Pohnpeian - Job - 11

11:1  Ia duwe, sohte emen pahn sapeng lokaia soh katepe pwukat? Lokaia tohto kak kapwungala aramas emen?

11:2  Ia duwe, sohte emen pahn sapeng lokaia soh katepe pwukat? Lokaia tohto kak kapwungala aramas emen?

11:3  Sohp, ke lemeleme me se sohte kak sapeng komwi? Me dene omwi lokaia kepweikeng kan pahn kahrehda at sohla pahn kak lokaia?

11:4  Komwi lemeleme me omwi lokaia kan me mehlel; komwi lemeleme me komwi me mwakelekel mwohn silangin Koht.

11:5  Ia uwen ei men Koht en ketin sapeng komwi!

11:6  E pahn mahsanihong komwi duwen soahng tohto en kupwurokong; soahng kei mie me nohn loal me aramas sohte kak wehwehki. Koht ketin kalokei komwi tikitik sang me konehng komwi en ale.

11:7  Komwi kak diarada imwin oh irepen sapwellimen Koht lapalap oh manaman?

11:8  Sohte irepen pahnlahng ong Koht, ahpw komwi sohte kak dehdehki. Koht mwahngih sapwen me melahr akan, ahpw komwi sohte wehwehki.

11:9  Sapwellimen Koht lapalap siksang mehlel sampah, tehlap sang sehd.

11:10  Ma Koht pahn ketikilahng komwi nan mwoalen kopwung, ihs me kak kapweiekidi?

11:11  Koht mwahngih ihs aramas me soh katepe; e mahsanih arail wiewia suwed kan koaros.

11:12  Aramas pweipwei kan pahn tapihada loalokongla ni ahnsou me ahs lawalo kan pahn ipwidi mand.

11:13  Sohp, kapwungala nan kapehdomw. Sohpeiong Koht.

11:14  Kesehwei me suwed oh sapwung sang nan imwomw.

11:15  Komwi pwurehng uh mwohn sampah, ni kapehd kehlail oh tengeteng.

11:16  Eri, omwi kahpwal akan ahpw pahn sohrala sang nan kapehdomw, rasehng lapake me kin sohrala oh sohla me kin taman.

11:17  Omwi mour ahpw pahn marain sang marain en ketipin en nin souwas, oh ahnsoun rotorot en omwi mour pahn marain rasehng marain en nin sohrahn.

11:18  Komwi pahn saledek sang apwal oh direkihla koapworopwor; Koht pahn ketin doareikomwihla oh ketin kommoaleikomwihdi.

11:19  Komwi sohla pahn masak omwi imwintihti kan; aramas tohto pahn peki omwi sawas.

11:20  Ahpw aramas suwed kan pahn kilikilengseli nan ar pwunod oh diar me sohte wasa kis re kak pitla ie. Ihte re pahn kasik mehla en lelohng irail.