Pohnpeian - Job - 33

33:1  Eri, Sohp, komw karonge kanahieng mehkoaros me I pahn patohwan.

33:2  I onopadahr I en patohwanda ei tungoal lamalam.

33:3  Ei pato kan koaros me mehlel, oh I koasoakoasoia dahme mehlel.

33:4  Ngenen Koht me wiaiehda oh ketikihong ie mour.

33:5  Sapeng ie ma komw kak. Kaunopada omwi akupwung kan.

33:6  Kita duwepenehte mwohn silangin Koht, kita koaros wiawihda sang pwehl.

33:7  Eri, sohte kahrepen omwi pahn masak ie; I sohte pahn poweikomwihdi.

33:8  Eri, iet dahme I rongehr sang komwi:

33:9  “I sohte wiahda dihp; I sohte wiahda mehkot sapwung. I me mwakelekel oh sohte dipei.

33:10  Ahpw Koht ketin rapahki dahme e pahn ketin uhkihong ie oh wiahkin ie sapwellime imwintihti.

33:11  E ketin salihkidier nehi kan sel mete; oh e kin ketin mwasamwasahn kahk koaros me I kin wia.”

33:12  Ahpw I pahn patohwanohng komwi, Sohp, me komwi sapwung. Koht ketin lapalapasang aramas koaros.

33:13  Dahme komwi kapwukohnekihki Koht me dene e sohte kin ketin sapeng en aramas kaulim kan?

33:14  Mehnda ma Koht kin ketin mahsen ahnsou koaros, ahpw sohte me kin tehk dahme e kin mahsanih.

33:15  Ni aramas ar kin meir nipwong, Koht kin ketin mahsen nan ouraman oh kaudiahl kan.

33:16  E kin ketin kupwurehda pwe re en rong dahme e mahsanih, oh re kin masakada sapwellime mahsen kan.

33:17  E kin ketin mahsen pwehn katokihedi diparail kan oh en ketin doareirailla pwe re dehr aklapalapala.

33:18  E sohte kak ketin mweidohng re en mwomwla; e kin ketin kapitirailsang mehla.

33:19  Koht kin ketin kapwungala aramas ni eh kin ketikihdo soumwahu, oh kadirehkihla paliwere medek.

33:20  Aramas soumwahu men kin sohla men tungoale mehkot, oh pil sohla kin men tungoale kisin tungoal me keieu mwahu.

33:21  Paliwere kin tihtihla; komwi kak kilang tih koaros;

33:22  e nektehn kolahng nan sapwen me melahr akan.

33:23  Mweinele tohnleng men pahn ketido sewesehda-% emen sapwellimen Koht tohnleng ngeder kan, me kin katamanki aramas arail pwukoa.

33:24  Sang ni sapwellime kalahngan e ahpw pahn mahsanih, “Pweisang! E sohte pahn kolahng nan sapwen me melahr akan. Iet pweinen eh pahn kasaledekla.”

33:25  Paliwere pahn pwurehng pwulopwula oh kehlailda;

33:26  Ni eh pahn kapakap, Koht pahn ketin sapeng; e pahn pwongih Koht ni peren; Koht pahn ketin pwurehng kapwungala mehkoaros reh.

33:27  E ahpw pahn patohwanda nan pokon sansal, “I dipadahr. I wiadahr me sapwung, ahpw Koht ketin doareiehla.

33:28  E ketin nekinekid ie pwe I en dehr kolahng nan sapwen me melahr akan, eri, iet I momourte.”

33:29  Koht kin ketin pwurupwurehng wiewia mepwukat;

33:30  e kin ketin doarehla mour en aramas emen, oh ketikihong en kin perenki eh momour.

33:31  Eri, Sohp komwi karonge dahme I koasoakoasoia; nennenla oh mweidohng ie I en pato.

33:32  Ahpw ma mie mehkot me komwi men koasoia, eri, I pahn rong; I pahn perenki koasoia me komwi me pwung.

33:33  Ahpw ma soh, nennenlahte oh karonge ie, I ahpw pahn padahkihong komwi duwen kupwurokong.