Site uses cookies to provide basic functionality.

OK
ISAIAH
Prev Up Next
Chapter 34
Isai Kekchi 34:1  Quimkex la̱ex li cuanquex saˈ eb li xni̱nkal ru tenamit, ut chˈutubomak e̱rib chirabinquil li oc cue chixyebal. Ex tenamit checanabak e̱rib chixqˈuebal retal li tinye e̱re. Cherabihak che̱junilex la̱ex li cuanquex saˈ ruchichˈochˈ ut cheqˈuehak retal.
Isai Kekchi 34:2  Xban nak li Ka̱cuaˈ Dios yo̱ xjoskˈil saˈ xbe̱neb li tenamit ut saˈ xbe̱neb ajcuiˈ lix soldado, tixkˈaxtesiheb re nak teˈcamsi̱k ut re nak teˈsachekˈ ruheb chi junaj cua.
Isai Kekchi 34:3  Eb li camenak telajeˈcana̱k chi tˈantˈo ut cˈajoˈak xchuhaleb. Ut ta̱osokˈ li tzu̱l saˈ lix quiqˈueleb.
Isai Kekchi 34:4  Chixjunil li cˈaˈru cuan chiru li choxa telajeˈosokˈ ut ta̱sachekˈ li choxa. Chanchanak chic li hu naxboti rib. Telajeˈtˈanekˈ chixjunileb li chahim joˈ nak natˈaneˈ lix xak lix cheˈel li uvas malaj ut lix xak lix cheˈel li higo.
Isai Kekchi 34:5  Li Ka̱cuaˈ yo̱ chak xjoskˈil saˈ choxa saˈ xbe̱neb laj Edom. Chanchan nak cha̱lc re chixcamsinquileb chi chˈi̱chˈ nak tixkˈaxtesiheb chi camsi̱c. Ac tenebanbil ca̱mc saˈ xbe̱n li tenamit aˈan.
Isai Kekchi 34:6  Nak teˈcamsi̱k chanchan nak lix chˈi̱chˈ li Ka̱cuaˈ ta̱osokˈ saˈ lix quiqˈueleb ut saˈ lix xe̱b. Chanchan nak nequeˈcamsi̱c li cocˈ carner ut eb li chiba̱t nak nequeˈxqˈue lix mayej. Chanchan nak li Ka̱cuaˈ oc re xqˈuebal li cˈatbil mayej aran Bosra. Ma̱ caˈchˈin li camsi̱nc ta̱cua̱nk aran Edom.
Isai Kekchi 34:7  Eb li tenamit aˈan teˈcamsi̱k joˈ nak nequeˈcamsi̱c li cuacax ut li toro. Lix quiqˈueleb tixtˈakresi li chˈochˈ ut lix xe̱buleb ta̱osokˈ saˈ li poks,
Isai Kekchi 34:8  xban nak aˈan li cutan nak li Ka̱cuaˈ tixqˈue re̱kaj reheb laj Edom li raylal queˈxba̱nu reheb laj Israel. Aˈan li chihab nak teˈxcˈul re̱kaj li ma̱usilal queˈxba̱nu.
Isai Kekchi 34:9  Eb li nimaˈ li cuanqueb saˈ li naˈajej Edom ta̱sukˈi̱k xkˈol cheˈ. Ut li poks ta̱sukˈi̱k azufre. Chixjunil li tenamit ta̱lochk xxamlel.
Isai Kekchi 34:10  Ut incˈaˈ chic ta̱chupk lix xamlel. Yo̱k xxamlel chi kˈek chi cutan. Junelic yo̱k xsibel. Ta̱cana̱k chi ma̱cˈaˈ chic na-oc cuiˈ. Ut ma̱ ani chic ta̱numekˈ aran.
Isai Kekchi 34:11  Ut aran teˈxyi̱b lix naˈajeb li soˈsol, laj qˈuix u̱ch, li tzˈok joˈ eb ajcuiˈ li cuarom. Li naˈajej Edom ta̱sukˈi̱k chaki chˈochˈ ut ma̱ ani chic ta̱cua̱nk aran.
Isai Kekchi 34:12  Incˈaˈ chic ta̱cua̱nk rey chi takla̱nc saˈ li naˈajej aˈan. Ut chixjunileb li cuanqueb xcuanquil ma̱cˈaˈakeb chic.
Isai Kekchi 34:13  Junes qˈuix chic ta̱cua̱nk saˈ eb lix palacio ut saˈ eb li cab li najt xteram li nequeˈxcol cuiˈ ribeb. Li naˈajej aˈan ta̱cana̱k chokˈ xnaˈajeb laj xoj ut chokˈ xnaˈajeb li ni̱nki xul avestruces xcˈabaˈ.
Isai Kekchi 34:14  Eb li joskˈ aj xul li nequeˈcuan saˈ li chaki chˈochˈ teˈcua̱nk rochbeneb laj xoj. Ut eb li chiba̱t re li qˈuicheˈ teˈxjap reheb chixbokbaleb lix comon. Ut teˈcua̱nk ajcuiˈ li cuarom saˈ li naˈajej aˈan. Aran teˈcua̱nk chi hila̱nc.
Isai Kekchi 34:15  Ut aran ajcuiˈ teˈxyi̱b xsoqueb li cuarom ut teˈmolbek ut teˈxqˈuiresi li raleb. Ut teˈxchˈutubeb re nak ma̱cˈaˈ teˈxcˈul. Ut aran ajcuiˈ teˈcua̱nk li cˈuch, junju̱nk tux ut junju̱nk tzoˈ.
Isai Kekchi 34:16  Sicˈomak saˈ li hu li tzˈi̱banbil cuiˈ li cˈaˈru quixye li Dios ut te̱ril xsaˈ re nak te̱qˈue retal ma cuan junak quipaltoˈ. Eb li xul aˈin queˈcuan saˈ li naˈajej aˈan joˈ quixye li Dios. Junju̱nk tux ut junju̱nk tzoˈ xban nak lix musikˈ, aˈan li quichˈutuban reheb.
Isai Kekchi 34:17  Aˈ li Ka̱cuaˈ, aˈan li quiqˈuehoc reheb saˈ xnaˈajeb li junju̱nk. Aˈan quisicˈoc re lix naˈajeb. Ut aran teˈcua̱nk junelic kˈe cutan.