:10  Abihomak la̱ex li nequexucua ru li Dios ut nequeba̱nu li cˈaˈru naxye laj cˈanjel chiru. Cui cuanquex saˈ kˈojyi̱n ut ma̱cˈaˈ e̱saken, checacuubresihak e̱chˈo̱l riqˈuin li Ka̱cuaˈ ut chex-oybeni̱nk riqˈuin le̱ Dios.
Isai Kekchi 50:11  Abanan che̱junilex la̱ex li nequecˈu̱b chanru nak te̱camsiheb le̱ ras e̱ri̱tzˈin texsachekˈ xban li cˈaˈru nequecˈu̱b ru xba̱nunquil. Li Ka̱cuaˈ ta̱ba̱nu̱nk re nak texsachekˈ ut xban li raylal te̱cˈul tex-osokˈ.